Jeremías 29 - CHUYA QELLQA La Biblia en Quechua de Ayacucho 2012

Preso apasqakunaman Jeremías cartasqanmanta

¹ Jerusalén llaqtamantam profeta Jeremías cartarqa preso apasqa ancianokunaman, sacerdotekunaman, profetakunaman hinaspa wakin runakunamanpas.

² Qellqarqaqa Jerusalén llaqtamanta rey Jeconiasta, reinata, palaciopi servikuqkunata, Judá nacionpi kamachikuqkunata, Jerusalén llaqtapi wakin runakunata, tukuy imapi llamkaq maestrokunata chaynataq herrerokunatapas Babilonia lawman rey Nabucodonosor presota apachisqanpa qepantam.

³ Chay cartatam apachirqa Safanpa churin Elasawan hinaspa Hilciaspa churin Gemariaswan. Paykunatam Judá nacionpa reynin Sedequías, Babilonia nacionpa reynin Nabucodonosorman kacharqa. Chay cartam kaynata nirqa:

⁴ Jerusalén llaqtamanta Babilonia lawman llapallan preso apasqankunatam, Israelpa yupaychasqan Tukuy Atiyniyuq Tayta Dios kaynata nin:

⁵ Wasichakuspa chaypi yachaychik, huertakunata ruwaspa rurunta mikuychik,

⁶ casarakuspa wawa-churiyuq kaychik, wawa-churikichiktapas casarachiychik, chaynapi paykunapas miraptin ama qollurunaykichikpaq.

⁷ Chay yachasqaykichik llaqtapa hawkayaynintayá maskaychik, chaypaqyá ñoqata mañakuwaychik, chaynapi llaqta hawkalla kaptin qamkunapas hawkalla kanaykichikpaq.

⁸ Ñoqa Israelpa yupaychasqan Tukuy Atiyniyuq Tayta Diosmi kaynata nini: Amayá engañachikuychikchu qamkuna ukupi kaq profetakunawan nitaq qatipaqkunawanpas, mosqosqankutapas ama kasuychikchu.

⁹ Ñoqapa sutiypi profetizasqankuqa llullam, paykunataqa manam kamachimurqanichu, ñoqa Tayta Diosmi chaynata nini.

¹⁰ Tayta Diosmi kaynata nin: Babilonia nacionpi qanchis chunka wataña karup-tikichikmi, prometesqayman hina kuyapayakuyniyta qamkunaman chayachimusaq, hinaspam Jerusalén llaqtaman kutichimusqaykichik.

¹¹ Qam-kunapa allinnikichikpaq imam ruway munasqaytaqa sumaqtam yachani. Qamkunapa allinnikichiktam tanteachkani, manam mana allinnikichiktachu, chaynapi hamuq punchawkunapi hawka kawsakunaykichikpaq. Ñoqa Tayta Diosmi chaynata nini.

¹² Chaymi qayakamuwaspa maña-kuwaptikichik uyarisqaykichik.

¹³ Mas-kawaspaykichikpas tariwankichikmi, tukuy sonqoykichikwan maskawasqaykichikrayku.

¹⁴ Ñoqa Tayta Diosmi nini: Qamkunaqa tariwankichikmi, llapallan nacionkunaman chaynataq tukuy hinastinman cheqechisqaymantam huñumusqaykichik, maymantam apasqa kasqaykichikmanmi kutichimusqaykichik, nispa.

¹⁵ Qamkunam ichaqa nichkankichik: Kay Babilonia nacionpim profetakunata Tayta Dios qoykuwanku, nispaykichik.

¹⁶ Ichaqa rey Davidpa trononmanta munaychakuq reymantawan kay Jerusalén llaqtapi mana preso apasqa kaspanku puchuq aylluykichikkunamantam,

¹⁷ Tukuy Atiyniyuq ñoqa Tayta Dios kaynata nini: Paykunapa contranpim guerrata, yarqayta hinaspa peste onqoyta kachamusaq. Mikunapaqpas mana valeq ismusqa higosta hinañam paykunataqa ruwarusaq.

¹⁸ Guerrawan, yarqaywan hinaspa peste onqoywanmi paykunataqa ñakarichisaq. Kay pachapi llapallan nacionkunapapas manchakuspa katkatatanantam paykunataqa ruwarusaq. Cheqechisqay nacionkunapim paykunaqa ñakasqa, burlakusqa, penqayman churasqa hinaspa asipayasqa kanqaku.

¹⁹ Chaynataqa ruwasaq, profetaykunawan ñataq-ñataq willachisqaykunata mana kasukusqankuraykum, ñoqa Tayta Diosmi chaynata nini.

²⁰ Jerusalén llaqtamanta Babilonia nacionman llapallan pusachisqaykuna, ñoqa Tayta Diospa nisqayta uyariychik.

²¹ Colaiaspa churin Acabmantawan Maasiaspa churin Sedequiasmanta chaynataq ñoqapa sutiypi llullakuspa willasuqnikichik profetakunamantam ñoqa Israelpa yupaychasqan Tukuy Atiyniyuq Tayta Dios kaynata nini: Babilonia nacionpa reynin Nabuco-donosorman qoykuptiymi qayllaykichikpi paykunata wañuchinqa.

²² Hinaptinmi Judá nacionmanta Babiloniaman preso apasqa kaqkuna, pitapas ñakaspanku kaynata ninqaku: Tayta Diosyá, ruwasunkichik imaynam Sedequiastawan Acabta hina, paykunatam ninapi kankarurqa Babilonia nacionpa reynin, nispanku.

²³ Paykunam Israel nacionpi millakuypaq huchakunata ruwarqaku: Runamasinkupa warminwanmi waqllikurqaku, mana kamachichkaptiymi ñoqapa sutiypiraq llullakunata profetizarqaku, ñoqapa mana kamachisqaykunatam rimarqaku. Chaykunataqa yachanim kikiypunim testigo kani. Ñoqa Tayta Diosmi chaynata nini.

Semaiasman Jeremiaspa willasqanmanta

²⁴ Jeremiastam Tayta Dios kamachirqa, Nehelam llaqtayuq Semaiasman kaynata nimunanpaq:

²⁵ Israelpa yupaychasqan Tukuy Atiy-niyuq Tayta Diosmi kaynata nin: Qanmi sutikipi cartakunata apachirqanki Jerusalén llaqtapi llapallan runakunaman, Maasiaspa churin sacerdote Sofoniasman hinaspa llapallan sacerdotekunamanpas. Chay cartapim Sofoniasta kaynata nirqanki:

²⁶ Sacerdote Joiadapa rantinpi sacerdote kanaykipaqmi Tayta Dios churasunki, chaynapi Tayta Diospa templonpi kamachikuq kaspayki, profeta tukuspa rimaq locoyasqakunata cepoman churaspa cadenakunawan watanaykipaq.

²⁷ Hinaptinqa ¿imanasqataq mana qaqcharqankichu Anatot llaqtayuq Jeremiastaqa profeta tukuspa rimasqanmanta?

²⁸ Paymi Babilonia lawpi kaqkunaman cartamuwaspanku kaynata nimusqa: Preso apasqa kaqkunaqa unaymi chaylawpi kamunkichik, chaynaqa wasichakuspa chaypi yachaychik, huertakunatapas plantaspa rurunta mikuychik, nispa.

²⁹ Chay cartatam profeta Jeremiaspaq sacerdote Sofonías leepurqa.

³⁰ Hinaptinmi Jeremiasta Tayta Dios nirqa:

³¹ Jerusalén llaqtamanta llapallan preso apasqa kaqkunaman ñoqa Tayta Diospa nisqayta kaynata willachimuy: Nehelam llaqtayuq Semaiasmi, mana kachamuchkaptiy llullakunata rimaspa yanqakunapi creechisuchkankichik.

³² Chayraykum ñoqa Tayta Dios kaynata nini: Nehelam llaqtayuq Semaiastam mirayninkunatawan kuskata castigasaq. Mirayninkunamantaqa manam pipas runaykuna ukupi yachaqqa kanqachu. Llaqtaytam ñoqa Tayta Diospa contraypi hatarichirqa, chayraykum Semaiasqa runaykunata favoreceptiypas mana rikunqachu. Ñoqa Tayta Diosmi chaynata nini.