Jeremías 27 - CHUYA QELLQA La Biblia en Quechua de Ayacucho 2012

Yugowan rikchanachiymanta

¹ Josiaspa churin rey Joacim Judá nacionpi munaychakuyta qallaykuptinmi Jeremiasta Tayta Dios rimapayarqa

² kaynata nispan: Yugotawan coyundata ruwakaramuy hinaspa matankaykiman watakaramuy.

³ Chaymantam Edompa, Moabpa, Amonpa, Tiropa hinaspa Sidonpa reyninkunaman willachimunki, Judá nacionpa reynin Sedequiasta watukunankupaq Jerusalén llaqtaman hamuqkunawan.

⁴ Israelpa yupaychasqan ñoqa Tukuy Atiyniyuq Tayta Diospa nisqaytam chay runakunaman kamachinki, reyninkuman kaynata willanankupaq:

⁵ Hatu-hatun atiyniywanmi kay pachatapas, chaypi kaq runakunatawan animalkunatapas ruwarqani. Chaynaqa, pimanpas munasqaymanmi qoykuyman.

⁶ Kunanmi llapallan nacionkunata Babilonia nacionpa reynin serviqniy Nabucodonosorman qoni, purun animalkunatapas paymanmi munaychakunanpaq qoni.

⁷ Llapallan nacionkunam payta, churinta hinaspa willkanta servinqaku. Chaynaqa, kanqa Babilonia nacionpas hatun nacionkunapa chaynataq atiyniyuq reykunapa makinman wichinankamam.

⁸ Sichum mayqan nacionpas otaq kamachikuqpas Babilonia nacionpa reynin Nabucodonosorta mana serviyta munaptinqa, chaynataq payman mana sujetakuyta munaptinqa, chay naciontam guerrawan, yarqaywan hinaspa peste onqoywan puchukachisaq. Chay naciontaqa puchukachinaykamam rey Nabucodonosorwan castigasaq. Ñoqa Tayta Diosmi chaynata nini.

⁹ Amayá kasuychikchu chay profetakunataqa, qatipaqkunataqa, mosqoykunapa imam ninan willakuqkunataqa, suerte qawaqkunataqa nitaq layqakunatapas. Paykunam umachasuchkankichik: Babilonia nacionpa reynintaqa manam servinkichikchu, nispanku.

¹⁰ Paykunaqa allpaykichikta saqerachisunaykichikpaqmi llullakunata willasuchkankichik, chaynapi ñoqapas karu nacionman qarqoruptiy wañunaykichikpaq.

¹¹ Babilonia nacionpi reypa llasaq yugonman kunkanta sujetaqkunatam ichaqa hina allpanpi saqeykusaq, hinaptinmi chakrankuta llamkaspa hinapi yachanqaku. Ñoqa Tayta Diosmi chaynata nini.

¹² Ñoqa Jeremiasmi Judá nacionpa reynin Sedequiasman tukuy chaykunata kaynata willarqani: Babilonia nacionpi reypa yugoman kunkaykichikta sujetaychik hinaspa paytawan llaqtanta serviychik. Chay-nata ruwaspaqa kawsankichikmi.

¹³ ¿Imanasqataq qampas chaynataq runaykikunapas guerrawan, yarqaywan chaynataq peste onqoywan wañuyta munankichik? Tayta Diospa nisqanpi hinapas, tukuy kaykunaqa Babilonia nacionpa reyninta mana serviy munaq nacionkunatam pasanqa.

¹⁴ Chay profetakunapa umachasusqaykichiktaqa ama kasuychikchu, Babilonia nacionpa reynintaqa manam servinkichikchu nisuptikichikpas, paykunaqa llullatam nisuchkankichik.

¹⁵ Paykunataqa manam kachamurqanichu, paykunaqa llullatam ñoqapa sutiypi rimachkanku, chaynapi qamkunatapas chaynataq llulla profetaykichikkunatapas ñoqa Tayta Dios qarqoruptiy wañunaykichikpaq, nispa.

¹⁶ Sacerdotekunamanpas chaynataq llapallan runakunamanpas Tayta Diospa nisqantam kaynata nirqani: Chay profetakunam nichkanku: Templopa servicionkunatam Babilonia nacionmanta chaylla kutichimunqaku, nispanku. Chay nisqankuqa llullam. Chay profetaykichikkunapa nisqantaqa ama kasuychikchu.

¹⁷ Paykunata ama kasuspa Babilonia nacionpa reyninta serviychik, chaynata ruwaspaqa kawsankichikmi. ¿Imanasqataq kay llaqta purmachisqa kanantaraq munankichik?

¹⁸ Sichum cheqap profetakuna kaspankuqa chaynataq palabraypas paykunapi kaptinqa, ñoqa Tukuy Atiyniyuq Tayta Diosta mañakuwachunku, chaynapi temploypi puchuq serviciokunatapas, Judá nacionpi reypa wasinpi hinaspa Jerusalenpi puchuq serviciokunatapas Babilonia nacionman ama apanankupaq.

¹⁹ Ñoqa Tukuy Atiyniyuq Tayta Diosmi kaynata nini: Kay llaqtapi puchuq bronce pilarkunamanta, yakupaq estanquemanta, lavatoriokunapa tiyanankunamanta chaynataq wakin serviciokunamantapas,

²⁰ tukuy chaykunataqa manam Babilonia nacionpa reynin Nabucodonosorqa aparqachu, Joacimpa churin rey Jeconiastawan Judá nacionpi chaynataq Jerusalén llaqtapi llapallan kamachikuqkunata Babiloniaman presota apaspanqa.

²¹ Templopi, Judá nacionpi, reypa wasinpi chaynataq Jerusalén llaqtapi puchuq serviciokunamantam ñoqa Tukuy Atiyniyuq Tayta Dios nini:

²² Chaykunataqa Babilonia nacionmanmi apanqaku, chaypim kamunqa ñoqa munaptiy kay sitioman kutichimunankukama, nispa.