Jeremías 26 - CHUYA QELLQA La Biblia en Quechua de Ayacucho 2012

Jeremiasta wañuchinankupaq hapirusqankumanta

¹ Josiaspa churin rey Joacim Judá nacionpi munaychakuyta qallaykuptinmi, Jeremiasta rimapayaspan Tayta Dios

² kaynata nirqa: Temploypa pationpi sayaykuspayki tukuy kamachisqaykunata Judá nacionpi llaqtakunamanta yupaychawanankupaq hamuqkunaman willakamuy. Ama qonqaruspa imam kaqta willamuy.

³ Icharaqpas uyarikuspanku mana allin kawsayninkumanta sapakama wanakunmanku, chayna kaptinqa mana allin ruwasqankumantam ñoqapas manaña castigasaqchu.

⁴ Ñoqa Tayta Diospa nisqayta paykunaman kaynata nimuy: Mana kasuwaspaykichik kamachikuykuna qosqaytapas mana ruwayman churaptikichikqa,

⁵ chaynataq qamkunaman ñataq-ñataq kachamusqay profetaykunapa nisqantapas mana kasukuptikichikqa,

⁶ Silo llaqtapi ruwasqayta hinam kay templotapas purmarachisaq. Kay Jerusalén llaqtatapas llapallan nacionkuna qawananpaqmi ñakasaq, nispa.

⁷ Chaymi templopi Jeremiaspa rimasqankunata, llapa sacerdotekuna, profetakuna hinaspa llapa runakunapas uyarirqaku.

⁸ Tayta Diospa kamachisqankunata Jeremías rimayta tukuruptinmi, llapa sacerdotekuna, profetakuna hinaspa llapallan runakuna hapiruspanku kaynata nirqaku: Wañunkipunim.

⁹ ¿Imanasqataq Tayta Diospa sutinpi rimaspa ninki: Silo llaqtapi hinam kay templopas purmachisqa kanqa, kay Jerusalén llaqtapas mana runayuqñam purmanqa nispaykiqa? nispanku. Hinaspankum Jeremiasta llapa runakuna templo ukupi muyururqaku.

¹⁰ Judá nacionpi kamachikuqkunañataqmi, chaykunata yacharuspanku, reypa palacionmanta temploman rirqaku, hinaspam “Musoq Punku” nispa sutichasqanku punkupi juzgawanankupaq tiyaykurqaku.

¹¹ Chaymi sacerdotekunawan profetakuna, chay kamachikuqkunaman hinaspa lliw runakunaman nirqaku: Uyarisqaykichikpi hinapas, kay runaqa kay llaqtapa contranpim rimarun, chayraykum wañunanpaq sentenciasqa kanan, nispanku.

¹² Hinaptinmi Jeremiasñataq llapa kamachikuqkunamanwan runakunaman nirqa: Tayta Diosmi kachamuwarqa kay templopa contranpi chaynataq kay llaqtapa contranpi rimanaypaq, chaytaqa lliwmi uyarirqankichik.

¹³ Mana allin kawsaynikichiktawan mana allinkuna ruwasqaykichikta saqespa yupaychasqaykichik Tayta Diospa nisqanta kasukuptikichikqa, paypas manañam contraykichikpi rimasqankunata kacharimunqañachu.

¹⁴ Kunanqa makikichikpim kani, tanteasqaykichikman hinayá ñoqawan ruwaychik.

¹⁵ Ichaqa kaytayá yachaychik: Wañuchiwaspaykichikqa, llapallaykichikmi inocente runata wañuchisqaykichikmanta huchayuq kankichik. Cheqaptapunipas ñoqataqa Tayta Diosmi kachamuwarqa, uyarisqaykichik palabrakunata qamkunaman ninaypaq, nispa.

¹⁶ Hinaptinmi sacerdotekunatawan profetakunata, llapa kamachikuqkunawan runakuna nirqaku: Yupaychasqanchik Tayta Diospa sutinpim payqa rimapayawarqanchik, manam wañunanpaqqa sentenciachwanchu, nispanku.

¹⁷ Wakin ancianokunapas hatarispankum chaypi huñunasqa runakunata nirqaku:

¹⁸ Judá nacionpi rey Ezequías munaychakuchkaptinmi, Moreset llaqtayuq Miqueas kay Judá nacionpi llapallan runakunata nirqa: Tukuy atiyniyuq Tayta Diosmi kaynata nin: Sión llaqtam yapusqa chakraman tikrasqa kanqa, Jerusalén llaqtam purmachisqa kanqa, Templopa kasqan moqom monteyarunqa, nispa.

¹⁹ ¿Yaqachu rey Ezequiaswan Judá nacionpi runakuna Miqueasta wañu-chirqaku? Manam, aswanqa kikin reypas Tayta Diosta manchakuspam paykunamanta llakipayarinanpaq mañakurqa, chaymi Tayta Diospas rimasqan castigokunata manaña kacharimurqachu. ¿Chaychu ñoqanchikñataq kay hatu-hatun huchata qepikuruchwan?

²⁰ Quiriat-jearim llaqtayuq Semaiaspa churin profeta Uriaspas, Jeremiaspa nisqanta hinallam kay llaqtapa chaynataq kay nacionpa contranpi, Tayta Diospa sutinpi rimarqa.

²¹ Hinaptinmi rey Joacimñataq llapa tropankunapa capitanninkunawan hinaspa llapa kamachikuqkunawan kuska, Uriaspa nisqanta uyariruspanku wañurachiyta munarqaku. Ichaqa Uriasmi mancharikuspan Egipto nacionman lluptikurqa.

²² Hinaptinmi rey Joacimqa, Acborpa churin Elnatantawan wakin runakunata Egipto nacionman kacharqa.

²³ Paykunam Uriasta Egipto nacionmanta pusaramuspanku rey Joacinman qoykurqaku. Chaymi rey Joacim kamachikuptin espadawan wañurachispanku, wakchakunata pampananku uchkuman ayanta wischuykamurqaku, nispanku.

²⁴ Safanpa churin Ahicammi Jeremiaspa allinninpi rimarqa, chaynapim Jeremiasta wañurachinankupaq llapa runakunapa makinmanqa mana qoykurqakuchu.