Jeremías 25 - CHUYA QELLQA La Biblia en Quechua de Ayacucho 2012

Norte lawmanta hamuq enemigomanta

¹ Josiaspa churin rey Joacim Judá nacionpi tawa wataña munaychakuchkaptinmi chaynataq Babilonia nacionpa reynin Nabucodonosorpas wataña munaychakuchkaptinmi, Judá nacionpa contranpi Jeremiasta Tayta Dios rimapayarqa.

² Chaymi profeta Jeremiasñataq Judá nacionpi runakunamanwan Jerusalenpi yachaqkunaman kaynata willarqa:

³ Amonpa churin Josías chunka kimsayuq wataña Judá nacionpi munaychakuchkaptinmi Tayta Dios rimapa-yawarqa, Chay tiempomantam kunan-kama iskay chunka kimsayuq wataña pasarun. Mana samaykuspaymi rima-payarqaykichik, ichaqa manam uyariwarqankichikchu.

⁴ Tayta Diosqa serviq-nin profetakunatam mana tukuyta kachamusurqankichik, ichaqa manam kasurqankichikchu, nitaqmi uyariytapas munarqankichikchu.

⁵ Paykunam kaynata nisurqankichik: “Mana allin kawsaymantawan mana allin ruwaymanta wanakuspaykichikqa, taytaykichikmanpas chaynataq qamkunamanpas wiñaypaq qosqay allpapim yachankichik.

⁶ Llapa idolokunataqa amam qatinkichikchu, nitaqmi yupaychaychikchu. Amayá Tayta Diostaqa piñachiychikchu kiki-kichikpa ruwasqaykichik idolokunata yupaychaspaqa, chaynapi mana ima sasachakuytapas kacharimusunaykichikpaq”, nispa.

⁷ Tayta Diosmi kaynata nin: Qamkunam ichaqa mana kasuwaspa idolokuna ruwasqaykichikwan piñachiwarqankichik, chaykunaqa karqa kikikichikpa mana allinnikichikpaqmi, nispa.

⁸ Chayraykum Tukuy Atiyniyuq Tayta Dios kaynata nin: Palabraykunata mana kasukusqay-kichikraykum,

⁹ norte lawpi nacionkunatawan Babilonia nacionpa reynin serviqniy Nabucodonosorta kachamusaq, kay nacionpa, llapallan runankunapa chaynataq muyuriqninpi nacionkunapa contranpi. Hinaspaymi paykunata pasaypaqta tukurusaq, tuñirachispaymi wiñaypaq purmarachisaq, chaynapim runakunapas admirakuspa burlakunqaku.

¹⁰ Kusikuspanku fiestakunapi chaynataq casarakuykunapi takiyninkutapas qollurachisaqmi. Maraypa kunrunyayninpas, mecheropa achkiyninpas manañam kanqañachu.

¹¹ Kay nacionmi pasaypaq tuñichisqa kaspa chunninqa. Kay nacionkunaqa Babilonia nacionpa reynintañam qanchis chunka wata servinqaku.

¹² Qanchis chunka wata pasaruptinmi, Babilonia nacionpa reynintawan Caldea nacionniyuq runakunata, mana allinkuna ruwasqankumanta puchukarachisaq. Ñoqa Tayta Diosmi chaynata nini.

¹³ Caldea nacionpa contranpi llapallan nisqaykunatam ruwasaq, imaynam kay libropi qellqasqaman hina. Chaykunatam llapa nacionkunapa contranpi profeta Jeremías ñoqapa sutiypi willakurqa.

¹⁴ Hatun nacionkunawan munayniyuq reykunam paykunapi munaychakunqa. Chaynatam tukuy mana allinkuna ruwasqankumanta paykunaman pagapusaq, nispa.

Nacionkuna castigasqa kananmanta

¹⁵ Israelpa yupaychasqan Tayta Diosmi kaynata niwarqa: Vinowan hina piñakuyniywan huntasqa vasota chaskiwaspaykiyá kachasqay nacionkunaman upyachimuy.

¹⁶ Chay vasomanta upyaspankum katkatatanqaku, paykunapa contranpi guerrata kacharisqayraykum locoyanqaku, nispa.

¹⁷ Tayta Diospa makinmanta chay vasota chaskiykuspaymi, kachawasqan nacionkunaman upyachimurqani.

¹⁸ Upyachimurqanim Jerusalén llaqtamanpas, Judá nacionpi llaqtakunamanpas, reyninkunamanpas hinaspa kamachikuqkunamanpas; chaynapi chunnichisqa, purmachisqa, burlakusqa hinaspa ñakasqa kanankupaq. Chaynam kunankamapas kachkanku.

¹⁹ Upyachirqanitaqmi Egip-topa reynin Faraonmanpas, serviqninkunamanpas, kamachikuqkunamanpas hinaspa runankunamanpas,

²⁰ Egipto nacionpi huklaw llaqtayuqkunamanpas; Uz nacionpi reykunamanpas, Filistea lawpi kaq Ascalón, Gaza, Ecrón chaynataq Asdod llaqtakunapa reyninkunamanpas;

²¹ upyachirqanitaqmi Edompa, Moabpa chaynataq Amonpa reyninkunamanpas;

²² Tiro nacionpa Sidón nacionpa chaynataq Mediterráneo sutiyuq lamar qochapa patan nacionkunapa reyninkunamanpas.

²³ Upyachirqanitaqmi Dedanpa, Temanpa, Buzpa chaynataq rinrinkupa ñawpaqnin lawpi kaq chukchanku rutukuqkunamanpas;

²⁴ Arabia lawpi, chunniq lawpi kaq llaqtakunapa reyninkunamanpas.

²⁵ Upyachirqanitaqmi Zimripa, Elampa hinaspa Mediapa reyninkunamanpas;

²⁶ norte lawpi, karupi kaq, hichpapi kaq reykunamanpas. Kay pachapi llapallan munaychakuqkunamanmi upyachirqani. Paykunapa qepantañataqmi Babilonia nacionpa reynin upyanqa.

²⁷ Israelpa yupaychasqan Tukuy Atiyniyuq Tayta Diosmi paykunaman kaynata ninaypaq niwarqa: Upyaychik macharuspa kutichinaykichikkama, pampaman wichiykuspa manaña hatariy atinaykichikkama, contraykichikpi guerrata kacharimusqayrayku.

²⁸ Upyanankupaq vasota mana chaskiyta munaptinkuqa, ñoqa Tukuy Atiyniyuq Tayta Diospa nisqaytam kaynata ninki: Munay mana munaymi upyankichik.

²⁹ Sapaqchakusqay llaqtamanmi castigoy kachariyta qallaykusaq, ¿chaychu qamkunañataq mana castigasqa qeparuwaqchik? castigoymantaqa manam lluptinkichikchu. Kay pachapi llapallan nacionkunamanmi guerrata kacharimusaq. Ñoqa Tukuy Atiyniyuq Tayta Diosmi chaynata nini.

³⁰ Jeremías, paykunapa contranpiyá kay nisqaykunata kaynata willamuy: Altomantam Tayta Dios qaparimun, hanaq pachapi tiyananmantam qaparimun. Runankunapa contranpim qaparin, uvas saruq hinaraqmi kay pachapi runakunapa contranpi qaparin.

³¹ Kay pachapa cantonkamaraqmi qapariynin uyarikunqa, Tayta Diosmi nacionkunata juicioman qayanqa; llapallan runakunamantam cuentata mañanqa, mana allin ruwaqkunatam guerrapi wañuchinqa, Tukuy Atiyniyuq Tayta Diosmi chaynata nin.

³² Tukuy Atiyniyuq Tayta Diosmi kaynata nin: Sasachakuyqa llaqtan-llaqtanmi qatinakamunqa, sinchi wayra hinaraqmi kay pachapa cantonmanta hatarimunqa.

³³ Chay punchawpi Tayta Diospa wañuchisqankunam kay pachapa cantonmanta huknin cantonkama wischurayanqaku, paykunamantaqa manam pipas aya takita takinqakuchu, ayankutapas manam pipas hoqarinqakuchu nitaqmi pampanqakuchu, paykunaqa hatun ispay hinam pampapi wischurayanqaku.

³⁴ Michiqkuna nanaywan qaparispa waqaychik, llaqtay michiqkuna allpapi kuchpaykachakuychik, Nakasqa kanaykichik punchawmi chayaramun, poqosqa carnerokuna hinam nakachikunkichik; kuyayllapaq vaso hinam pakikunkichik.

³⁵ Michiqkunaqa manam mayqanpas ayqeyta atinqachu, llaqtayta michiqkunaqa manam mayqanpas lluptiyta atinqachu.

³⁶ Michiqkunam qaparkachanku, llaqtay michiqkunam nanaywan qaparinku, michinanku pastokunatam Tayta Dios chinkarachin.

³⁷ Tayta Diosmi anchata piñakuruspan kuyayllapaq pastokunata chinkarachin.

³⁸ Machayninmanta lloqsimuq león hinaraqmi lloqsiramun, paykunapa llaqtankum purmasqa qeparun, Tayta Diospa piñakuyninmi nina hinaraq ratarirun, manchakuypaq guerratam paykunaman kachaykamun.