Jeremías 22 - CHUYA QELLQA La Biblia en Quechua de Ayacucho 2012

Judá nacionpi reykunapa contranpi profetizasqanmanta

¹ Tayta Diosmi kaynata nin: Reypa palacionman rispayki kaynata nimuy.

² Davidpa trononmanta Judá nacionpi munaychakuq rey, kamachikuqkuna, reypa serviqninkuna, llaqta runakuna, Tayta Diospa nisqanta uyariychik.

³ Tayta Diosmi kaynata nin: Runakunapaq allin arreglota ruwaychik, ñakariqkunata ñakarichiqninmanta libraychik; huklaw llaqtayuqkunatapas, mana tayta-mamayuqkunatapas, viudatapas ama ñakarichiychikchu nitaq uchuy-chaychikchu. Inocente runatapas aman wañuchiychikchu.

⁴ Sichum kay nisqaykunata kasukuptikichikqa, kanqam rey Davidpa trononmanta munaychakuq reykuna, paykunam carretakunapi chaynataq caballokunapi sillada kay palaciopa punkunta yaykunqaku, kamachikuqkunawan hinaspa llapa runankunawan kuska.

⁵ Kay nisqaykunata mana kasukuptikichikqa, kay palaciom tuñichisqa kanqa. Ñoqa Tayta Diosmi chaynata nini.

⁶ Judá nacionpi reypa palacionmantam Tayta Dios kaynata nin: Qamqa Galaad allpa hinam ñoqapaq kanki, Líbano orqopa puntan hinam kanki; ichaqa juranim, cheqaptapunim chunnichisqayki, mana runayuq llaqtatañam ruwasqayki.

⁷ Tuñichisunaykipaqmi armasqa runakunata kachamusaq, paykunam kuyayllapaq cedroykikunata kuchunqaku, hinaspam ninaman wischunqaku.

⁸ Achka nacionkunamanta hamuq runakunam kay llaqtapa hichpanta pasaspa ninakunqaku: ¿Imanasqataq kay hatun llaqtata Tayta Dios kaynata ruwarun? nispanku.

⁹ Chaymi contestanqaku: Kaynataqa ruwarun yupaychasqanku Tayta Dioswan pacto ruwasqankuta saqespa idolokunataña yupaychasqankuraykum, nispanku.

Rey Salumpa contranpi Jeremiaspa profetizasqanmanta

¹⁰ Rey Josiaspa wañusqanmantaqa amaña waqaychikchu, waqaychikqa rey Salum preso apasqa kasqanmantayá, payqa manañam haykapipas kutimunqañachu, nacesqan allpatapas manañam rikunqañachu.

¹¹ Taytan Josiaspa rantinpi Judá nacionpi munaychakuq rey Salummantam Tayta Dios kaynata nin: Salummi kaymanta preso apasqa kanqa, manañam haykapipas kutimunqañachu.

¹² Payqa presota apasqanku llaqtapi wañuspam kay naciontaqa manaña haykapas rikunqachu, nispa.

Rey Joacimpa contranpi Jeremiaspa profetizasqanmanta

¹³ ¡Ay, imaynaraq kanki! mana allinkunata ruwasqaykipa chaninwan, palacioykikunatawan hatun wasikikunata hatarichikuspa, runamasinkunawanpas mana pagollapaq llamkachikuq runa.

¹⁴ Qamqa ninkiraqmi: Hatun palaciotam ruwarachikusaq, altosninpi hatu-hatun corredorniyuqta, hatun ventanayuqkunata; perqankunatapas Cedro tablakunawanmi tableachisaq, hinaspaymi pukawan pintachisaq, nisparaq.

¹⁵ ¿Cedro tablamanta ruwasqa wasipi yachaytachu rey kaypaq hapinki? Taytaykiqa tomaspapas mikuspapas allin arreglotawan cheqap kaqtam ruwarqa, chayraykum ima ruwasqanpas allin lloqsirqa.

¹⁶ Payqa wakchakunatawan ñakarichisqakunatam valechirqa, chayraykum ima ruwasqanpas allin lloqsirqa. Payqa sumaqtam reqsiwarqa, ñoqa Tayta Diosmi chaynata nini.

¹⁷ Qanmi ichaqa mana allinkunata ruwaspa apuyaruyllapi richkanki; inocente runakunatam wañuchinki, llaqtaykitapas maqa-maqarispam llamkachikunki.

¹⁸ Chayraykum Josiaspa churinmanta otaq Judá nacionpa reynin Joacimmanta Tayta Dios kaynata nin: Wañuptikiqa manam pipas waqanqachu, wañuruptikipas manam pipas waqaspaqa ninqachu: ¡Ay, wawqelláy! ¡Ay, panilláy! ¡Ay, señorlláy! ¡Ay reynilláy! nispaqa.

¹⁹ Aysaspankum Jerusalén llaqtamanta hawaman wischunqaku, asnota hinam pampanqaku.

Jerusalén llaqtapa contranpi profetizasqanmanta

²⁰ Jerusalén llaqta, Líbano orqoman qespispa qayakuy, Basán law orqokunapi qapariy, Abarim law orqokunaman quespispa qayaykachakuy, waynaykikunam lliw vencerachikun.

²¹ Tukuy imayuq kaspa hawka kachkaptikim rimapayarqayki, ichaqa manam uyariwarqankichu. Qamqa warma kasqaykimantapunim ima nisqaytapas mana kasuwarqankichu.

²² Kamachiqnikikunam wayrapa apasqan kanqaku, waynaykikunam preso apasqa kanqaku; tukuy mana allinkuna ruwasqaykimantam penqaypi tarikuspa uchuychasqa kanki.

²³ Libanomanta apamusqa cedrokunapa chawpinpim hawkallaña qesaykipi yachachkanki; ichaqa maynataraq qaparkachanki wachakuq warmita hina nanay hapisuptiki.

Rey Jeconiaspa contranpi profetizasqanmanta

²⁴ Judá nacionpa reynin Joacimpa churin Jeconiastam Tayta Dios kaynata nin: Alleq makiypi anillo hinaña kaptikipas chaymanta hurqoruspaymi wikaparuykiman

²⁵ wañuchiy munasuqnikiman qoykunaypaq. Manchakusqayki Babiloniapa reynin Nabucodonosorman hinaspa Caldea runakunamanmi qamtaqa qoykusqayki.

²⁶ Qamtapas mamaykitapas mana nacesqaykichik nacionmanmi qarqosqaykichik, hinaptinmi chaypi wañumunkichik.

²⁷ Israelman kutimuyta munaspapas manañam atinkichikñachu, nispa.

Jeremiaspa rimarisqankunamanta

²⁸ Jeconiasqa ¿manaña pipapas munanan pakisqa aysaku hinachu rikurirun? ¿Mana imapaq valeq kallana hinachu rikurirun? ¿Imanasqataq paytapas chaynataq churinkunatapas mana reqsisqanku nacionman qarqorunku?

²⁹ ¡Kay pachapi llapallan runakuna, Tayta Diospa nisqanta uyariychik!

³⁰ Tayta Diosmi kaynata nin: Kay runamanta libropi qellqaychik, qolluq runamanta hina qellqaychik, kawsayninpi mana imapas allin ruwaq kasqanmanta qellqaychik. Judá nacionpiqa, Jeconiaspa mirayninmantaqa manañam rey Davidpa trononpiqa munaychakuqqa kanqañachu, nispa.