Jeremías 20 - CHUYA QELLQA La Biblia en Quechua de Ayacucho 2012

Pasurpa contranpi Jeremiaspa rimasqanmanta

¹ Tayta Diospa templonpi kamachikuq Imerpa churin sacerdote Pasurñataqmi, Jeremiaspa profetizasqanta uyariruspan,

² kamachikurqa profeta Jeremiasta azotespanku Tayta Diospa templonpa hichpanpi Benjamín sutiyuq alto punkupi kaq cepopi churamunankupaq.

³ Paqarinnintin punchawmi, Jeremiasta cepomanta Pasur hurqorachimurqa, hinaptinmi Pasurta Jeremías nirqa: Tayta Diosqa manañam Pasurwanñachu sutichasunki, aswanqa Magor-misabibwanñam.

⁴ Tayta Diosmi kaynata nin: Qamtaqa kikikipapas chaynataq llapallanamistadnikikunapapas mancharikunantañam ruwasqayki. Qawachkaptikim amistadnikikunatapas enemigoykikuna guerrapi wañuchinqa. Judá nacionpi runakunatapas Babilonia nacionpa reyninmanmi qoykusaq, paymi wakiqta wañuchinqa, wakiqtañataqmi presota Babiloniaman apanqa.

⁵ Kay llaqtapa qori-qollqentapas, tukuy huñusqankutapas, tukuy kuyayllapaq kapuqninkunatapas, Judá nación reykunapa llapa qori-qollqentapas enemigoykichikmanmi qoykusaq, hinaptinmi Babiloniaman apanqa.

⁶ Pasur, qampas wasikipi llapallan yachaqkunapiwanmi Babiloniaman preso apasqa kanki. Chaypim wañuspa pampasqa kanki, chaypitaqmi profeta tukuspa rimapayasqayki amistadnikikunapas pampakunqaku, nispa.

Tayta Diosman Jeremiaspa quejakusqanmanta

⁷ Dios Taytalláy, engañaypaqmi qamqa engañaruwanki, munayniyuq kasqaykiraykum venceruwanki. Tukuy tiempo asipayanankum kani, lliwmi ñoqamanta burlakunku.

⁸ Sapa kuti rimaspaymi qaparini: ¡Sasachakuymi hamuchkanña! ¡Tuñichisqa kaymi chayaramunña! nispay. Palabraykita willasqayraykum tukuy tiempo insultawaspa asipayawanku.

⁹ Chayraykum nirqani: Tayta Diostaqa qonqarusaqña, sutintapas amaña rimasaqñachu, nispay. Ichaqa palabraykim nina hinaraq sonqoypi ruparirqa, nina hinaraqmi tulluykunatapas ruparirqa. Amaña rimasaqñachu nispam nirqani, ichaqa manam upallayta atinichu.

¹⁰ Llapa runakunapa rimakachasqankutam uyarichkani, paykunam nichkanku: Tukuy hinastinpim manchakuyllaña kachkan, hakuchik denunciamusunchik, nispam rimanakuchkanku. Llapa amistadniykunam imamanpas wichiykunayta suyachkanku, ichapas engañarachikunman venceruspa paymanta vengakurunanchikpaq, nispam nichkanku.

¹¹ Dios Taytalláy, chaywanpas qamqa ñoqawanmi kachkanki, qari-qari soldado hinaraqmi ñoqawan kachkanki, chayraykum qatikachawaqniykunaqa urmarunqaku, manam venceyta atiwanqakuchu, imapas ruwasqanku mana allin lloqsiptinmi hatun penqaypi tarikunqaku, mana haykapipas qonqay atinankukamam penqaypi kanqaku.

¹² Tukuy Atiyniyuq Dios Taytalláy allin ruwaq runakunapa sonqontam reqsinki, runapa yuyaymanaynintam reqsinki, paykunamanta vengakusqaykita qawachiway, qanmanmi kay sasachakuyniykunata willakamuyki.

¹³ Tayta Diospaqyá takiychik, Tayta Diostayá yupaychaychik, payqa mana allin ruwaqkunapa makinmantam wakchakunata salvaykun.

¹⁴ Nacesqay punchawqa ñakasqayá kachun, mamaypa wachakuwasqan punchawqa amayá bendecisqachu kachun.

¹⁵ Kusikuyllawanña nacesqaymanta taytayman willaqpas ñakasqayá kachun, “qarim nacerapusunki” nispa willaqpas ñakasqayá kachun.

¹⁶ Chayna runaqa, Tayta Diospa chunnichisqan llaqtakuna hinayá kachun, mana llakipayaspa tuñichisqa llaqta hinayá kachun, achikyamuqtayá nanaymanta qapariyta uyarichun, chawpi punchawpiyá guerrapi qapariyta uyarichun.

¹⁷ Mamaypa wiksallanpi Dios wañurachiwanman karqa, mamaypa wiksanchá sepulturay kanman karqa, chaynapiqa manachá haykapipas naceymanchu karqa.

¹⁸ ¿Imapaqtaq mamay wachakuwarqa nanaytawan ñakariyllata qawaspay penqaypi kaspa wañunaypaq?