Jeremías 13 - CHUYA QELLQA La Biblia en Quechua de Ayacucho 2012

Weqaw watakuwan rikchanachisqanmanta

¹ Tayta Diosmi kaynata niwarqa: Linomanta chumpita rantiramuspaykim weqawnikiman watakunki, ichaqa amam yakuman challpunkichu, nispa.

² Chaymi Tayta Diospa niwasqanman hina, chumpita rantiramuspay weqawniyta watakururqani.

³ Kaqllamantam Tayta Dios rimapayawaspan niwarqa:

⁴ Rantiruspa weqawniki watakusqayki chumpita apaspa Eufrates mayuman riy, chaypi huk qaqapa raqranpi pakaramuy, nispa.

⁵ Rispaymi Tayta Diospa kamachiwasqanman hina Eufrates mayupa hichpanpi pakaramurqani.

⁶ Punchawkuna pasaruptinmi Tayta Dios niwarqa: Eufrates mayuman kutispa pakamusqayki chumpita apamuy, nispa.

⁷ Eufrates mayuman chayaruspaymi chay chumpita maymi pakasqaymanta hurqomurqani, ichaqa ismuruspam manaña imapaqpas valesqañachu.

⁸ Chaymi Tayta Dios kaqmanta niwarqa:

⁹ Chay ismusqa chumpita hinam Judá runakunapa hinaspa Jerusalén runakunapa hatun tukuq kayninta ismuchisaq.

¹⁰ Kay mana allin runakunaqa kamachikuyniykunata mana kasukuspam sonqonkupa munasqanman hina kawsachkanku. Idolokunaman qokuruspankum chaykunataña qonqoranpa hatunchachkanku. Chay ismusqa chumpi hinam paykunaqa mana imapaq valeq rikurirunku.

¹¹ Imaynam huk runa chumpita weqawninman watakurun, chaynatam Israel runakunatawan Judá runakunatapas ñoqaman watasqata hatallirqani, chaynapi runaykunaña kaspanku wakin runakunaman sutiyta reqsichinankupaq, yupaychawaspanku hatunchawanankupaq. Ichaqa manam kasuwarqakuchu. Ñoqa Tayta Diosmi chaynata nini.

Vino huntayuq urpukunaman rikchanachiymanta

¹² Paykunamanqa nimunkitaqmi kaytapas; ñoqa Tayta Diosmi kaynata nini: Llapa urpukunam vinowan huntasqa kanqa, nispa. Paykunañataqmi nisunki: ¿Ñoqaykuqa manachum sumaqta yachaniku urpukunaqa vinowan huntasqa kananta? nispanku.

¹³ Chaymi qamñataq ninki: Ñoqa Tayta Diosmi kaynata nini: Kay nacionpi yachaqkunatam pasaypaqta sinkarachisaq. Sinkachisaqtaqmi rey Davidpa mirayninmanta kamachikuqkunatapas, sacerdotekunatapas, profetakunatapas hinaspa Jerusalén llaqtapi yachaqkunatapas.

¹⁴ Hinaspaymi urpukunata takanachispa pakichkaq hina taytantawan churinta takanachisaq. Manam pampachasaqchu, nitaqmi llakipayasaqchu, paykunata wañuchispayqa manam kuyapayasaqchu, nispa. Ñoqa Tayta Diosmi chaynata nini.

Judá nación preso apasqa kananmanta

¹⁵ Israelpa mirayninkuna ama hatun tukuychikchu, Tayta Diosmi rimarin, sumaqta uyariychik.

¹⁶ Tayta Diosta yupaychaychik manaraq tutayayta chayachimuchkaptin, tutayaq orqokunapi manaraq mitkaruchkaspa; suyasqaykichik achkitapas manaraq pasaypaq tutayayman tikraruchkaptin.

¹⁷ Mana kasukuptikichikqa hatun tukuq kasqaykichikmantam mana pipa rikusqanta waqasaq; Tayta Diospa runankuna preso apasqa kasqankumantam waqasaq, weqeypas yaku hinañam kallpanqa.

Reyman Tayta Dios willachisqanmanta

¹⁸ Reytawan maman reinata kaynata nimuy: Uchuychakuspa pampapi tiyaychik, umaykichikta adornaq coronam pampaman wichirun.

¹⁹ Neguev lawpi llaqtakunatam enemigokuna muyurun, manam pipas yaykunchu nitaq lloqsimunchu. Judá runakunatam presocharuspa lliwta aparunku.

²⁰ Jerusalenpi yachaqkuna, norte lawta qawariychik, enemigoykichikmi hamuchkan. ¿Maytaq michinaykipaq saqesqay ovejakuna? ¿Maytaq hatunchakunayki ovejakuna?

²¹ Jerusalén llaqta, ¿imaninkitaq yachachisqayki runakuna kamachiqniki rikuriruptin? Wachakuq warmipa nanaynin hinaraqmi qanmanpas nanay hamusunki.

²² Sichum sonqoykipi ninki: ¿Imanasqataq kaykuna chayaramuwan? nispa. Tukuy chaykunaqa mana allinkuna ruwasqaykiraykum chayaramusunki; chayraykum walikita qempispa abusasurqanki.

²³ ¿Yaqachu yana runa yana kayninmanta tikrakurunman? ¿Yaqachu leopardo atinman muru pelon cambiaruyta? Chaynam huchaman qokuruq runapas, allinkuna ruwaytaqa mana atinmanchu.

²⁴ Chayraykum qamkunataqa cheqerachisqaykichik, imaynam chunniqpi wayrawan qopata apachichkaq hina.

²⁵ Chaymi qamkunapa destinoykichik kanqa, ñoqata qonqaruwaspaykichik idolokunamanña hapipakusqaykichikmanta. Ñoqa Tayta Diosmi chaynata nini.

²⁶ Chaynam ñoqapas walikita uyaykikama qempiruspay, penqaynikita qawachisaq.

²⁷ Rikurqanim waqllikusqaykitapas, yegua hina weqeqeqespa hukwan-hukwan qanrakusqaykitapas, rikurqanitaqmi chuchumika warmi hina, moqokunapipas pampakunapipas millakuypaq kaqkuna ruwasqaykitapas. ¡Ay, Jerusalén llaqta! ¿Haykapikamataq mana chuyanchakunkichu? nispa.