Isaías 64 - CHUYA QELLQA La Biblia en Quechua de Ayacucho 2012

¹ Amalaya cielokunata llikispa uraykamuptiki, orqokunapas qayllaykipi katkatataspa chullurinmanraq,

² amalaya kichkakunata ruparuq nina hinaraq, yakuta timpuchiq nina hinaraq, hinaptinqa enemigoykikunachá sutikita reqsinmanku, nacionkunapas qayllaykipichá katkatatanmanku.

³ Mana suyasqayku manchakuypaq kaqkunata ruwaspayki kay pachaman uraykamuptikim, orqokunapas qayllaykipi katkatatarqa.

⁴ Manam pipas uyarirqachu, ñawpaqmantapas manam pipas qanmanta sapaq Diostaqa rikurqachu; qamllam hapipakuqninkunapaq allin ruwaq Diosqa kanki.

⁵ Qamqa kusikuywan allinkuna ruwaqkunamanmi, munasqaykiman hina kawsaqkunaman taripaykunki. Ichaqa unay watakunam huchallapi kawsaspayku piñachirqaykiku, chaynaqa ¿imaynataq salvasqa kaymanku?

⁶ Ñoqaykuqa llapallaykum millakuypaqña kachkaniku, allinkuna ruwasqaykupas millakuypaq qacha latapa hinam kachkan. Qawiruspa wichisqa llaqekuna hinam kachkaniku, mana allinkuna ruwasqaykupa apasqanmi kachkaniku.

⁷ Manam pipas qayakamusuqnikiqa kanñachu, hapipakamusuqnikipas manam kanñachu. Qanmi ñoqaykumanta karunchakurunki, mana allin ruwasqaykupa munaychakusqantam saqeruwankiku.

⁸ Chaywanpas Diosllayku, qamqa Taytaykum kanki, ñoqaykuqa mitu hinam makikipi kaniku. Qamñataqmi sumaq allpa mankata hina ruwawankiku, llapallaykum qampa ruwasqayki kaniku.

⁹ Dios Taytallayku, amayá llumpaytaqa piñakuruychu, mana allin ruwasqaykutapas amañayá wiñaypaqqa yuyaychu. ¡Qawarillawayku, ñoqaykuqa runaykikunam kaniku!

¹⁰ Akllakusqayki llaqtaykikunam chunnichkan, Sión llaqtapas chunnirunñam, Jerusalén llaqtapas purmarunñam.

¹¹ Qampaq sapaqchasqa kuyayllapaq temploykum kañasqa kachkan, ñawpaq taytakupa yupaychasunayki suma-sumaq temploykum, kañasqa kachkan. Llapallan kuyasqayku kaqkunapas lliwmi purmachkan.

¹² Diosnillayku, chayna kachkaptinqa, ¿manachum imallatapas ruwanki? ¿Upallallachum kakunki? ¿Llumpa-llumpaytachu ñakarichiwankiku? nispa.