Isaías 62 - CHUYA QELLQA La Biblia en Quechua de Ayacucho 2012

¹ Sión llaqtata kuyasqayraykum mana upallasaqchu, Jerusalenta kuyasqayraykum mana samaykusaqchu, tutapay inti hina allin ruwaykuna kancharinankama, ratachkaq mechero hina salvasqa kayniki achkrinankama.

² Nacionkunam allin ruwaq kasqaykita qawanqaku, llapa reykunapas reqsisqa kasqaykitam rikunqaku; Tayta Diospa musoq suti qosusqaykiwan sutichasqam kanki.

³ Tayta Diospa makinpim suma-sumaq corona hina kanki, yupaychasqayki Diospa makinpim reypa coronan hina kanki.

⁴ Manañam pipas “Saqerusqa llaqta” nispa sutichasunkiñachu, allpaykitapas manam “Purmachisqa allpa” ninqakuñachu. Aswanqa “Diospa kuyasqan” nispam sutichasunki, “Diospa esposan” nispam sutichasunki. Chaynataqa sutichasunki Tayta Diospa kuyakuynin qanwan kasqanraykum, allpaykipaqpas paymi qosan hina kanqa.

⁵ Imaynam huk joven huk sipasta casaran chaynam qamtapas Dios casarasunki; imaynam huk esposo esposanwan kusikun chaynam Diosnikipas qanwan kusikunqa.

⁶ Jerusalén llaqta, murallaykipa hawanpim cuidasuqnikikunata churaruni, paykunaqa tuta punchawmi mana upallaykuspa ninqaku: “Tayta Diosta qayakuqkuna ama upallaychikchu,

⁷ Jerusalén llaqtata hatarichinankamayá Tayta Diostaqa ama samaykachiychikchu; Jerusalén llaqta tukuy kay pachapi alabasqa kanankamayá ama saqeychikchu”, nispa.

⁸ Tayta Diosmi llumpay atiyninrayku juraspan kaynata nin: Trigoykitapas manañam enemigoykikunamanqa qosaqñachu, llamkaspa vino ruwasqaykitapas huklaw llaqtayuqkunaqa manañam tomanqakuchu.

⁹ Aswanqa pim cosechaqmi mikunqa, hinaspam Tayta Diosta yupaychanqa; uvasta cosechaqkunam vinotapas santuarioypa pationkunapi tomanqa.

¹⁰ Lloqsiychik, lloqsiychik punkunkunata, llaqtaypaq ñanta allichaychik, ñanta sumaqta kichaychik, ruminkunata wischuychik. Llapallan nacionkuna qawananpaq banderata sayachiychik.

¹¹ Tayta Diosmi kay pachapa patankama kayta uyarichin: “Sión llaqtaman willaychik Salvaqnin chayamusqanta, Diosmi runankunata pusamuchkan, llamkasqanpa pagontam apamuchkan”, nispa.

¹² Israeltam sutichanqaku: “Tayta Diospa librasqan chuya llaqta” nispanku. Jerusalentañataqmi sutichanqaku: “Sumaq waqaychasqa munayllapaqña llaqta”, nispanku.