Isaías 57 - CHUYA QELLQA La Biblia en Quechua de Ayacucho 2012

¹ Allin kawsakuq runakunam wañunku, manam pitapas imapas qokunchu. Kuyapayakuq runakunam chinkanku, ichaqa manam pipas musyanchu sasachakuymanta librasqaña kasqankuta.

² Paykunaqa hawka kaymanmi yaykurunku, sepulturankupim hawkaña samarunku.

Ídolo yupaychaqkunata sentenciasqanmanta

³ Tayta Diosmi kaynata nin: Brujakunapa wawankuna asuykamuychik, chuchumikapa mirayninkuna asuykamuychik.

⁴ ¿Pimantataq asikurqankichik? ¿Pitataq simikichikwan hatunmanta kutipakurqankichik? ¿Pitataq qallupayarqankichik? Qamkunaqa mana kasukuq llulla miraykunam kankichik.

⁵ ¿Manachum encina sachakunapa, llaqesapa sachakunapa ukunpi huchapakunkichik? Wawakunatam wayqokunapi, uchkukunapi idolokunapaq wañuchipunkichik.

⁶ Qamkunaqa wayqokunapi lluchka rumikuna yupaychaytam munankichik, chay rumikunapaqmi vinota tallipunkichik, kawsaykunamanta ofrendakunatam kañapunkichik. ¿Chaykunata ruwachkaptikichikchu qamkunata mana castigaykichikman karqa?

⁷ Sayay-sayay alto orqopa puntanpim camaykita churarqanki, chay orqokunamanmi ofrenda kañaq seqarqanki

⁸ Wasi punkuykipa qepanpim millakuypaq idolokunata churarqanki. Ñoqata qepanchawaspaykim pachaykikunata chustukuspa hatun camapi hukwan puñukurqanki. Huchapakusqayki qarikunawanmi chay idolokunapa qayllanpi contratota ruwarqanki.

⁹ Moloc idolomanmi aceite aparisqa rirqanki, perfumekunatam payman aparqanki; karukunamanraqmi comisionta kacharqanki, wañuqkunapa kasqanmanraqmi uraykachirqanki.

¹⁰ Purikusqaykipi llumpayta pisiparuchkaspapas, manam “chaykamallaña kachun” nirqankichu; aswanraqmi kallpanchakuspa mana allin ruwaynikita mana saqenkichu.

¹¹ ¿Pita manchakuspaykitaq ñoqapi manaña iñispa karunchakurunki? ¿Unayña mana rimarisqayraykuchu manaña kaqpaqpas hapiwanki?

¹² Imaynam kawsasqaykitam willakachakusaq, chay ruwasqaykikunaqa manam imapipas yanapasunkichu.

¹³ Maynataña qayakuptikipas millakuypaq idoloykikunaqa manam librasunkichu, chaykunataqa sinchi wayram aparuspa chinkarachinqa. Ñoqapi hapipakuqkunam ichaqa herencianpaq allpata chaskinqaku, ñoqapaq sapaqchasqa orqopim yachanqaku.

Wanakuqkunata consuelasqanmanta

¹⁴ Tayta Diosmi nin: Ñanta kichaspa allichaychik, llaqtay pasananpaq ñanpi mitkachikuqkunata wischuychik, nispa.

¹⁵ Wiña-wiñaypaq kawsakuq Diosmi, hatu-hatun Chuya Diosmi kaynata nin: Ñoqaqa alto-altopim, chuyay-chuyay sitiopim yachani, wanakuspa uchuychakuqkunawanmi yachani, hinaspaymi paykunata kallpanchani.

¹⁶ Manam wiñaypaqchu llaqtaywan churanakusaq, nitaqmi wiñaypaqchu paykunapaq piñakusaq, mana chayqa llapa runakunawan lliw unanchasqaykunam qayllaypi hukmanyanmanku.

¹⁷ Engañaspa mana allinkunata ruwasqanraykum piñakuspay Israelta ñakarichirqani, piñakuyniypim paymanta pakakurqani; aswanqa paymi mana kasukuq rikurirurqa, munasqallan ruwaymanmi qokururqa.

¹⁸ Imaynam kawsasqantam qawarqani, chaywanpas hampispaymi payta michisaq, paytaqa ñoqam hawkayachisaq, llakinkunamantam consuelasaq.

¹⁹ Ñoqa Tayta Diosmi llapallankuta rimachisaq: “Karupi kaqkunapas, hichpapi kaqkunapas hawkallayá kachunku”, nispa. Llaqtaytaqa ñoqam hampisaq.

²⁰ Mana allin ruwaq runakunam ichaqa sinchi wayrapa pukusqan lamar qocha hina, manam hawkalla kaytaqa atinkuchu, yakunkunapas mitutawan qachankunata wischumuq hinaraqmi.

²¹ Mana allin runakunapaqqa manam haykapipas hawkayay kanchu. Ñoqa Tayta Diosmi chaynata nini.