Isaías 50 - CHUYA QELLQA La Biblia en Quechua de Ayacucho 2012

¹ Tayta Diosmi kaynata nin: ¿Maypitaq kachkan mamaykichikwan rakinakuspay acta ruwanakusqay? ¿Pikunawantaq manu karqani qamkunata rantikunaypaq? Huchaykichikraykum rantikusqa karqankichik, mana kasukuq kasqaykichikraykum mamaykichiktapas qarqorurqani.

² ¿Imanasqataq hamuspayqa mana pitapas tarirqanichu? ¿Imanasqataq qayakuptiypas mana pipas rimarirqachu? ¿Makiychu pisiparun qamkunata manaña libray atinaypaq? ¿Atiyniychu tukurun qamkunata manaña salvanaypaq? Kamachispallaymi lamar qochata chakichini, kamachispallaymi mayukunata chakichini, challwankunapas yakumantam wañuruspa ismurunku.

³ Hanaq pachatam tutayaywan pachachini, llakikuy pachawanmi qataykuni.

Tayta Diosman hapipakunamanta

⁴ Tayta Diosmi yachachiwarqa, pisipasqakunata sumaq rimaykunawan kallpanchanaypaq, sapa tutapaytam rinrillayta kichaykun, imam rimasqanta allinta uyarinaypaq.

⁵ Tayta Diosmi kasukuq kanaypaq rinrillayta kichaykun, kasukuspaymi mana qepaman kutirqanichu.

⁶ Wasaytam azoteqkunaman qorqani, barbayta chutapaptinkupas manam kutichikurqanichu, cheqniwaspa toqawaqniykunamantapas manam uyayta asurichirqanichu.

⁷ Tayta Diosmi yanapaqniyqa, imataña niwaptinkupas manam manchakusaqchu; chaymi qaqa hina sayani, manam penqaypiqa tarikusaqchu.

⁸ Salvaqniyqa hichpallaypim kachkan, ¿Pitaq ñoqawan churanakuyta munanman? Chaynaqa, juezman kuskanchik hakuchik, ¿pitaq tumpawayta atinman? Hamuspanyá uyaypi niwachun.

⁹ Tayta Diosmi yanapawaqniyqa. ¿Pitaq huchayuq kasqayta niykuwanman? Enemigoykunaqa pacha hinam mawkayanqaku, puyupa tukusqan pacha hinam wichirirunqaku.

¹⁰ Tayta Diosllata kasukuqkuna, serviqninpa willakusqanta uyariqkuna, tutayaypi purispa achkita mana tariy atiqkuna, Tayta Diosllaman hapipakuychik, Diosllaykichikman hapipakuychik.

¹¹ Ninata ratachiqkuna, chay ninawan achkikuqkuna: Chay ninapa achkiyninpi puriychik. Ñoqa Diosmantam kaykuna hamusunkichik, ñakariypa pampasqanmi kankichik.