Isaías 5 - CHUYA QELLQA La Biblia en Quechua de Ayacucho 2012

Judá nacionta uvas huertawan rikchanachisqanmanta

¹ Kunanmi kuyaqniypa uvas huertanmanta takita takisaq. Kuyaqniypam uvas huertan karqa, tukuy imapa qespinan waqtapim huertan karqa.

² Rumicharuspanmi barbecharqa, miski ruruq uvaspa estacantam plantarqa. Cuidananpaqmi chakrapa chawpinpi chukllata ruwarqa, uvasta sarunapaqmi pozota ruwarqa. Miski uvasta rurunantam payqa suyarqa, ichaqa puchqo uvasllatam cosecharurqa.

³ Chaynaqa, Jerusalenpi yachaqkuna, Judá nacionpi runakuna niwaychik: ¿Pitaq kayna kananpaq pantarun, uvas plantaychu icha ñoqachu?

⁴ ¿Imakunataraqtaq ruwayman karqa uvas huertaypaq? ¿Icha imaraqmi faltawan ruwanaypaq? Miskita rurunantam ñoqaqa suyarqani, ¿imaynanpimá puchqollatañaqa rururun?

⁵ Chaynaqa, kunanmi qamkunaman, imatam kay huertaywan ruwanayta nisqaykichik: Llapa rumi perqanta paskaruptiymi purmarachinqaku, perqankunata lliw tuñirachiptiymi saruparunqaku.

⁶ Purmarachispaymi saqerusaq, manaña mallkisqa, manaña qorasqam kanqa, kichkakunapa qorakunapa huntaykusqanñam kanqa, puyukunatapas mana paramunanpaqmi kamachisaq.

⁷ Tukuy Atiyniyuq Tayta Diospa kuyayllapaq uvas huertanqa Israel runakunawan Judá nacionpi yachaqkunam. Payqa kamachikuynin kasukunankutam munarqa, aswanqa wañuchinakuyllatam tarirun. Paykunataqa allinkuna ruwanankutam munarqa, ichaqa ñakariqkunapa qapariyllantam uyarirun.

Mana allin ruwaqkuna castigasqa kananmanta

⁸ ¡Imallapiraq rikukunkichik, wasikunata chakrakunata rantiypaq-rantiqkuna! ¿Qamkunallachu kay allpapi kawsankichik?

⁹ Tukuy Atiyniyuq Tayta Diosmi cheqaptapuni niwarqa: “Achkallaña wasikunam tuñichisqa kanqa, hatunnin suma-sumaq wasikunam mana runayuq chunninqa.

¹⁰ Chunka yugadayuq chakramantam huk urpu vinollataña hurqonqaku, chunka saco muhumantam chulla sacollataña cosechanqaku”, nispa.

¹¹ ¡Ay, imaynaraq kankichik, tutapayta hatarispa upyakuqkuna! ¡Ay, imaynaraq kankichik, sinchi tutakama machakuqkuna!

¹² Convido ruwasqaykichikpipas arpakunata, bombokunata, qenakunatam tocankichik, vinopas puchu-puchum; Tayta Diospa ruwasqantam ichaqa mana qawarinkichikpaschu, Diospa tukuy ima ruwasqantaqa manam kaqpaqpas hapinkichikchu.

¹³ Chaynaqa, mana yachayniyuq kasqanraykum llaqtayqa huklaw nacionman presochasqa rinqa. Paykunamanta reqsisqa runakunam yarqaymanta wañunqaku, llapallankum yakumanta chakinqaku.

¹⁴ Chayraykum wañuqkunapa kasqan sitiopas yarqaymanta hinaraq simintapas kicharinqa, llaqtatawan kamachikuqkunatapas millpurunanpaq, fiestakunapi aychanku kusichiyllapi kaqkunatapas millpurunanpaq.

¹⁵ Chaynatam runakunata uchuychanqa, hatun tukuqkunatam kumuykachachinqa.

¹⁶ Tukuy Atiyniyuq Tayta Diosmi ichaqa allin arreglo ruwasqanmanta hatunchasqa kanqa. Chuya Diosmi allinkuna ruwasqanwan chuya kasqanta reqsichikunqa.

¹⁷ Apukunapa purmasqa chakrankunapipas purunpi hinañam cabrakunawan ovejakunallaña mikunqaku.

¹⁸ ¡Ay, imaynaraq kanqaku! Sakrillawan mana allin ruwayta apamuqkuna, carretata hinaraq huchankuta aysaqkuna.

¹⁹ Paykunaqa ninkuraqmi: Diosqa apurawmanñayá ruwanankunata tukuchun qawananchikpaq, Israelpa Chuya Diosninqa tanteasqankunatayá chaylla cumplichun reqsinanchikpaq, nispa.

²⁰ ¡Ay, imaynaraq kanqaku! Mana allinta allinmi niqkuna, allintañataq mana allinmi niqkuna, achkiyta tutaman tikraqkuna, tutayaytañataq achkiyman tikraqkuna, qatqetapas miskim niqkuna, miskitañataq qatqem niqkuna.

²¹ ¡Ay, imaynaraq kanqaku yachaysapa tukuqkuna chaynataq kikillankumanta yuyaysapa tukuqkuna!

²² ¡Ay, imaynaraq kanqaku vino upyanankupaq qari tukuqkuna, machachikuq vino chaqruypi mana vencechikuqkuna!

²³ Qamkunaqa qollqeta chaskikuykuspam mana allin ruwaq runata mana huchayuqta hina kachaykunkichik, inocente runamantañataqmi mana imapas qokusunkichikchu.

²⁴ Imaynam qopata chaylla nina ruparun, imaynam chaki pastota lenwachkaq nina ruparun, chaynam qamkunapas sapinmanta tukusqa kankichik, wayrapa apasqan chaki wayta hina tukusqam kankichik. Chaynaqa, kankichik, Tukuy Atiyniyuq Tayta Diospa yachachikuyninta mana kasukusqaykichikraykum, Israelpa Chuya Diosninpa kamachikuyninkunata wischupakusqaykichikraykum.

²⁵ Chayraykum Diosqa llaqtanpaq llumpayta piñakurqa, makinwanmi wañuyman qaraykurqa, chay ruwasqanwanqa orqokunapas katkatatarqam, ayakunapas callekunapim chuta-chuta mana pipa hoqarisqan karqa. Chaywanpas Señorpa piñakuyninqa manam taninchu, chayllam kachkan castigananpaq.

²⁶ Tayta Diosmi karupi kaq nacionkunapaq banderata sayachin, silbaspam paykunata qayan, paykunañataqmi chaylla hamunku, utqayllamanñam chayaramunku.

²⁷ Paykunamantaqa manam mayqanninpas pisipanchu nitaq mitkakunchu. Manam mayqanpas puñuywanqa aysachikunchu nitaq puñunchu, weqaw watankupas manam paskakamunchu, usutankupa watullanpas manam tipimunchu.

²⁸ Ñawchiy-ñawchiymi flechankupas, suma-sumaq estirasqam arconkupas. Rumi hinaraqmi caballonkupa situnpas, remolino wayra hinaraqmi carretankupa ruedankunapas.

²⁹ Leonpa hinam qapariyninkupas, malta leonkunapa hinam qapariyninkupas. Qaparillawanñam mikunankutapas hapinku, mana pipapas qechusqantam apakunku.

³⁰ Chay punchaw chayaramuptinmi, chay nacionqa lamar qocha hinaraq Israelpa contranpi qaparinqa. Pipas Israel nacionta qawarispanqa tutayaypapas sasachakuypapas intuykusqantam qawarinqa.