Isaías 49 - CHUYA QELLQA La Biblia en Quechua de Ayacucho 2012

Tayta Diospa serviqninmanta

¹ Lamar qochapa patanpi nacionkuna, karu llaqtapi kaq runakuna uyariychik: Tayta Diosqa manaraqpas nacechkaptiymi qayawarqa, mamaypa wiksanpi kachkaptiymi sutiyta rimarirqa.

² Simiytam ñawchiyaykachisqa espadata hina ruwarun, makinpa llantuyninwanmi harkaykuwan. Ñawchiy-ñawchiy flechata hinam ruwaruwan, flechankuna waqaychananpim waqaychaykuwan.

³ Hinaspanmi niwarqa: “Yaw, Israel llaqta, serviqniymi kanki, qamnintakamam hatunchasqa kasaq”, nispa.

⁴ Ñoqañataqmi nirqani: “Yanqapaqmi llamkarqani, mana imatapas haypanaypaqmi kallpayta usuchirqani”, nispay. Ichaqa ima ruwasqaypas Tayta Diospa makinpim kachkan, pagoypas paypa makinpim kachkan.

⁵ Unanchawaqniy Tayta Diosmi manaraq nacechkaptiy payta servinaypaq qayawarqa, Jacobta payman kutirichinaypaqmi churawarqa, Israel llaqtata payman huñunaypaqmi akllawarqa. Tayta Diosmi hatunchaqniyqa, Tayta Diosmi kallpanchaqniyqa.

⁶ Tayta Diosmi kaynata nin: “Manam serviqllaychu kanaykiqa, manam Jacobpa mirayninkunata hatarichimuqllachu kanaykiqa, manam Israelmanta puchuqkunata kutirichimuqllachu kanaykiqa; Aswanqa lliw nacionkunata kancharinaykipaqmi churasqayki, chaynapi kay allpa pachaman salvacionniyta chayachinaykipaq”, nispa.

⁷ Israelta libraq Tayta Diosmi nin, Israelpa chuya Diosninmi nin, wakin runakunapa usuchisqan runata, nacionkunapa cheqnisqan runata, kamachikuqkunapa serviqninmanmi nin: Reykunawan kamachikuqkunam qawasuspayki sayarispanku qayllaykipi kumuykunqaku. Chaynataqa ruwanqaku Israelpa ñoqa Tayta Diosnin akllaqniki kasqayraykum.

Jerusalenta musoqmanta hatarichinankumanta

⁸ Tayta Diosmi kaynata nin: Allin punchawkuna kachkaptillanraqmi uyariykuyki, salvanay punchawpim yanapaykuyki. Waqaychaspaymi llaqtakunawan qamnintakama pactota ruwanaypaq churasqayki, chaynapi tuñisqa llaqtakunata hatarichinaykipaq, purmachisqa allpakunata hapispa rakinaykipaq,

⁹ presokunatapas: “Lloqsiychik kacharisqam kankichik”, ninaykipaq; Tutayaypi tarikuqkunatapas: “Qawachikuychikña”, ninaykipaq. Ñankunapim mikunankupaq pastota tarinqaku, chunniq orqokunapim pastota tarinqaku, sumaq michisqam kanqaku.

¹⁰ Manam yarqachikunqakuchu, nitaqmi yakunayachikunqakuchu, intipa rupayninpas manam ñakarichinqachu; kuyapayaspaymi paykunata pusasaq, pukyumanta lloqsiq yakupa kasqanmanmi pusasaq.

¹¹ Orqonkunatam ñanta ruwasaq, hatun ñankunatam allichasaq.

¹² Qawariychik, karukunamantaraqmi hamuchkanku: Wakinmi norte lawmanta, wakinmi intipa seqaykunan lawmanta, wakinkunañataqmi Sinim lawmanta.

¹³ ¡Cielokuna, kusikuymanta qapariychik! ¡Allpa pacha, anchata kusikuy! ¡Orqokuna, kusikuymanta takiychik! Tayta Diosmi llaqtanta consuelaykun, ñakariypi kachkaptinkum kuyapayariykun.

¹⁴ Sión llaqtam kaynata nin: Tayta Diosmi saqeruwan, Señor Diosmi qonqaruwan, nispa.

¹⁵ Tayta Diosñataqmi kaynata nin: ¿Yaqachu ñuñusqan wawata maman qonqarunman? ¿Yaqachu wachakusqan wawata maman qepancharunman? Ichapas mamanqa wawanta qonqarunman, ñoqam ichaqa mana qonqasqaykichikchu.

¹⁶ Sutikitapas maki pampaypi qellqasqatam apaykachani, perqaykikunatapas sapa punchawmi ñawpaqniypi kachkan.

¹⁷ Kaqllamanta hatarichisuqnikim chaylla hamuchkanku, tuñichispa purmachiqnikikunam ripunqaku.

¹⁸ Muyuriqnikita qawariy, lliw huñunakuruspam qanman hamuchkanku. Ñoqa Tayta Diosmi kikiyrayku jurani, llapallanwanmi alhajawan hina llusikunki, noviapa churakunan alhajakunawan hinam churakunki.

¹⁹ Llaqtaykiqa tuñichisqa, chunnichisqa hinaspa purmachisqa kachkaspapas, achkallaña runayuqmi kanqa, ñakarichisuqnikikunapas qanmanta karunchasqam kanqa.

²⁰ Chinkasqapaqña hapisqayki wawaykikunam rinrikipi nisunki: “Ñoqaykupaqa kay allpaqa kichkillañam, ñoqaykumanta rakikuy sapallayku yachanaykupaq”, nispa.

²¹ Chaymi sonqoykipi kaynata ninki: “¿Pitaq ñoqapaq kaykunata wachakurqa? Ñoqaqa mana wawayuq qolluqmi karqani, qarqosqa hinaspa preso apasqam karqani. ¿Pitaq kaykunata qespichirqa? Ñoqaqa sapallayñam qeparurqani, ¿maypitaq paykunaqa karqaku?”, nispa.

²² Tayta Diosmi kaynata nin: Makiywan señaschaspam nacionkunata qayasaq, banderata hoqarispam llaqtakunata qayasaq, hinaptinmi qari churikikunata marqaypi apamunqaku, warmi churikikunatapas hombropim apamunqaku.

²³ Reykunam yachachisuqniki kanqa, reinakunam mamayki ranti uywasuqniki kanqa, ñawpaqnikipim kumukuykuspa qonqoranqaku, chakikipi allpatam llaqwanqaku. Chaynapim Tayta Dios kasqayta reqsiwanki, ñoqapi hapipakuspa suyaqkunaqa manam penqaypichu kanqaku, nispa.

²⁴ ¿Yaqachu allinnin qari-qari soldadomanta guerrapi hapikusqanta qechurunmanku? ¿Yaqachu apaqnin allinnin qari-qari soldadomanta huk preso lluptirunman?

²⁵ Tayta Diosmi kaynata nin: Ichapas presokunataqa allinnin qari-qari soldadomanta qechurunmanku, cheqaptam guerrapi hapikusqantapas manchakuypaq soldadomanta qechurunmanku, Ñoqam ichaqa nanachikusqayki, churikikunatapas salvasaqmi.

²⁶ Ñakarichisuqnikikunatam kikinkupa aychanta mikuchisaq, kikinkupa yawarninwanmi vinowan hina sinkachisaq, chaymi llapa runakuna Salvaqniki Tayta Dios kasqayta reqsinqaku, Jacobpa Atiyniyuq Diosnin kasqaytam reqsinqaku, libraqnikiqa ñoqa Dios kasqaytam yachanqaku.