Isaías 48 - CHUYA QELLQA La Biblia en Quechua de Ayacucho 2012

Israel runakuna mana kasukuq kasqankumanta

¹ Jacobpa mirayninkuna, Judapa mirayninkuna kachkaspa Israelwan sutichakuqkuna, Tayta Diospa sutinpi juraqkuna, Israelpa Diosninta mañakuqkuna, mana cheqapta rimaspa mana allin ruwaqkuna;

² “Tayta Diospa sapaqchasqa llaqtanmi kaniku” niqkuna, Israelpa Tukuy Atiyniyuq Diosninpi hapipakuq tukuqkuna, kayta uyariychik:

³ Tukuy ima pasakusqantaqa ñawpaqtaraqmi willarqaykichik, rimarispaymi lliwman yachayta qorqani, imapas rimasqayman hinam ruwasqa karqa.

⁴ Llumpay rumi sonqo kasqaykita yachaspaymi, matankaykipas fierro hina kasqanta yachaspaymi, umaykipas bronce hina kasqanta qawaspaymi,

⁵ ñoqaqa ñawpaqmantaraq nirqaykiña, manaraq imapas kachkaptinmi willarqaykiña; chaynaqa manam niwaqchu: “Idoloykunam chaykunataqa ruwarun, llaqllasqa idoloykunam chaykunataqa ruwarun, chulluchispa ruwakusqay idoloymi chaykunataqa ruwarun”, nispaqa.

⁶ Tukuy chaykunata uyarichkaspa chaynataq rikuchkaspachu, ¿chaykunaqa cheqap kasqanta mana willakunki? Kunanmi musoq kaqkunata uyariykachiki, mana yachasqayki pakasqa kaqkunatam uyariykachiki.

⁷ Kunan punchawkunallapi unanchasqakunatam uyariykachiki, kunankama manaraq uyarisqayki kaqkunatam uyariykachiki. Chaynaqa, manam niwaqchu: “Yacharqaniñam” nispaqa.

⁸ Mana uyarikuq kasqaykiraykum chaykunataqa mana uyarirqankichu, nitaq yacharqankichu, Reqsikim pasaypaq iskay uya kasqaykita, nacesqaykimantapuni mana kasukuq kasqaykita.

⁹ Kikiyraykum piñakuyniyta sonqollaypi pakaykurqani, hatunchasqa kanayraykum manaraq tukururqaykichu.

¹⁰ Ñoqam qamtaqa chuyancharqayki, ichaqa manam qollqeta chulluchichkaq hinachu, aswanqa ñakariy hornopim chuyancharqayki.

¹¹ Kikiyraykum chaykunataqa ruwasaq, sutiytaqa manam pipas qachachanmanchu, ñoqa hina hatunchasqaqa manam pipas kanmanchu.

Israelta Tayta Dios librananmanta

¹² Jacobpa mirayninkuna uyariwaychik, akllakusqay Israel llaqta, uyariway: Ñoqa sapallaymi Diosqa kani, ñoqallam kani punta kaqpas, qepa kaqpas.

¹³ Makiywanmi kay pachata takyachirqani, atiyniywanmi cielokunata mastarirqani, qayaykuptillaymi chaykunaqa paqarimurqaku.

¹⁴ Chaynaqa, israelpa mirayninkuna, huñunakuspa uyariwaychik: ¿Mayqannin idolotaq kaykunata willakurqa? Ñoqa Tayta Diospa kuyasqay rey Cirom Babiloniawan chaynallataq Caldea nacionwan munasqayta ruwanqa.

¹⁵ Rey Cirotaqa ñoqam rimapayarqani, qayaykuspaymi pusamurqani; chaynaqa maylawman rispapas allin chaninchasqam kanqa.

¹⁶ Ñoqaman asuykamuspa uyariwaychik: Qallariyninmantapas manam pakasqapichu rimarqani, tukuy chaykuna pasakuptinpas chaypim karqani. Tayta Diosmi kunan kachamuwarqa, Espiritunwanmi huntaykuwarqa.

¹⁷ Reclamaqniki Tayta Diosmi, Israelpa Chuya Diosninmi kaynata nin: Ñoqaqa Diosnikim kani, allinnikipaq yachachiqnikim kani, maynin purinayki qawachiqnikim kani.

¹⁸ Sichum kamachikuyniykunata uyariptikiqa, hawkayaynikipas mayu hinaraqmi kanman karqa, allin ruwaynikipas lamar qochapa olankuna hinaraqmi kanman karqa.

¹⁹ Miraynikikunapas manaña yupay atinam kanman karqa, lamar qochapi aqo hinañam kanman karqa, sutinpas manam chinkachisqachu kanman karqa, qayllaymantapas manam chinkachisqachu kanman karqa.

²⁰ Babilonia llaqtamanta lloqsiychik, Caldea nacionpa chawpinmanta ayqeychik, kusikuywan qaparispa willakamuychik, kay pachapa tukupayninkama kaynata uyarichimuychik: “Tayta Diosmi serviqnin Jacobta libraykun”, nispa.

²¹ Paykunataqa chunniqninta pusaspapas manam yakumantaqa ñakarichirqachu; qaqamantam yakuta toqyachirqa, raqchita kicharispam achka yakuta lloqsichimurqa.

²² Mana allin ruwaqkunapaqmi ichaqa mana hawkayay kanchu. Tayta Diosmi chaynata nin.