Isaías 43 - CHUYA QELLQA La Biblia en Quechua de Ayacucho 2012

Israelta Tayta Dios librananmanta

¹ Jacobpa miraynin Israel llaqta, unanchaqniki Tayta Diosmi kaynata nisunki: Ama manchakuychu, ñoqam libramurqayki sutikimantam qayamurqayki, qamqa ñoqapam kanki.

² Yakunta riptikipas, qanwanmi kasaq, mayunta chimpaptikipas, manam apasunkichu, nina ukunta pasaptikipas, manam rupasunkichu, lenwachkaq ninapas manam kañasunkichu.

³ Ñoqaqa salvaqniki Tayta Diosmi kani, Israelpa Chuya Diosninmi kani. Rantikipim Egipto nacionta pagarqani, rantikipim Etiopía naciontawan Seba nacionta qoykurqani.

⁴ Qamtaqa allinpaqmi qawayki ancha kuyasqaymi kanki, rantikipim runakunata pagarqani, vidaykiraykum nacionkunata qoykurqani.

⁵ Ama manchakuychu, ñoqam qanwan kachkani; ñoqam intipa qespimunan lawmanta, hinaspa intipa seqaykunan lawmanta, lliw miraynikikunata huñumusaq.

⁶ Norte lawtam kamachisaq “paykunata kutichimuy”, nispa; sur lawtam kamachisaq “ama paykunata harkamuychu”, nispa; qaritapas warmitapas churiykunata tukuy hinastinmanta pusamuy, nispa.

⁷ Sutiywan sutichasqakunata, hatunchasqa kanaypaq unanchasqaykunata, ñoqallapaqña kananpaq ruwasqay runaykunatam pusamusaq, nispa.

⁸ Ñawiyuq kachkaspa mana qawakuq llaqtata hurqomuychik, rinriyuq kachkaspa mana uyarikuq llaqtata hurqomuychik.

⁹ Llapa nacionkuna, lliw llaqtakuna huñunakamuychik. ¿Mayqantaq paykunamanta kaykunata willakurqa? ¿Mayqantaq ñawpaq kaqkunata kunan willakurqa? Cheqap rimaq kasqankumanta testigonkuta pusamuchunku, chaynapi uyarispanku cheqapmi kasqa ninankupaq.

¹⁰ Tayta Diosmi kaynata nin: Qamkunam testigoykuna kankichik, serviwanaykichikpaq akllakusqaykunam kankichik, reqsiwaspaykichik ñoqapi hapipakunaykichikpaq, ñoqalla Dios kasqayta yachanaykichikpaq. Ñoqamanta huk diosqa manam haykapipas kanqachu.

¹¹ Ñoqallam Tayta Diosqa kani, ñoqamanta hukqa manam pipas salvakuqqa kanchu.

¹² Tayta Diosmi nin: Ñoqam salvanaypaq willarqaykichik, nisqayman hinam ruwarqani, manam sapaq dioschu chaynataqa ruwarqa, chay ruwasqaymantaqa testigom kankichik.

¹³ Tukuy imapa qallariyninmantam ñoqalla Dios kani. Ñoqapa makiymantaqa manam pipas qechuwayta atinmanchu, ñoqapa ruwasqaytaqa manam pipas yanqachanmanchu.

¹⁴ Qamkuna reclamaqnikichikmi, Israelpa Chuya Diosninmi kaynata nin: Qamkunaraykum punkunkunata kichanankupaq Babilonia lawman runakunata kachasaq, Caldea runakunatam alabakusqanku barcokunapi uraykachisaq.

¹⁵ Ñoqa Tayta Diosqa, Chuya Diosnikichikmi kani. Israel unanchaq reynikichikmi kani.

¹⁶ Tayta Diosmi, lamar qochanta ñanta kichaqmi, olallaña lamar qochapa ukunta ñanta kichaqmi,

¹⁷ carretakunatawan caballokunata lloqsichiqmi, tropakunatawan yanapaqninkunata lloqsichiqmi, hinaspa manaña hatariy atinankukama wichichiqmi, wañunayaq mechata hina paykunata saqeruqmi, kaynata nin:

¹⁸ Ñawpaq kaqkunataqa qonqaychikña, amaña huktawanqa yuyaymanaychikchu.

¹⁹ Ñoqam musoq kaqta ruwasaq, hichpallañam kachkan rikurimunanpaq ¿manachu musyankichik? Chunniqpim ñanta kichasaq, chaki allpakunapim mayukunata kallpachisaq.

²⁰ Purun animalkunam yupaychawanqaku, atoqkunawan avestruzkunam yupaychawanqaku; yakukunata chunniqpi pawachisqayrayku, mayukunata chaki allpapi kallpachisqayrayku. Chaytam akllakusqay llaqtayman yakuta tomachinaypaq ruwarqani.

²¹ Kay llaqtataqa kikiypaqmi unancharqani, chaynapi hatunchasqa kasqayta willakunankupaq.

²² Chaywanpas Jacobpa miraynin Israel llaqta, manam ñoqatachu qayakuwarqanki, aswanqa ñoqatam amiruwanki.

²³ Lliw kañanapaq ovejakunataqa manam apamuwarqankichu, animalkunatapas yupaychawanaykipaqqa manam sacrificarqankichu, kawsaykunamanta ofrendatapas aminaykikamaqa manam mañapayarqaykichu, inciensotapas pisipanaykikamaqa manam mañakurqaykichu.

²⁴ Miski asnaq calamotapas qollqekiwanqa manam rantipuwarqankichu, nitaqmi animalkunapa wirantapas saksanaykamaqa kañapuwarqankichu. Aswanqa huchallikuspa tukuy mana allinkuna ruwasqaykiwanmi paqwayta amichiwarqanki.

²⁵ Ñoqam ichaqa Diosniki kasqayrayku lliw mana kasukuynikikunata pampachayki, huchaykikunatapas manañam yuyasaqñachu.

²⁶ Contraypi imapas niwanayki kaptinqa hamuy rimananchikpaq, mana huchayuq kasqaykita niway, ichapas yanqamanta tumpachkayki.

²⁷ Ñawpaq taytaykikunapas huchallikurqakum, yachachiqnikikunapas manam kasuwarqakuchu.

²⁸ Chayraykum temploypi kamachikuqkunata penqayman churarqani, Jacobpa miraynin Israel llaqtatapas, ñakarichisqa hinaspa usuchisqa kanankupaqmi saqerurqani.