Isaías 42 - CHUYA QELLQA La Biblia en Quechua de Ayacucho 2012

Tayta Diospa serviqninmanta

¹ Kayqaya akllakusqay serviqniyqa, ñoqam payta kallpanchasaq, payraykum kusisqa kachkani. Espirituytam payman huntani, mana pimanpas sayapakuspam nacionkunata kamachinqa.

² Manam payqa qayaykachakunqachu, nisyumantaqa manam qaparinqachu, callekunapiqa vozninpas manam uyarikunqachu.

³ Chitqasqa soqosllatapas manam pakinqachu, wañunayachkaqña rataq mecherotapas manam wañuchinqachu, cheqapwanmi lliwpaq allinkunallata ruwanqa.

⁴ Payqa manam pisipanqachu, nitaqmi hukmanyanqachu, nacionkunapi allin arreglota ruwanankama. Lamar qochapa patanpi nacionkunapas yachachikuynintam suyanqaku.

⁵ Cielokunata unanchaspa mastariq Tayta Diosmi kani, allpa pachata unanchaqmi kani, allpapi wiñaqkunatam mirachirqani, allpa pachapi kawsaq runakunamanmi espirituyta qorqani. Chaykuna ruwaq kaspaymi serviqniyta kaynata nini:

⁶ Ñoqa Tayta Diosmi qayarqayki, makikimantam hapisqayki, waqaychaspaymi runakunawan pacto ruwasqay kanaykipaq churasqayki, nacionkunata kanchanaykipaqmi churasqayki.

⁷ Ñawsakunapa ñawinta kichanaykipaq, carcelpi kaqkunata hurqonaykipaq, tutayay calabozopi tiyaqkunata hurqonaykipaq, nispa.

⁸ Ñoqam kani Tayta Dios, chaymi sutiy. Hukkuna hatunchanankutaqa manam munanichu, ñoqallatam yupaychawanankuqa, manam idolokunatachu.

⁹ Ñawpaqmantaraq rimasqaykunam cumplikurunña, kunanñataqmi musoq kaqkunataña willasqaykichik; manaraq rikurimuchkaptinmi willasqaykichikña.

Tayta Diosta yupaychanamanta

¹⁰ Tukuy hinastinpi kaqkuna, lamar qochanta illaqkuna, lamar qochapi kawsaqkuna, lamar qochapa patanpi lliw nacionkuna, Tayta Diospaq musoq takita takiychik.

¹¹ Chunniqpi llaqtakuna, Cedarpa yachanan llaqtakuna, kusikuywan qapariychik; Sela lawpi yachaqkuna kusikuymanta takiychik, orqokunapa puntanmanta qapariychik.

¹² Tayta Diosta hatunchaychik, hatunchasqa kasqanta lamar qochapa patankunapi willakuychik.

¹³ Tayta Diosqa hatun piñakuywan peleaq soldado hinaraqmi lloqsinqa, qaparispanmi guerrapi peleananpaq qayaykachakunqa, enemigonkunata venceruspanmi munaychakunqa.

¹⁴ Tayta Diosmi nin: Unayñam upallalla karqani, mana imata rimarispaymi aguantakuykurqani, kunanmi ichaqa wachakuq warmi hina onqosaq, nanaywan ñakariq warmi hinam qaparisaq.

¹⁵ Orqokunatawan moqokunatam purmachisaq, sachankunatawan pastonkunatam chakirachisaq, mayukunatam aqo pampata ruwarusaq, qochakunatam chakirachisaq.

¹⁶ Ñawsakunatam mana reqsisqanku ñanninta pusasaq, ñawpaqninkupim tutayayta achkiyman tikrasaq, ranra ñantam pampa ñanmanña tikrasaq. Paykunapaqmi tukuy kaykunata ruwasaq, paykunataqa manam saqesaqchu.

¹⁷ Idolokunaman hapipakuqkunam, llapa idolokunata “diosniykum kankichik” niqkunam penqakuymanta karunchakunqaku.

Israel runakuna ñawsa hina kasqankumanta

¹⁸ Tayta Diosmi nin: Mana uyariqkuna uyariychik, ñawsakuna, qawarikuychik.

¹⁹ ¿Pitaq ñawsaqa? ¿Manachum serviqnillay? ¿Pitaq mana uyariqqa? ¿Manachum willakunanpaq kachasqay? ¿Pitaq ñoqa Tayta Diospa akllasqay serviqniy hina llumpay ñawsaqa?

²⁰ Tukuy imata qawachkaspapas mana kaqpaqpas hapiqmi, rinrinwan uyarichkaspapas mana imapas qokuqmi.

²¹ Allin ruwaq kasqanraykum Tayta Diosqa yachachikuyninta hatunchaspa reqsisqata ruwarqa.

²² Chaywanpas kay runakunatam llapa imankuta suwaspa sarunku, machaykunapi hinaspa carcelkunapim presocharunku. Qechuchikuptinkupas manam kanchu paykunamanta nanachikuq, suwachikuptinkupas manam kanchu “qasipuychik” nispa harkaqninku.

²³ ¿Mayqannikichiktaq kay nisqaykunata uyariwaqchik? ¿Mayqannikichiktaq hamuq punchawkunamanta yachayta munawaqchik?

²⁴ ¿Pitaq Israelta suwakunapa hinaspa ñakarichiqkunapa makinman qoykurqa? ¿Manachum Tayta Diosqa huchanchikrayku chaykunaman qoykurqa? Manam paypa munasqanman hina kawsayta munarqakuchu, kamachikuyninkunatapas manam kasukurqakuchu.

²⁵ Chayraykum piñakuspa paykunata ñakarichirqa, lenwachkaq ninata hinam paykunaman mancharikuypaq guerrata kachaykamurqa, chaywanpas paykunaqa manam kasukurqakuchu; chay ninam paykunata ruparurqa, chaywanpas paykunaqa manam kaqpaqpas hapirqakuchu.