Isaías 4 - CHUYA QELLQA La Biblia en Quechua de Ayacucho 2012

¹ Chay tiempopim qarikuna asllaña qepanqaku, hinaptinmi qanchis warmikuna chullalla qarita qechunakuspa ninqaku: “Ñoqaykum mikunaykutapas maskakusaqku hinaspa pachaykutapas ruwakusaqku, qosaykuñayá kaykuy sutikita apanaykupaq, chaynapi amaña penqaypi kanaykupaq”, nispanku.

Jerusalén hawkayaypi kananmanta

² Chay tiempopim Tayta Diospa ikllichisqan runa kanqa suma-sumaq kuyayllapaq, Israelpa mirayninkunamanta puchuqkunapa alabakunankupaqmi kanqa. Allpankupa rurun cosechasqankum hatunchakuspa alabakunankupaq kanqa.

³ Sión llaqtapi puchuqkunatam, Jerusalén llaqtapi qepaqkunatam Diospaq sapaqchasqawan sutichanqaku. Chaynataqa sutichanqaku Jerusalén llaqtapi kawsaqkunamanta listasqakunatam.

⁴ Señorqa castigananpaq sentenciaspanmi Sionpi yachaqkunata qachankunamanta chuyanchanqa, Jerusalentam yawar chaqchusqanmanta mayllanqa.

⁵ Tayta Diosmi unanchanqa, Sión moqopi yachaqkunapa hawanpi, chaypi huñunasqa llaqtapa hawanpi, punchawpi rupaypaq yana puyuta, tutayaypi kanchananpaqñataq lenwachkaq ninata. Chaynapim Tayta Diospa atiyninqa, llaqtanta toldo hina qataykunqa,

⁶ paykunataqa ramada hinam punchawpi rupaymanta llantuykunqa, paramantawan sinchi wayramantam harkaykunqa.