Isaías 39 - CHUYA QELLQA La Biblia en Quechua de Ayacucho 2012Babilonia runakuna hamusqanmanta ( 2~R 20.12-19 ; 2~Cr 32.27-31 ) 1 Chay punchawkunapim Babilonia nacionpi Baladanpa churin rey Merodac-baladán cartatawan regalota rey Ezequiasman apachimurqa. Chaykunataqa apachimurqa onqorusqanmanta sanoyarusqanta yacharuspanmi. 2 Ezequiasmi chaykunawan kusirikuspan, mana imatapas pakaykuspan palacionpi kaqkunata paykunaman qawachirqa, qawachirqataqmi kamachikusqan nacionpi tukuy kapuqninkunatapas: Qorita, qollqeta, perfumekunata, miski asnaq aceiteta, armakuna waqaychanan wasita, wasinpi tukuy ima waqaychasqantapas. 3 Hinaptinmi profeta Isaías rey Eze-quiasman hamuspan tapurqa: ¿Imamantaq chay runakuna hamusqaku? ¿Maylawtaqsi kanku? nispa. Ezequiasñataqmi nirqa: Paykunaqa karu-karu Babilonia nacionmantaraqmi hamusqaku, nispa. 4 Isaiasqa tapurqataqmi: ¿Imakunatataq palacioykipiqa rikurqaku? nispa. Hinaptinmi Ezequías nirqa: Palacioypi tukuy ima kapuqniytam qawarqaku, tukuy imatapas mana pakaspaymi qawachirqani, nispa. 5 Chaymi rey Ezequiasta Isaías nirqa: Tukuy Atiyniyuq Tayta Diospa nisqanta uyariy: 6 Hamuchkanmi punchaw llapa imaykikunatawan ñawpaq taytaykikunapa kunankama tukuy ima huñusqankuta mana puchuykuspa Babilonia nacionman apanankupaq. 7 Miraynikikunatapas Babiloniamanmi reyta servimunankupaq apanqaku, nispa. 8 Hinaptinmi Isaiasta rey Ezequías nirqa: Tayta Diospa nisqanqa allinpunim, ichaqa wañunaykamayá hawkalla hinaspa allinlla kawsasaq, nispa. |
Chuya Qellqa - La Biblia en Quechua de Ayacucho - Edición Revisada © Peruvian Bible Society, 2012
Peruvian Bible Society