Isaías 38 - CHUYA QELLQA La Biblia en Quechua de Ayacucho 2012

Rey Ezequiaspa onqosqanmanta

¹ Chay punchawkunapim rey Ezequías onqorurqa wañuy patanpiña kanankama. Chaymi Amozpa churin profeta Isaías watukuq rispan payta nirqa: Tayta Diosmi nisunki: “Qamqa wañukunkiñam, chaynaqa aylluykikunaman imaynam kawsanankuta kunay”, nispa.

² Hinaptinmi Ezequiasqa perqa lawman muyuriykuspan Tayta Diosta kaynata mañakurqa:

³ Dios Taytalláy mañakuykim, qay-llaykipi cheqap sonqowan kawsaspa qampa munasqaykiman hina ruwasqaytayá yuyariykuy, nispa. Hinaspanmi Ezequiasqa llumpayta waqarqa.

⁴ Chaymi Isaiasta Tayta Dios kaynata kamachirqa:

⁵ Ezequiasman kaynata nimuy: Ñawpaq taytayki Davidpa Diosninmi kaynata nin: Mañakuwasqaykitam uyariykuyki, waqasqaykitapas rikuchkanim, chunka pichqayuq watataraqmi kawsachisqayki,

⁶ chaynallataqmi qamtawan hinaspa llaqtaykitapas Asiriapa reyninmanta waqaychasqayki. Kay llaqtataqa kikiypunim nanachikusaq, nispa.

⁷ Tayta Diospa rimasqan cumplikunanta yachanaykipaqmi kay señal kanqa:

⁸ Intipa llantuynintam qepaman chunka gradasta Acazpa gradasninpi kutichisaq, nispa. Nisqanpi hinam intipa llantuynin chunka gradasta kutirurqa.

⁹ Rey Ezequiasmi onqosqanmanta sanoyaruspan kay takita qellqarqa:

¹⁰ Ñoqam nirqani: Kallpallaypiraqchiki wañukusaq, wañuqkunapa kasqanmanñachiki risaq kaykamallañachiki kawsasaq.

¹¹ Nirqanitaqmi: Tayta Diostaqa manañachiki kay allpapiqa rikusaqñachu, kay pachapi yachaq runakunatapas manañachiki qawasaqñachu.

¹² Michiqkunapa hatusninta hinam vidayta qechuruwanku, awaqpa awasqan tela hinam vidayqa karqa, ichaqa telarmanta kuchuruchkaq hinam kuchuruwanki, tuta punchawmi vidallayta tukurunki.

¹³ Tukuy tutam qamta qayakamullayki, aswanqa león hinam tulluykunata pakiparunki, tutaykuymanta achikyaqkamallam vidayta tukurunki.

¹⁴ Wayanakuywan chiwaku hinaraqmi waqani, paloma hinaraqmi enqeni, cielokuna qawasqaypim ñawiykunapas utirunña. Señorlláy sasachakuypim kachkani kallpanchaykullaway.

¹⁵ Ichaqa, ¿imatataq niyman? Payqa niwasqanman hinam ruwarun, sonqoypi llakikuy kasqanraykum humillasqalla sapa punchaw kawsasaq.

¹⁶ Señorlláy, tukuy chaykunawanmi runakuna kawsanqa, ñoqapa espirituypas chaykunawanmi kawsanqa, qanmi sanoyaykachiwaspa kawsachiwankiraq.

¹⁷ Llumpay llakiymi kusikuymanña tikrakurun, qamqa kuyawaspaykim wañuchiqniy pozomanta hurqoykuwarqanki, tukuy huchaykunatam pampachaykunki.

¹⁸ Sepulturapas, chaypi ayakunapas manañam yupaychasunkiñachu. Wañusqakunapa kasqanman riqkunapas cheqapnikitaqa manañam suyanqakuñachu.

¹⁹ Kawsaqkunam ichaqa yupaychasunki imaynam kunan yupaychamusqayta hina. Hapipakunapaq kaynikimantam churinkuman taytan yachachin.

²⁰ Dios Taytalláy, salvawanaykipaqmi kaypi kachkanki, chaymi arpawan qampaq takisaqku, sapa punchawmi temploykipi qampaq tocasaqku, nispa.

²¹ Chaymantam Isaías kamachirqa: Higosta kutaspa apamuychik, nispa. Aparamuspankum Ezequiaspa nanayninman laqarurqaku, hinaptinmi chaywan sanoyarurqa.

²² Rey Ezequiasñataqmi Isaiasta tapurqa: ¿Ima señaltaq kanqa Tayta Diospa templonman rinaypaqqa? nispa.