Isaías 36 - CHUYA QELLQA La Biblia en Quechua de Ayacucho 2012

Judapa contranpi rey Senaquerib hamusqanmanta

¹ Chunka tawayuq wataña Ezequías rey kachkaptinmi, Asiria nacionpa reynin Senaquerib Judá nacionpi llapa murallasqa llaqtakunapa contranpi hamururqa, hinaspam munaychakururqa.

² Asiriapa reynin Senaqueribmi La-quis llaqtamanta tropankuna kamachiq Rabsacesta achkallaña tropayuqta Jerusalenpi rey Ezequiasman kachamurqa; hamuspankum hanay law estanqueman hamuq yarqapa hichpanpi, “Taqsaq runapa chakran” sitioman riq ñanpa hichpanpi churakururqaku.

³ Hinaptinmi Hilciaspa churin reypa mayordomon Eliaquimwan, secretario Sebna hinaspa Asafpa churin escriba Joa chaskiqninku lloqsimurqaku.

⁴ Paykunatam rey Ezequiasman willa-nanpaq Rabsaces kaynata nirqa: Asiria nacionpa ancha reqsisqa reyninmi kaynata nin: ¿Imapi hapipakuspataq hawkallaña kachkanki?

⁵ Qanmi nichkanki: “Ñoqapaqqa consejaqniypas chaynataq guerrapaq allinnin qari-qari soldadoykunapas kachkanmi”, nispa; yanqam chayqa. ¿Piman hapipakuspaykitaq contraypi hatarirunki?

⁶ ¿Pakisqa soqos tawna hina Egipto nacionpichu hapipakuchkanki? Chay soqos tawnaqa, tawnapakuqninpa makintapas pakikuruspanmi qellparunqa. Chay hinallam Egiptopi rey Faraonpas lliw paypi hapipakuqninkunapaqqa.

⁷ Sichum niwanki: “Ñoqaykuqa Tayta Diosniykupim hapipakuniku”, nispa, hinaptinqa ¿manachum chay Diospa capillankunatawan altarninkunatapas lliwta Ezequías chinkarachirqa? Payqa Judapi chaynataq Jerusalenpi yachaqkunatam nirqa: “Kay altarpa ñawpaqllanpiñam yupaychankichik”, nispa.

⁸ Kunanyá Asiriapa reyniywan allinyanakuy, ñoqañataqmi iskay waranqa caballokunata qosqayki, yaqachus iskay waranqa sillakuqkunata tarirunki.

⁹ Egipto nacionpa carretankunapiña hinaspa sillada tropankunapiña hapipakuspapas ¿imaynataq reyniypa serviqnin capitankunamanta eqonniq kaqllawanpas peleayta atiwaq?

¹⁰ Kunan kay llaqtata tuñichiq hamunaypaqqa kikin Tayta Diosmi kachamuwarqa, wak llaqtaman rispa tuñichimuy, nispa.

¹¹ Hinaptinmi chay kamachikuqta Hil-ciaspa churin Eliaquimwan Sebna hinaspa Joañataq nirqaku: Mañakuykikum, muralla hawanpi runakuna uyarichkaptinqa amayá hebreo simipiqa rimapayawaykuchu, Aram nacionniyuq runakunapa rimayninpi rimapayawaykuqa, ñoqaykuqa entiendesaqkum, nispanku.

¹² Chay kamachikuqñataqmi nirqa: Reyniyqa manam kachamuwarqa reynikichikmanwan qamkunallaman willanaypaqchu, aswanqa muralla hawanpi kaq runakunaman willanaypaqmi, paykunam uyarinankuqa, paykunapas qamkunawan kuskam hatun ispayninkuta mikunqaku, chaynataqmi yaku ispayninkutapas tomanqaku, nispa.

¹³ Chaynata niruspanmi sayaykuspan hebreo simipi qaparispan nirqa: Asiria nacionpa ancha reqsisqa reyninpa nisqanta uyariychik:

¹⁴ Ama rey Ezequiaswan engañachikuychikchu, ñoqamantaqa manam payqa librasunkichikmanchu.

¹⁵ Sichum Ezequías nisunkichik: “Tayta Diospi hapipakusun, payqa waqaychaykuwasunmi, llaqtanchiktaqa manam Asiria nacionpa reyninmanqa qonqachu nispa”,

¹⁶ hinaptinqa ama kasuychikchu. Asiriapa reyninmi kaynata nin: Ñoqawan allinyanakuspa qayllaypi uchuychakuychik. Chaynata ruwaspaqa sapakamam uvasnikichikpa higosnikichikpa rurunta mikunkichik, sapakamataqmi pozoykichikpi yakutapas tomankichik.

¹⁷ Hamuspay kay yachasqaykichik hina allpaman, kawsaypa, vinopa, mikuypa, uvaspa kanan allpaman pusanaykama.

¹⁸ Ezequiaswanqa amayá engañachikuychikchu, Tayta Diosmi waqaychawasun nisuptikichikpas. Wakin nacionkunapa diosninkunaqa ¿yaqachu mayqanllanpas nacionnin librayta atirqa Asiria nacionpa reyninmanta?

¹⁹ ¿Maypitaq Hamatpa, Arfadpa hinaspa Sefarvaim llaqtakunapa diosninku kachkan? ¿Yaqachu atirqaku Samaria llaqtata ñoqamanta librayta?

²⁰ Chay nacionkunapa llapallan diosninkunamanta ¿mayqannintaq ñoqamanta nacionnin librayta atirqa? Chaynaqa, ama niychikchu Tayta Diospas Jerusalén llaqtata ñoqamanta waqaychanantaqa, nispa.

²¹ Uyariqnin runakunañataqmi upallalla kaspanku mana imatapas nirqakuchu. Reymi paykunata kamachirqa: Amam kutipakunkichikchu, nispa.

²² Hinaptinmi Eliaquimwan secretario Sebna hinaspa escriba Joañataq pachankuta llikiparuspanku rey Ezequiasman kutispanku chay kamachikuqpa rimasqankunata willarqaku.