Isaías 33 - CHUYA QELLQA La Biblia en Quechua de Ayacucho 2012

Diosllapi hapipakunamanta

¹ ¡Ay, imaynaraq kankichik, purmachiq kachkaspa mana purmachisqakuna, traicionaq kachkaspa mana traicionasqakuna! Purmachiyta tukuruspam qampas purmachisqa kanki, traicionayta tukuruspam qampas traicionachikunki.

² Dios Taytallayku, qamllapi suyasqaykuraykuyá llakipayariykullawayku, qamyá sapa tutapayta kallpanchaykuwayku, sasachakuyniyku punchawpiyá salvaykuwayku.

³ Qaqchakuynikita uyariykuspankum llaqtakuna ayqekunku, qam hatariykuptillaykim nacionkuna cheqerinku.

⁴ Suwakuspa llapa ima huñukusqankum suwasqa kanqa, nana-nanaq aqaruwaykuna hinaña enemigonkunam kallpamuspanku llapa kapuqninkuta qechurunqaku.

⁵ Hanaq pachapi yachakuq Tayta Diosmi hatunchasqa kachkan, Sión llaqtatam mana pimanpas sayapakuywan chaynataq allinkuna ruwaywan huntaykun.

⁶ Paymi allin kawsakuy qosuqnikiqa, paytaqmi yachaytawan yuyayniyuq kaytapas salvakunaykipaq qosunki; Tayta Diosta manchakuynikim ancha kapuqniyuq kaynikiqa.

⁷ Mana manchakuq allinnin qari-qarikunapa callekunapi qaparkachasqantayá uyariychik, hawkayayta apamuqkunapa waqasqantayá uyariychik.

⁸ Ñankunam chunnichkan, manañam pipas chaynintaqa purinñachu; contratotam yanqacharunku, testigokunatam qepancharunku, mana pitapas respetaqñam rikurirunku.

⁹ Kay allpam llakipi tarikun, Líbano orqopi sachakunam chakiruspan penqaypi rikurirun, Saronpas chunniqñam kachkan, Basanpiwan Carmelo orqopi sachakunapas mana rapiyuqñam kachkan.

¹⁰ Tayta Diosmi kaynata nin: Kunanmi ñoqa hatarisaq, kunanmi ñoqa hatunchasqa kasaq, kunanmi ñoqa alabasqa kasaq.

¹¹ Qamkunapa tanteasqaykichikqa qora hinallam, qamkunapa ruwasqaykichikqa qopa hinallam, ichaqa samayniymi nina hina ruparusunkichik.

¹² Llaqtakunam uchpayanankukama kañasqa kanqaku, kuchusqa kichkakuna hinam kunununuyllaña ninapi rupanqaku.

¹³ Karupi kaqkuna, imam ruwasqaymanta uyariychik. Hichpapi kaqkuna, Tukuy Atiyniyuq kasqayta reqsiychik, nispa.

¹⁴ Sión llaqtapi huchasapakunam paqway mancharisqa kachkanku, Diosta mana yupaychaqkunam pasaypaqta katkatataspa ninku: ¿Mayqanninchiktaq rupakuq nina ukupi yachachwan? ¿Mayqanninchiktaq wiña-wiñaypaq rupakuq nina ukupi yachachwan? nispanku.

¹⁵ Isaiasñataqmi nirqa: Allinkunata ruwaspa cheqap rimaqmi, engañowan qollqe ganayta mana munaqmi, sobornota mana chaskikuy munaqmi, runa wañuchiqkunapa consejasqanta mana uyariqmi, mana allinkunata mana qawaq munaqmi,

¹⁶ allin waqaychasqa kawsakunqa, yachananpas qaqay-qaqay sunim kanqa; mikunanpas manam tukunqachu, yaku tomananpas manam pisinqachu, nispa.

¹⁷ Ñawikikunam reypa kuyayllapaq kasqanta qawanqa, nacionninpa tukuy hinastinman mirasqantam qawanqa.

¹⁸ Manchakuypi kawsasqaykita yuyarispam ninki: ¿Maypitaq kachkan impuesto qollqe yupaqqa? ¿Maypitaq kachkan impuesto qollqepa llasaynin qawaqqa? ¿Maypitaq kachkan torrekuna yupaq runaqa? nispa.

¹⁹ Mana llakipayakuq runakunataqa manañam rikunkichu, rimasqankupas mana entiendey atina runakunataqa manañam rikunkichu.

²⁰ Sión llaqtata qawariy, hatun fiestakuna ruwananchik llaqtata qawariy, Jerusalén llaqtata qawariy, hawka samarina llaqtata qawariy. Mana suchuchiy atina carpam kanqa, estacankunapas mana chutay atinam kanqa, waskankunapas mana tipiy atinam kanqa.

²¹ Llimparistin kallpaq ancho mayukunapa huntarisqanmi kanqa, kaspimanta qachinayuq barcokunapas manam chaynintaqa rinqachu, hatun barcokunapas manam chaynintaqa riyta atinqachu. Chaypim Tukuy Atiyniyuq Tayta Dios ñoqanchikwan kanqa.

²² Tayta Diosmi juezninchikpas, decretokuna qowaqninchikpas, Tayta Diosmi reyninchikpas, payllataqmi salvaqninchikpas.

²³ Enemigonchikpa barconkunapa waskankunaqa manañam hapinñachu, wayayaruspam hatun kaspinkunatapas manaña takyachinñachu, barcota purichiq toldontapas manañam chutanñachu. Nana-nanaq qori-qollqenkutapas qechuspam rakinakusun, wistukunapas ñawsakunapas rakinakuspam apakunqaku.

²⁴ Sión llaqtapi yachaqkuna, manañam mayqannikichikpas ninkichikñachu: “Onqochkanim” nispaqa. Diosmi chaypi yachaqkunapa huchanta pampachanqa.