Isaías 3 - CHUYA QELLQA La Biblia en Quechua de Ayacucho 2012

Judawan Jerusalén castigasqa kanankumanta

¹ ¡Allinta qawarikuychik! Tukuy Atiyniyuq Tayta Diosmi Jerusalén llaqtamanta chaynataq Judá nacionmanta, mikuy apamuqninkunata qechunqa; qechunqataqmi tantatawan yakutapas.

² Tayta Diosmi chinkachinqa qari-qari runakunatawan guerrapi peleaqkunata, juezkunatawan profetakunata, qatipaqkunatawan ancianokunata;

³ capitankunatawan ancha reqsisqa runakunata, consejaqkunatawan sumaq obra ruwakunata, suerte tikraqkunatawan layqakunatapas.

⁴ Paykunapa rantinpim Tayta Diosqa jovenkunataña churanqa kamachikunankupaq, warmakunatañataq munaychakunankupaq.

⁵ Runakunam kikinkupura ñakarichinakunqaku, reqsinakuqpurapas cheqninakunqakum, warmakunam yuyaqkunapa contranpi hatarinqaku; usuq runakunam ancha reqsisqa runakunapa contranpi hatarinqaku.

⁶ Chayna kaptinmi wawqellanta hapiruspan hukkaq runa ninqa: “Qampaqa pachayki kachkanraqmi chaynaqa kamachiwayku, qamyá kay purmachisqa llaqtapi kamachikuy”, nispa.

⁷ Payñataqmi hapiqninta ninqa: “Qamkuna nanachikuytaqa manam atiymanchu, wasiypiqa mikunaypas, pachaypas manam kanchu, runakunata kamachinaypaqqa ama churawaychikchu”, nispa.

⁸ Jerusalén llaqtam tuñirun, Judá nacionmi purmarun; chaynaqa tarikun llapa runankuna rimayninkuwanpas ruwayninkuwanpas huchallikuspanku, Tayta Diosta piñachisqankuraykum.

⁹ Qara uya kayninkum paykunataqa acusachkan, Sodoma llaqtapa hinam huchanku sutillata qawakuchkan. ¡Imaynaraq kanqaku! Kikillankum sasachakuykunata maskakurunku.

¹⁰ Allin ruwaqkunatayá niychik: Allinmi kasunki, allinkuna ruwasqaykimantam mikunki, nispa.

¹¹ ¡Imaynaraq kanqaku mana allin ruwaqkuna! Mana allin ruwasqankunaman hinam Dios pagapunqa.

¹² Llaqtaytaqa warmakunallam ñakarichichkan, warmikunañam munaychakuchkan. ¡Ay, llaqtalláy! Kamachisuqnikikunam pantaypi kawsachisuchkanki, kawsakuynikitapas pantaymanmi qewirunku.

¹³ Tayta Diosqa chayllam kachkan llaqtanta juzgananpaq.

¹⁴ Tayta Diosmi llaqtanpi ancianokunawan chaynataq kamachikuqkunawan juicioman yaykuspan ninqa: Qamkunaqa llaqtaytam chaqorunkichik, wakchakunamanta suwakusqaykichiktam wasikichikpiraq pakarunkichik.

¹⁵ Tukuy Atiyniyuq Tayta Diosmi kaynata nin: ¿Imata munaspataq llaqtayta ñakarichinkichik, hinaspa wakchakunatañataq usuchinkichik? nispa.

Jerusalenpi warmikunata castigananmanta

¹⁶ Tayta Diosmi kaynata nin: Sión llaqtapi hatun tukuq warmikuna, umankuta altoman hoqarisparaq puriqkuna, ñawinkuwan engañananpaq qawaqkuna, ñutuchallamanta puriq qewillirakuna, chakinkupi adornokunata sallsallyachistin puriqkuna,

¹⁷ Ñoqa Tayta Dios castigaspaymi paykunapa uma puyukninta isuyachisaq, chay warmikunapa penqayninkutam runakunaman qawachisaq.

¹⁸ Chay punchawmi Tayta Dios chinkachinqa: Chakipi sallsallyaq adornokunata, llullu killaman rikchakuq collarkunata,

¹⁹ aretekunata, brazaletekunata, velokunata,

²⁰ uma wankukunata, chakipi alhajakunata, weqaw watana adornokunata, perfumekunata, amparokunata,

²¹ anillokunata, senqapi aretekunata,

²² fiestapaq suma-sumaq pachakunata, carterakunata, capakunata, uma sukutakunata,

²³ espejokunata, linomanta fino pachakunata, uma wanki adornokunata, chaynataq mantillakunatapas. Tukuy chaykunatam chinkachinqa.

²⁴ Chaynapim perfumepa rantinpi millakuypaq asnayña kanqa, weqaw watana adornokunapa rantinpim waskaña kanqa, sumaqllaña ñaqchasqa kanankumantam umankupas paqlayasqaña kanqa, suma-sumaq pachankupa rantinpim qachqa pachaña kanqa, kuyayllapaq uyankupas caldeasqa fierrowan marcasqañam kanqa.

²⁵ Runaykikunam guerrapi wañunqaku, qari-qari soldadoykikunam peleasqankupi wañunqaku.

²⁶ Llaqtapi runakunam waqaspa lutokunqaku, saqesqa warmi hinam allpapi tiyanqaku.