Isaías 27 - CHUYA QELLQA La Biblia en Quechua de Ayacucho 2012

Israel nación librasqa kananmanta

¹ Chay punchawmi Tayta Diosqa hatu-hatun espadanwan, Leviatanwan sutichasqa millqorayaq maqta uruta wañuchinqa, Leviatanwan sutichasqa apurawman kallpaq maqta uruta sipinqa, wañuchinqataqmi lamar qochapi dragontapas.

² Chay punchawpiyá, miskillaña vino qokuq uvas chakramanta takiychik.

³ Ñoqa Tayta Diosmi chay uvas chakrata sapa kutilla parqopayaspa waqaychani. Mana imapas pasananpaqmi tuta punchaw waqaychani.

⁴ Paypaqqa manam piñakunichu. Sichum kichkayuq qorayuq kaptinqa guerrapi peleaq rispaymi lliwta kañaykamuyman.

⁵ Sichum waqaychanayta munaspaqa ñoqawan amistachun, arí, ñoqawan allinyanakuchun.

⁶ Hamuq punchawkunapim Jacobqa sapichakunqa, Israelmi chikllispa sisanqa rurunkunam kay pachata huntaykunqa.

⁷ Israelpa mirayninkunataqa, Diosqa manam ñakarichirqa paykunapa ñakarichiqninkunata hinachu, wañuchispapas manataqmi wañuchirqa paykunapa wañuchiqninkunata hinachu.

⁸ Aswanqa huklaw nacionman presota apachispam paykunataqa ñakarichirqa. Intipa qespimunan lawmanta manchakuypaq pukumuq wayrawan hinaraqmi qarqorurqa.

⁹ Chaywanpas Jacobpa mirayninkunapa huchantaqa pampachanqam, ichaqa kaykunatam ruwananku: Idolonkupa altarninkunatam isku rumita hina ñutupananku, Asera idolonkutam wikapananku, idolonkupaq incienso kañananku altarkunatam tuñichinanku.

¹⁰ Qaqay-qaqay perqayuq llaqtam kunanqa raqayllaña kachkan, mana runayuqñam purmachkan, paqwaytañam chunnichkan. Animal michinanku purunñam rikurirun, sachapa rapinta mikuspa animalkunapa puñunanñam rikurirun.

¹¹ Sachapa kallmanpas chakiruspaqa pakirunmi, warmikunam chaykunata huñuruspa ninata ratachinku. Mana yachayniyuqmi kay llaqtaqa, chayraykum unanchaqninpas mana llakipayanqachu, nitaqmi paykunataqa kuyapayanqachu.

¹² Chay punchawmi Tayta Diosqa, Eufrates mayumanta Egipto wayqopi mayukama, trigota saruchkaq hina sarunqa, qamkunam ichaqa chulla-chullamanta akllasqa kankichis.

¹³ Hina chay punchawpim, hatun trompetata tocanqaku, hinaptinmi Asiriapi chinkasqakunawan Egiptoman qarqosqakunapas kutimunqaku, Jerusalén llaqtapi Tayta Diosta hatunchanankupaq, sapaqchasqan Sión moqopi Tayta Diosta hatunchanankupaq.