Isaías 25 - CHUYA QELLQA La Biblia en Quechua de Ayacucho 2012

Diosta yupaychanapaq taki

¹ Dios Taytalláy, Diosniymi kanki; sutikita hatunchaspam yupaychayki, ñawpaqmanta admirakuypaq prometesqayki kaqkunatam ruwayman churarunki.

² Llaqtakunatam tuñirachispa pasaypaqta purmarachinki, llaqtapa qaqay-qaqay perqankunatam tuñirachinki, cheqniqniykupa suma-sumaq llaqtankutapas taqmaparunkim, manañam musoqmantaqa hatarichinqakuñachu.

³ Chayraykum takyasqa llaqtakuna yupaychasunki, mana llakipayakuq llaqta kachkaspapas manchakusunkim.

⁴ Qanmi karqanki mana imayuqkunapa amparakunan, wakchakunapa sasachakuyninpi hapipakunan, loco paramanta pakaykuqnin, rupaymanta llantuykuqnin. Mana llakipayakuq runakunapa samatyayninqa poqoy tiempopi sinchi para hinaraqmi.

⁵ Qamqa chunniq allpapi rupay hinaraqmi huklaw nacionmanta hatunchakuq runakunata kumuchinki, imaynam puyu llanturuptin rupay chiriyarun chaynam badulaki runapa pay tukuq kayninta chinkarachinki.

⁶ Tukuy Atiyniyuq Tayta Diosmi Sión moqopi, llapallan nacionkunapaq hatun convidota ruwanqa, miskillaña mikuykunatawan unay watayuq vinotam convidanqa, miskillaña mikuykunatawan suma-sumaq vinotam convidanqa.

⁷ Kay orqopim llaqtakunata tapaq telata llikipanqa, llapa nacionkunapa tapaqnin velotam llikipanqa.

⁸ Tayta Diosmi wañuyta wiñaypaq chinkachinqa, lliw runapa weqentam pichanqa, llaqtanpa penqaypi kasqantam kay pachamanta chinkachinqa. Tayta Diosmi chaynata nin.

⁹ Chay punchawpim ninqaku: ¡Qawariychik, paymi Diosninchikqa! payllapi hapipakusqanchikraykum salvaykuwanchik, chaynaqa, salvawasqanchikraykuyá anchata kusikusun, nispanku.

¹⁰ Tayta Diosmi Sión moqota atiyninwan waqaychanqa; Moab naciontam ichaqa, wanupatapi qopata hina maymi kasqampi saruparunqa.

¹¹ Moabqa allin nadeaq hinaraqmi haywaykachanqapas, nadeaspa sapa maki hoqariyninmi ukuman apaykunqa, chaynatam Tayta Diosqa hatun tukuyninta tuñichinqa.

¹² Diosmi alto-alto mana yaykuy atina perqankunta tuñichinqa, allpayanankamam pampapi ñuturunqa.