Isaías 20 - CHUYA QELLQA La Biblia en Quechua de Ayacucho 2012

Egiptotawan Etiopiata Asiria nación vencesqanmanta

¹ Huk kutipim Asiria nacionpa reynin Sargón, llapallan tropankunapa capitanninta Asdod llaqtaman kacharqa, hinaptinmi chay llaqtapa contranpi peleaspan vencerurqa.

² Chay watapim Amozpa churin Isaiasta Tayta Dios kaynata kamachirqa: Qachqa pachaykitawan usutaykita chustukuy, nispa. Hinaptinmi Isaiasqa chaynata ruwaspan mana pachayuq chaynataq qala chakilla purirqa.

³ Chaymi Tayta Dios nirqa: Serviqniy Isaiasmi mana pachayuq chaynataq qala chakilla kimsa watapuni purirqa. Chaytam ruwarqa Egipto nacionta chaynataq Etiopía nacionta imam pasananmanta qawachinanpaq.

⁴ Chaynatam Asiria nacionpa reyninpas Egipto nacionpi runakunatawan Etiopía nacionpi kaqkunata presota apanqa; joventapas, sipastapas mana pachayuqta, qala chakillata hinaspa qalallatam apanqa, chaynapi Egipto nacionqa penqaypi kananpaq.

⁵ Hinaptinmi Etiopía nacionpi hapipakuqkunawan Egipto nacionmanta alabakuqkunapas mancharikuspanku penqakuywan kanqaku.

⁶ Chay tiempopim lamar qochapa patanpi yachaqkuna ninakunqaku: Hapipakusqanchik nacionta qawaychik. Asiria nacionpi reymanta librawananchikpaqmi chay nacionman hapipakuq kallpaq kanchik, ¿imaynatataq kunanqa lluptisunchik? nispanku.