Isaías 19 - CHUYA QELLQA La Biblia en Quechua de Ayacucho 2012

Egiptopaq willakusqanmanta

¹ Isaiasmi Egipto nacionta imam pasananmanta kaynata nirqa: Qawariychik: Puyupi silladam Tayta Diosqa Egipto nacionman utqayllamanña hamuchkan, llapa idolonkupas paypa qayllanpim katkatatanku, Egipto runakunapas mana kallpayuqñam rikurirunku.

² Tayta Diosmi kaynata nin: Egipto runakunatam kikinkupurata reqsinakuqpurata, llaqtapurata hinaspa nacionpurata peleanachisaq.

³ Egipto runakunapa yuyaymanaynintam chinkarachisaq, imapas ruway tanteasqankutam yanqacharusaq, hinaptinmi idolonkuta, layqakunata tapunqaku, wañuqkunapa almankunata tapukunqaku.

⁴ Egipto llaqtatam hapiykachisaq, mana llakipayakuq, mana kuyapayakuq reymanña, ñakarichispa paykunapi munaychakunanpaq, nispa. Tukuy Atiyniyuq Tayta Diosmi chaynata nin.

⁵ Nilo mayupa yakunmi chinkarunqa, pasaypaqtam chay mayuqa chakirunqa.

⁶ Yarqakunam asnarirunqa, wayqokunapi yakukunam chakirunqa, Egiptopi Nilo mayum chinkarunqa, soqoskunawan totorakunam chakirunqa.

⁷ Nilo mayupa patanpi saylla qorakunam chakirunqa, tarpuykunapas chakiruspanmi chinkarunqa.

⁸ Nilo mayupi challwaqkunam llakipi tarikunqaku, anzuelowan challwaqkunam waqanqaku, atarrayawan challwaqkunam paqwayta eqoyanqaku.

⁹ Lino telata ruwaqkunawan malla awaqkunapas ayayarunqakum.

¹⁰ Awapakuspa ganakuqkunapas hukmanyarunqakum, llamkapakuqkunapas llakisqa sonqoyuqmi kanqaku.

¹¹ Zoán llaqtapi kamachikuqkunaqa llumpay roqrukunam. Rey Faraonpa yachaysapa consejeronkunapas mana pasaqtam consejanqaku. Ninkuraqmi: Yachayniyuqmi ñoqaykuqa kaniku, ñoqaykuqa ñawpaq reykunapa castanmi kaniku, nisparaq.

¹² Egipto nacionpa reynin, ¿maypitaq kachkan yachaysapa runaykikunaqa, chaynapi Tukuy Atiyniyuq Tayta Diospa Egiptopa contranpi imam tanteasqanta willasunaykipaq?

¹³ Zoán llaqtapi kamachikuqkunaqa roqrukamam, Menfis llaqtapi kamachikuqkunaqa lliwmi engañarachikunku. Ayllunkupi kamachikuqkunaqa, Egipto nacionta pantayman apaqkunam.

¹⁴ Tayta Diosmi pantachikuq espirituta paykunapi rikurirachirqa, chaymi Egipto nacionta tukuy ruwasqanpi pantarachin, imaynam sinka runa kutichispa tampikachan, chayna kanankama.

¹⁵ Egipto nacionpa allinninpaqqa manam pipas ima ruwaytapas atinqachu, palmera sachapas nitaq totorapas uma kaqpas nitaq qepa kaqpas.

¹⁶ Chay punchawmi Egipto runakuna, warmikuna hina llumpay mancharisqallaña katkatatanqaku. Paykunata Tukuy Atiyniyuq Tayta Dios castigasqarayku.

¹⁷ Egipto runakunam Judá nacionniyuq runakunata paqwayta manchakunqaku, paykunamanta yuyarispallankupas sustochakunqakum, Egipto nacionpa contranpi Tukuy Atiyniyuq Tayta Dios tanteasqanrayku.

¹⁸ Chay tiempopim Egiptopi pichqa llaqtakuna kanqa Canaán lawpa rimayninta rimaqkuna. Paykunam Tukuy Atiyniyuq Tayta Diosmanta mana rakikunankupaq juranqaku. Chay llaqtakunapa huknintam “Inti llaqtawan” sutichanqaku.

¹⁹ Chay punchawmi Egipto nacionpa chawpinpi Tayta Diospaq sapaqchasqa huk altar kanqa, linderonpipas Tayta Dios yuyarina señaltam churanqaku.

²⁰ Chay señalmi paykunapaq testigo kanqa Tayta Dios chawpinkupi kasqanta yachanankupaq. Chaymi ñakariyninkupi Tayta Diosta mañakuptinku salvaqninkuta kachamunqa, hinaptinmi paykunata libranqa.

²¹ Tayta Diosmi Egipto runakunawan reqsichikunqa, paykunapas Diosta reqsiykuspankum chay punchawpi yupaychanqaku. Animalkunatam wañu-chipunqaku, kawsaykunatam ofrecenqaku, hinaspam prometekuspanku cumplinqaku.

²² Tayta Diosmi Egipto runakunata onqochinqa, chaywanpas kikillantaqmi hampiykunqa. Tayta Diosman kutirikuspa mañakuptinkum paykunataqa sanoyachinqa.

²³ Chay punchawpim Egipto nacionmanta Asiria nacionkama hatun ñan kanqa, hinaptinmi Asiria nacionpi kaqkuna Egiptoman rinqaku, Egiptopi kaqkunapas Asiriamanmi rinqaku. Chaynapim iskaynin llaqta kuskanku Tayta Diosta yupaychanqaku.

²⁴ Chay punchawmi Egipto nacionwan Asiria nación hinaspa Israel nación, kay pachapi nacionkunapaq bendición kanqaku.

²⁵ Tukuy Atiyniyuq Tayta Diosmi paykunata kaynata nispan bendecinqa: “Ñoqam bendecini Egipto runaykunata, bendecinitaqmi unanchasqay Asiria naciontapas chaynataq akllakusqay Israel naciontapas”, nispa.