Isaías 18 - CHUYA QELLQA La Biblia en Quechua de Ayacucho 2012

Etiopiapa contranpi willakusqanmanta

¹ ¡Ay, imaynaraq kanqa chuspikunapa warwaryanan nacionqa! ¡Etiopía law mayukunapa waklawninpi kaq nacionqa!

² Totoramanta balsakunapim Nilo mayunta utqayman willakuqkunata kamachinku. Utqayman riychik hatunkaray llusarayaq uyayuq runakunaman, lliwpa manchakunan kallpasapa llaqtaman, maypipas llaqtakunata purmachispa allpan mirachikuqman, mayusapallaña llaqtaman.

³ Kay pacha muyuriqpi kawsaq runakuna, orqokunapi banderata sayachiptinkum qawankichik, trompetata tocaptinkum uyarinkichik.

⁴ Tayta Diosmi kaynata niwarqa: Maymi kasqaymantam hawkalla qawamusaq, para usyayta llipipipispa kanchariq inti hina, cosecha tiempo rupaypi sulla hina.

⁵ Uvaspas sisayta tukuruspa, rurunkunapas poqoyta qallaykuptin, manaraqpas cosechayta qallarichkaptinkum, kallmankunata machetewan rawmanqa, ikllipankunatapas kuchuparuspam wischunqa.

⁶ Chaynatam ullachkukunapaq orqokunapi saqerunqa, purunpi animalkunapaqmi saqerunqa. Chiraw tiempopim pawaq animalkuna chaykunata mikunqa, poqoy tiempopim purun animalkuna chaykunata mikunqa, nispa.

⁷ Chay tiempopiqa, hatunkaray llusarayachkaq uyayuq runakunam, lliwpa manchakunan kallpasapa runakunam, mayunkamallaña llaqtayuq runakunam, maypipas llaqtakunata purmachispa allpankuta mirachiq runakunam, Sión moqoman, Tukuy Atiyniyuq Tayta Diosman, ofrendankuta apamunqaku.