Isaías 17 - CHUYA QELLQA La Biblia en Quechua de Ayacucho 2012

Damascopa contranpi willakusqanmanta

¹ Damasco llaqtapa contranpim Isaías kaynata nirqa: Damasco llaqtaqa manañam llaqtañachu kanqa, aswanqa tuñichisqa perqakunallañam montorayanqa.

² Aroer llaqtaqa mana runayuqñam chunninqa, animalkunapa mikunanñam kanqa, mana pipa manchachisqanmi chaypiqa animalkunallaña puñunqa.

³ Efraín llaqtapa, Damasco llaqtapa, qaqay-qaqay perqankunapas puchukanqam. Siria nacionpi puchuqñataqmi, Israel llaqta kaqlla kanqa. Tukuy Atiyniyuq Tayta Diosmi chaynata nin.

Israel castigasqa kananmanta

⁴ Chay punchawkunapiqa Jacobpa hatunchasqa kayninmi asllayanqa Tukuy ima kapuqninpas tukurunqam.

⁵ Imaynam trigota rutuspa wichiqnintañataq makinwan pallapaykunku, otaq Refaim qechwapi trigota cosechanku, chaynam kanqa.

⁶ Imaynam aceitunata pallaruptinku iskay-kimsa rurullaña qeparun, otaq allin ruruq kallmapi tawa pichqallaña puchurun, chayman rikchakuqmi kanqa. Israelpa yupaychasqan Tayta Diosmi chaynata nin.

⁷ Chayna punchawkuna kaptinmi runakuna unanchaqninta yuyarispa maskanqaku, Israelpa Chuya Diosnintam qawarinqaku.

⁸ Makinkuwan ruwasqanku capillakunatapas, dedonkuwan llunkisqanku Asera idolonkutapas, intiman rikchakuq idolonkutapas, manañam qawarinqakuñachu.

⁹ Chay punchawkunapim Israelpa allin murallasqa llaqtankunapas wichirispa purmanqa, imaynam Canaán allpapi runakuna, Israelta manchakuspanku llaqtankuta purmachkaqta saqesqankupi hina.

¹⁰ Israel, salvaqniki Diostam qonqarunki, amparakunaykipaq kaqtam mana yuyankichu. Kuyayllapaq plantakunatam plantakunki, huklaw nacionmanta apamusqa miskillaña ruruq sachapa takarpunkunataraqmi tarpunkipas,

¹¹ tarpusqayki punchawllam wiñarachinkipas, paqarintillanmi rururachinkipas. Ichaqa mana hampiy atina onqoy hapirusqanraykum mana imatapas cosechankiñachu.

¹² Achka llaqtakunapa chaqwakuyninmi uyarikun, lamar qochapa qapariynin hinaraq. Achka runakunapa qapariyninmi uyarikun, nana-nanaq lloqllapa kunrururuynin hinaraq.

¹³ Chayman rikchakuqña hamuptinkupas, Dios qaqchaptinmi karukunamanraq lluptinqaku, wayrapa apasqan qopa hinaraq, sinchi wayrapa hoqarisqan allpa hinaraq.

¹⁴ Chisinkuytam mancharikuyllapaqña rikurirunku, ichaqa manaraqpas achikyaytaqa chinkarunkuñam. Chaynam llapa ñakarichiqninchikpas chaynataq haykam suwawaqninchikpas chinkarunqaku.