Isaías 16 - CHUYA QELLQA La Biblia en Quechua de Ayacucho 2012

Moab runakuna Judaman ayqekusqankumanta

¹ Nacionpi kamachikuqman malta carnerota apachiychik, chunniqpi Sela llaqtamanta Sión moqoman apachiychik.

² Imaynam qesanmanta mancharichisqa urpikuna pawanku, chaynam Moab llaqtapi warmikunapas Arnón mayu patanpi muyuchkanku.

³ Sión moqopi yachaqkunatam ninku: Pakaykuwanaykikupaqyá tanteanakuychik, waqaychaykuwanaykikupaqyá rimanakuychik, chawpi punchawpiyá tuta hina llantuykuwayku, qanman ayqemuqkunatayá pakaykuwayku, qanman lluptimuqkunataqa amayá traicionawaykuchu.

⁴ Moab nacionmanta ayqemuqkunayá qamkuna ukupi yachachunku. Wañuchiqkunamantayá pakaykuychik. Ñakarichisqa kayniyku tukuruptinqa, llaqtakuna purmachiq tukuruptinqa, chaynataq enemigopas nacionmanta pasaruptinqa,

⁵ Diosmi hatun kuyakuyninpi huk kamachikuqta Davidpa mirayninmanta churanqa. Paymi juzgaspan allin arreglota ruwanqa, runakuna allinta ruwanankupaqmi hikutanqa, nispanku.

⁶ Moab llaqtapa hatun tukuyninqa yachasqam kachkan. Llumpaymi hatun tukuspa yanqa rimaq kayninpas, llulla kayninpas manam takyanqachu.

⁷ Chayraykum Moab runakuna llaqtankumanta qaparkachanqaku. Kir-hareset llaqtamanta kaq ñupupasqa uvas pasaskunamantam anchallataña waqanqaku.

⁸ Hesbonpa chakrankunapi plantakunam qawirun, Sibmapi uvas huertakunam pasaypaqta qawirun, nacionkunapi munaychakuqkunam ikllimuqkunatapas sarutyarun, kallmankunapas Jazer llaqtakama mastarikuspam chunniqkama chayarqa. Lamar qochapa waklawninkamaraqmi chayarurqa.

⁹ Chayraykum Sibma llaqtapi uvas huertamanta, Jazer llaqtapi kaqkunawan kuska ñoqapas waqachkani. Hesbón llaqta, Eleale llaqta, qamkunaraykum weqeyta chaqchuchkani. Tarpukuynikikunapa hawanpim, cosechaykikunapa hawanpim guerrapi peleaqkuna qaparirqaku.

¹⁰ Kusikuyninkum tukurunña, tarpusqa chakrakunapi qapariyninkum tukurunña, uvas huertankupi takiyninkum manaña kanñachu, uvas sarunankupipas manañam sarunqakuñachu, vinopaq uvastapas manañam sarunqakuñachu. Diosmi kusikuyninkutapas tukurachin.

¹¹ Chayraykum Moab nacionmanta arpa hina sonqoy waqan, Kir-haresetmantam arpa hina sonqoy waqan.

¹² Moab nacionpi kaqkunaqa moqokunapi capillakunaman yaykuspapas, pisipanankukama santuarionkupi mañakuspapas, manam ima ruwaytapas atinqakuchu.

¹³ Chaynatam ñawpaq tiempokunapi Moab nacionpa contranpi Tayta Dios rimarqa.

¹⁴ Kunanñataqmi Tayta Dios kaynata nin: Kimsa watamantam, llamkapakuq runapa yupasqan watamanta hina, Moab nacionpa hatun kayninqa tuñichisqa kanqa, nana-nanaq runayuq kaspapas penqayman churasqam kanqa. Chaymanta puchuqkunapas mana atiyniyuq pisi runakunallam kanqaku, nispa.