Isaías 15 - CHUYA QELLQA La Biblia en Quechua de Ayacucho 2012

Moabpa contranpi willakusqanmanta

¹ Moab llaqtapa contranpim Isaías kaynata willakurqa: Ar llaqtata ñutusqanku tutam Moab nación tuñichisqa karqa. Kir llaqtata vencesqanku tutam Moab nación purmachisqa karqa.

² Bayitwan chaynataq Dibonwan sutichasqanku moqopi capillakunamanmi waqaq qespirqaku. Moab castakunam Nebo llaqtarayku, Medeba llaqtarayku waqanqaku. Llapallankum umankupas, barbankupas rutusqa kachkanku.

³ Qachqa pachayuqmi callekunapi purinku. Wasikunapa hawankunapipas, plazakunapipas, manaña sayaypas atinankukamam lliw waqachkanku.

⁴ Jahaza llaqtayuqkunapas uyarinankukamaraqmi, Hesbonpi chaynataq Eleale llaqtapi yachaqkunapas waqachkanku. Chayraykum Moab soldadokuna qaparkachanku, llumpay manchakuymantam katkatatanku.

⁵ Moab nacionraykum sonqoy qaparin. Runankunam kimsa watayuq vaquilla kaqllaraq Zoar llaqtakama lluptichkanku. Luhit wichaytam waqastin qespichkanku. Horonaim llaqtaman riq ñantam llakikuypi kasqankurayku qaparispa richkanku.

⁶ Nimrim wayqopi yakupas chakirusqanraykum qorakunapas lliw chakirunña. Manaña ikllimunankamam pastopas chakirun.

⁷ Chayraykum runakunaqa wasinkupi huñusqanku kapuqninkutapas, chaynataq ima pakasqankutapas Saucellaña wayqopa waklawninmanraq astachkanku.

⁸ Moabtam kuchun-kuchun llakillana inturun, Eglaim llaqtakamam qapariyninku uyarikun, Beer-elim lawkamam qayakuyninku uyarikun.

⁹ Dimón llaqtapi yakukunapas yawarwan huntañam kachkan chaywanpas Dimón llaqtamanqa hatun castigotaraqmi kachamusaq. Moab llaqtamanta ayqeqmanmi leonta kachaykusaq, chay nacionpi puchuqkunatam leonkuna mikunqa.