Isaías 14 - CHUYA QELLQA La Biblia en Quechua de Ayacucho 2012

Israelpa mirayninkuna allpankuman kutimunankumanta

¹ Tayta Diosmi Jacobpa mirayninkunamanta llakipayarikunqa, Israel runakunata yapamanta akllaykuspanmi allpankupi kawsachinqa. Huklaw nacionmanta kaqkunam Jacobpa castankunaman hukllawakunqa.

² Achka nacionkunam Israelpa mirayninkunata chaskispanku nacionninkuman riysinqaku. Israelpa mirayninkunañataqmi chay runakunata warmitapas qaritapas criadonkupaqña hapikuykunqaku, chaynaqa kanqaku Tayta Diospa qosqan allpapim. Presochaqninkutam preso-chanqaku, ñakarichiqninkunapim mu-naychakunqaku.

Babilonia reyta asipayasqankumanta

³ Ñakariynikichikmantapas, waqasqay-kichikmantapas, esclavo kasqaykichikmantapas Tayta Dios librasuptikichikmi,

⁴ Babiloniapi reypa contranpi kaynata takispa asipayankichik: ¡Imaynamá ñakarichikuq reyqa kaynaqa tukurun! ¡Imaynamá hatun tukuspa ruwasqanpas kaynaqa tukurun!

⁵ Mana allin runapa atiynintam kaspita hina Tayta Dios pakiparun,

⁶ payqa piñakuyninpim mana hampiy atina heridakunawan llaqtakunata ñakarichirqa, sinchi piñakuywanmi nacionkunapi munaychakurqa, mana llakipayarispam nacionkunata qatikacharqa.

⁷ Kunanqa kay pachapas hawkañam kachkan, kusikuymantam takichkan.

⁸ Ciprés sachakunapas, Líbano orqopi cedro sachakunapas, qampa wichisqaykimantam kusikuspa kaynata ninku: “Qampa wañusqayki punchawmantam manaña pipas hamuspa kuchuwankuñachu”, nispanku.

⁹ Wañusqakunapa kasqan sitiopas qanmantaqa mancharikunmi, wañusqakunapas rikcharispam chaskisunaykipaq lloqsimunku. Wañusqakuna ukupi reykunapas hatarinkum, nacionkunapi llapallan reykunapas tiyanankumantam chaskisunaykipaq hatarinku.

¹⁰ Llapallankum rimarispa nisunki: ¿Qampas ñoqayku hina pisi kallpayuqchu rikurirunki? ¿Ñoqayku hinachu rikurirunki?

¹¹ Hatunchakuq kaynikitapas, arpaykikunapa waqaynintapas wañuymi puchukarachin, puñunayki mastaykipas urullañam, hawaykipi qataykikunapas urullañam.

¹² Achikyaq chaska ¡Imaynamá cielomantaqa wichiykamunki! Nacionkunata purmachiq kachkaspaykiqa, ¡imaynamá kay pachamanqa wischurachikamunki!

¹³ Qanmi sonqoykipi nirqanki: Ñoqam hanaq pachaman qespirusaq, Tayta Diospa chaskakunapa altonpim tiyanayta churamusaq, norte lawman rispaymi tiyamusaq, dioskunapa huñunakunanku orqopim tiyamusaq.

¹⁴ Alto-altopi kaq puyukunapa altonmanraqmi seqarusaq, “ñoqaqa hatu-hatun Dios hinam kasaq”, nispa.

¹⁵ Aswanqa wañusqakunapa kasqanmanmi wischuykachikunki, uku-ukukamaraqmi wikapaykachikunki.

¹⁶ Qamta rikusuqnikikunam qawarayasuspayki yuyaymanaspanku ninqaku: ¿Kaychum kay pachapi runakunata llumpayta manchachiq qarisu? ¿Hinaspa nacionkunatapas chaqwaq qarisu?

¹⁷ ¿Paychu kay pachata chunnichispan llaqtakunatapas tuñichirqa? ¿Paychu presokunatapas wasinkuman kutinanta mana munaq runa karqa? nispanku.

¹⁸ Nacionkunapa reyninkunaqa sepulturankupim sapakama honrasqa hawka chutarayachkanku.

¹⁹ Qanmi ichaqa mana valeq kallma hina sepulturaykimanta wischurachikamunki, espadawan tuksipaspa wañuchisqankupa pachan hina, sarutyasqa aya kaqlla. Uku-uku uchkumanmi wischusqa karunki.

²⁰ Llaqtaykita pasaypaqta purmachisqaykiraykum, runaykikunata wañuchisqaykiraykum, mana reykunapa pampakunanpichu pampakunkipas. Mana allin runakunapa mirayninqa wiñaypaq qonqasqam kanqaku.

²¹ Taytankupa huchanrayku wawa-churinkuta wañuchinapaqyá allichakuychik. Yanqañataq kaynakunaqa allpata hapikurunmanku; kaynakunaqa amaña maypipas llaqtayachunkuchu.

²² Tukuy Atiyniyuq Tayta Diosmi nin: Ñoqam paykunapa contranpi hatarisaq, churinkunatawan willkankunatapas lliwtam tukurusaq, Babilonia naciontam manaña pipapas kanankama chinkarachisaq,

²³ erizo animalkunapa yachananmanñam tikrarusaq, asnarichkaq mitupa kanantañam ruwarusaq. Pichanawan qopata pichachkaq hinam chinkachisaq, Tukuy Atiyniyuq Tayta Diosmi chaynata nin.

Asiria nación purmachisqa kananmanta

²⁴ Tukuy Atiyniyuq Tayta Diosmi kaynata nin: Cheqaptapunim tanteasqayman hina ruwasqa kanqa, ñoqapa nisqayman hinam cumplisqa kanqa.

²⁵ Hina allpaypim Asiria runakunata puchukarachisaq, orqoykunapim paykunata saruparusaq. Yugonkupas manañam llaqtayta ñakarichinqañachu, llasaq qepi churasqankupas manañam llaqtayta ñakarichinqañachu.

²⁶ Llapallan allpa pachapa contranpim kaynata tantearuni. Llapallan llaqtakunata puchukachinaypaqmi makiyta haywarini.

²⁷ Tukuy Atiyniyuq Tayta Dios chaynata tantearuptinqa, ¿pitaq harkakunman? makinta haywariptinqa, ¿pitaq asurachinman?

Filisteapa contranpi willakusqanmanta

²⁸ Rey Acazpa wañusqan watapim Isaías kaynata willakurqa:

²⁹ Filistea llaqtayuqkuna, maqasuqnikichikpa tawnan pakirusqanraykuqa amayá kusikuychikchu. Maqta urupa sapinmantaqa aswan kachukuq maqta ururaqmi lloqsimunqa, pawaq maqta ururaqmi lloqsimunqa.

³⁰ Qanmanta puchuqkunatam yarqaymanta wañuchisaq, chaymanta puchuqkunatañataqmi ñutusaq. Wakchakunatam ichaqa allin mikusqata uywasaq, mana imayuqkunañataqmi hawkallaña samakunqaku.

³¹ ¡Filisteokuna, qapariyllawanña waqaychik, llakimanta qaparkachaychik, nanaywan qewipakuychik! Norte lawmantam qosni hinaraq tropakuna kallpamuchkanku, soldadokunapas tropanmanta mana chullaykuspam hamuchkanku.

³² Chay nacionkunamanta kachamusqankumanqa ¿imanisuntaq? Nisunchikqa: Tayta Diosmi Jerusalén llaqtataqa hatarichirqa, chaymanmi ñakarichisqa runankunapas amparakunqaku, nispam.