Hechos 3 - CHUYA QELLQA La Biblia en Quechua de Ayacucho 2012

Suchu runapa sanoyasqanmanta

¹ Huk punchawmi kimsa hora tardeykuyta, Dios mañakuna horata, Pedrowan Juan temploman rirqaku.

² Chay templopa punkunmanmi nacesqanmanta suchu runata sapa punchaw apaqku, hinaspam Hermosawan sutichasqa punkupi churaqku, chaynapi yaykuq runakunamanta limosnata mañakunanpaq.

³ Chay suchu runam Pedrotawan Juanta temploman yaykuchkaqta rikuruspan limosnata mañakurqa.

⁴ Pedrowan Juanñataqmi chay suchu runata qawarayaykurqaku, hinaptinmi Pedro nirqa: Qawawayku, nispa.

⁵ Suchuñataqmi paykunata qawarayarqa imallapas qoykunankuta suyaspan.

⁶ Pedroñataqmi nirqa: Manam kanchu qoriypas nitaq qollqeypas, aswanqa kapuqllaytam qosqayki: Nazaretmanta kaq Jesucristopa sutinpiyá hatarispayki puriy, nispa.

⁷ Chaynata nispan alleq makinmanta hapiykuspa aysariykuptillanmi cha-kinkunawan moqo tullunkuna kallpata hapirurqa.

⁸ Hinaptinmi chay runaqa pawarispan puriyta qallaykurqa. Paykunawanmi temploman yaykurqa puristin, pawaykachastin hinaspa Diosta yupaychastin.

⁹ Chaymi lliw runakuna puriqtaña hinaspa Dios yupaychaqtaña rikuspanku,

¹⁰ reqsirurqaku chay runaqa templopa “La Hermosa” sutiyuq punkunpi tiyaykuspan limosna mañakuq kasqanta. Chay runata puriqtaña rikuruspankum mana ima niytapas atispanku admirakurqaku.

Salomón sutiyuq hatun portalpi Pedropa rimasqanmanta

¹¹ Chay sanoyaruq runam Pedrotawan Juanta mana kacharispa qatikacharqa. Hinaptinmi lliw runakuna admirakuspanku paykunaman huñunakururqaku Salomonwan sutichasqanku punkupi.

¹² Pedroñataqmi hamusqankuta qawarispan nirqa: Israelpa mirayninkuna, ¿imanasqataq admirasqallaña kachkankichik? ¿Imanasqataq ñoqaykuta qawarayawachkankiku? Manam kikillaykumantachu, nitaqmi atiyniykuwanchu kay runataqa purirachiniku.

¹³ Aswanqa ñawpaq taytanchik Abrahampa, Isaacpa hinaspa Jacobpa yupaychasqan Diosmi serviqnin Jesusta hatuncharqa. Paytam autoridadkunaman qoykurqankichik, gobernador Pilato librayta munaptinpas harkakurqankichikmi.

¹⁴ Jesusqa Chuya hinaspa justo kachkaptinmi Pilato libraykunanta harkakuspa runa wañuchiq runataraq kacharinanpaq mañakurqankichik.

¹⁵ Chaynapim kawsay qokuq Jesusta wañuchirqankichik. Ichaqa Dios Taytam kawsarichimurqa, chaymi Jesús kawsarimusqan rikusqaykumanta testigo kaniku.

¹⁶ Paypa sutinpim kay rikusqaykichik hinaspa reqsisqaykichik suchu runa sayarirun. Paypa sutinpim hinaspa payman iñisqanraykum kay runaqa pasaypaqta sanoyarun kunan qawasqaykichikpi hinapas.

¹⁷ Wawqekuna, ñoqaqa sumaqtam yachani, qamkunapas chaynataq ka-machiqnikichikkunapas pim Jesús kasqanta mana yachasqaykichikraykum wañurachirqankichik.

¹⁸ Chaynapim ñawpaqmantaraq llapallan profetankunapa imaynam Cristopa ñakarinanmanta nisqankuta Dios cumplichirqa.

¹⁹ Chay-naqa, huchaykichikmanta wanakuspayá Diosman kutirikuychik, chaynapi tukuy huchaykichik chinkachisqa kaptin hamuq punchawpi Señorpa hawkayaynin hamusunaykichikpaq.

²⁰ Chaynataqa ruwanqa Jesucristota qamkunaman kachamuspanmi. Chaytaqa ñawpaqmantaraqmi willasurqankichikña.

²¹ Jesucristoqa hanaq pachapiraqmi kamunan, tukuy imakunatapas ñawpaqpi hina Dios allichanankama, chaytaqa ñawpaq tiempopi profetankunatakamam nirqaña.

²² Moisesmi ñawpaq taytanchikkunata nirqa: “Señorninchik Diosmi ayllunchikkunamanta huk profetata ñoqata hina hatarichinqa. Chaynaqa, paypa nisusqaykichiktam lliwta kasukunkichik.

²³ Pipas chay profetapa nisqanta mana kasukuqtaqa Diosmi llaqtanmanta pasaypaqta chinkachinqa”, nispa.

²⁴ Llapallan profetakunam Samuelmanta qallaykuspa qatinasninpi kay punchawkunapi imam pasakunanmanta rimarqaku.

²⁵ Qamkunaqa profetakunapa castanmi kankichik, qamkunapaqmi pactota Dios ruwarqa ñawpaq taytaykichikkunawan, hinaspam Abrahamta nirqa: “Kay pachapi llapallan ayllukunam miraynikirayku chaninchasqa kanqaku”, nispa.

²⁶ Churinta Dios kawsarichimuspanmi puntataqa qamkunaman kachamurqa bendecisunaykichikpaq, chaynapi sapakama huchaykichikmanta wanakunaykichikpaq, nispa.