Hechos 28 - CHUYA QELLQA La Biblia en Quechua de Ayacucho 2012

Malta sutiyuq islapi Pablopa kasqanmanta

¹ Lliwniyku salvakuruspaykuñam yacharurqaniku chay islapa sutinqa Malta kasqanta.

² Chay islapi yachaqkunam kuyakuyllawanña chaskiykuwarqaku, paraptin chirimusqanraykum ninata ratachispa niwarqaku: Lliwchaykichikyá qonikuychik, nis-panku.

³ Pabloñataqmi chaki yantata hoqariykuspan ninaman hinaykuchkarqa, hinaptinmi venenoyuq maqta uru ninamanta ayqechkaspan Pablopa makinman wankukururqa.

⁴ Chay islapi yachaqkunañataqmi Pablopa makinpi maqta uru warkurayaqta rikuspanku ninakurqaku: Kay runaqa cheqaptapas runa wañu-chiqchusmi kanman, chaychusmi lamar qochamanta librakuruptinpas justicia ruwaq mamacha mana kawsananta munanchu, nispanku.

⁵ Pablom ichaqa chay maqta uruta ninaman taspiykurqa, paytaqa manam imanarqachu.

⁶ Lliwchankum suyachkarqaku punkipakurunqach otaqchá qonqayta wañusqa wichiykunqa, nispanku. Unayniqmanta manaña imapas pasaptinmi piensarurqaku Pabloqa huk dios kasqanta.

⁷ Chay islapi kamachikuqmi karqa Publio sutiyuq, paypa chakrankunam ñoqaykupa hichpallaykupi karqa. Chaymi samaykachiwaspanku kimsa punchawpuni atiendeykuwarqaku.

⁸ Publiopa taytanmi camapi calenturawan hinaspa diarreawan kachkarqa. Pablom watukuspan Diosta mañapurqa, paypa umanman makinta churaykuptinmi sanoyarurqa.

⁹ Chay islapi yachaq wakin onqoqkunapas chayta yacharuspankum Pabloman hamurqaku hinaspam sanoyarqaku.

¹⁰ Paykunam llumpayta agradecekuwaspanku kuyakuyninkuta qowarqaku. Huk barcopiña lloqsiptiykum tukuy ima pisiwaqniykuta qowarqaku.

Roma llaqtaman Pablopa chayasqanmanta

¹¹ Chay islapi kimsa killa karuspaykum Alejandría llaqtamanta hamuq barcopiña lloqsirqaniku, chay islapim samachkarqa poqoy tiempo pasanankama. Chay barcopa umanpim Cástor chaynataq Pólux dioskunapa rikchayninkuna llaqllasqa kasqa.

¹² Barcopa sayanan Siracusa llaqtaman chayaruspaykum kimsa punchaw qeparqaniku.

¹³ Chaymantam rirqaniku lamar qochapa patallanta Regio llaqtaman chayanaykukama. Paqarinnintin punchawñataqmi qepayku lawmanta wayramuptin iskay punchawpi Puteoli llaqtaman chayarurqaniku.

¹⁴ Chaypim wakin iñiqmasinchikkunata tarirqaniku, hinaptinmi ruegawarqaku huk semana paykunawan kanaykupaq. Chayñam Roma llaqtaman chayarqaniku.

¹⁵ Roma llaqtapi iñiqkunam chayanaykuta yachasqakuña hinaspam “Apio Foro” nisqa plazakama taripamuwasqaku, wakinñataqmi “Kimsa Taberna” nisqa sitiokama taripamuwarqaku. Paykunata Pablo rikuykuspanmi Diosman graciasta qospan aswanraq kallpanchakurqa.

¹⁶ Roma llaqtaman chayaruptiykum Pablota saqeykurqaku huk soldadopa cuidasqan sapaq wasipi yachananpaq.

Roma llaqtapi Pablopa willakusqanmanta

¹⁷ Chayasqaykumanta kimsa pun-chawmanmi Romapi judiokunapa kamachiqninkunata Pablo qayachimurqa, huñunakuruptinkum nirqa: Wawqeykuna, ñoqaqa manam imatapas ruwarqanichu ayllunchikkunapa contranpiqa otaq ñawpa taytanchikkunapa costumbrenkunapa contranpiqa, chaywanpas castanchikkunam Jerusalén llaqtapi presota entregawarqaku Roma llaqtayuq kamachikuqkunaman.

¹⁸ Chaymi paykuna tapuwaspanku wañuchiwanankupaq hinaqa mana imatapas tarispanku kachaykuwayta munawarqaku.

¹⁹ Aswanqa castanchikkuna chayta mana munaptinkuñataqmi kikin rey Cesarña juzgawananpaq mañakurqani. Chaywanpas manam ayllunchikkunata acusanaypaqchu.

²⁰ Chaynapim qayachimurqaykichik qamkunawan tupaykuptinchik willanaypaq. Israel miraykunapa suyasqanku hamurusqanmanta willasqayraykum kay cadenawan watasqa kachkani.

²¹ Hinaptinmi paykunañataq nirqaku: Qanmantaqa manam ima cartatapas Judea lawmantaqa chaskirqanikuchu, manataqmi mayqan llaqtamasinchikkuna hamuqpas qampa contraykipiqa imatapas niwarqakuchu.

²² Ichaqa imam piensasqaykitam uyariyta munaniku, ñoqaykuqa yachanikum tukuy hinastinpi iñiqkunapa contranpi rimasqankuta, nispanku.

²³ Chaykunamanta rimanankupaq huk punchawtaña akllaruptinkum, Pablopa samakusqanman achka runakuna hamurqaku, hinaptinmi tutapaymanta tardeykuqkama Diospa munaychakusqanmanta paykunaman willarqa. Moisespa hinaspa profetakunapa qellqasqanta qawachispanmi Jesusmanta convencechiyta munarqa.

²⁴ Hinaptinmi wa-kinqa Pablopa nisqanta creerqaku, wakinñataqmi mana creerqakuchu.

²⁵ Mana huk sonqolla kaspa asurikuptinkum Pablo nirqa: Allintapunim ñawpaq taytanchikkunamanqa Chuya Espíritu profeta Isaiasnintakama kaynata nirqa:

²⁶ “Rispayki wak llaqtata kaynata nimuy: Uyarispapas manam entiendenkichikchu, qawakuspapas manam rikunkichikchu.

²⁷ Kay runakunapa sonqonqa rumiyarunmi, paykunaqa rikurirun sasa uyarikuqmi, ñawinkutapas wichqarunkum mana qawakunankupaq, upa tukurunkum mana uyarikunankupaq, chaynapi tukuy sonqonkuwan mana entiendenankupaq, chaynapi mana kutirikamuwanankupaq, chaynapi mana sanoyachinaypaq”, nispa.

²⁸ Chaynata Pablo rimaruspanmi nirqa: Kunanmantaqa yachaychikyá, Diospa salvacionninqa mana judío kaqkunamanpas willasqañam kanqa, paykunam ichaqa uyarinqaku, nispa.

²⁹ [Pablo kaynata niruptinmi judiokuna pasakurqaku kikinkupura llumpayta atipanakustin].

³⁰ Pablom chay arriendasqan wasipi iskay wata yacharqa, hinaspam lliw watukuq-ninkunata chaskirqa.

³¹ Mana manchakuspanmi Diospa munaychakuyninmanta willakuq, pipapas mana harkakusqanmi Señor Jesucristomanta yachachiq.