Hechos 20 - CHUYA QELLQA La Biblia en Quechua de Ayacucho 2012

Macedoniaman hinaspa Greciaman Pablopa risqanmanta

¹ Chay chaqwa tukuruptinmi, iñiqkunata Pablo huñuruspan allinta kallpancharqa, hinaspam despedikuspan Macedonia lawman lloqsirqa.

² Llaqtan-llaqtan rispanmi iñiqkunata kallpanchastin Grecia lawman chayarurqa.

³ Chaypi kimsa killa karuspanmi barcopi Siria lawman rinanpaq kachkaspan, yachakururqa judiokuna paypa contranpi yacharachinakusqankuta. Chaymi Macedonia lawnintaña kuti-murqa.

⁴ Hinaptinmi payta compañarqaku Berea llaqtayuq Pirropa churin Sópater, Aristarco, Tesalónica llaqtayuq Segundo, Derbe llaqtayuq Gayo, Timoteo hinaspa Asia lawmanta kaq Trofimowan Tíquico.

⁵ Paykunam puntaruspanku Troas llaqtapiña suyawarqaku.

⁶ Ñoqaykuñataqmi mana levadurayuq tanta fiesta pasaruptin, Filipos llaqtamanta barcopi lloqsirqaniku, hinaspam pichqa punchawmantaña paykunata Troas llaqtapi hayparqaniku, hinaspaykum qanchis punchawraq chaypi qeparqaniku.

Troas llaqtapi iñiqkunata Pablo watukusqanmanta

⁷ Semanapa qallariynin domingo punchawtam, tantata partenakunankupaq llapa iñiqkuna huñunakurqaku, hinaptinmi Pablo yachachirqa. Ichaqa paqarinnintillan pasakunan kasqanraykum chawpi tutakama yachachirqa.

⁸ Wasipa altosnin cuartopim huñunasqa kachkarqaniku achka lamparakunawan achkikuspayku.

⁹ Ventanapiñataqmi Eutico sutiyuq joven tiyachkarqa. Pablo tutakama rimaptinmi chay jovenqa puñuywan aysachikusqanpi puñuruspan, wasipa kimsa kaq altosninmanta wichiykurqa, chaymi wañusqataña hoqarirqaku.

¹⁰ Pabloñataqmi uraykuspan chay jovenpa hawanman chutakuykuspan abrazaykurqa, hinaspam llapa iñiqkunata nirqa: Ama manchakuychikchu, kawsachkanmi, nispa.

¹¹ Chaymantam altosman kaqlla seqarqa, chaypim tantata pakiykuspan mikurqa, hinaspam achikyanankama rimaruspan pasakurqa.

¹² Llapa iñiqkunañataqmi chay joventa kawsachkaqtaña pusarqaku, chaywanmi llumpayta kallpanchakurqaku.

Troasmanta Mileto llaqtaman Pablopa risqanmanta

¹³ Ñoqaykum barcopi puntaruspayku Asón llaqtaman rirqaniku, Pablota hoqarinaykupaq. Paymi rimanakusqaykuman hina chakiwan rirqa.

¹⁴ Paywan Asón llaqtapi tuparuptiykum, barcoman seqaramuptin Mitilene llaqtaman pasarqaniku.

¹⁵ Chaymanta barcopi lloqsispaykum paqarinnintin Quío islapa chimpanman chayarqaniku. Paqarinnintin punchawñataqmi Samos islaman chimparqaniku, paqarinnintin punchawñataqmi Trogiliopi sayaykuspayku Mileto llaqtaman chayarqaniku.

¹⁶ Chaynataqa ruwarqaniku Efesoman Pablo mana riyta munaptinmi chaynapi Asia lawpi mana tardanaykupaq. Jerusalén llaqtamanmi utqayman riyta munarqa atispaqa chaypi Pentecostés punchawpi kananpaq.

Éfeso llaqtapi ancianokunawan rimasqanmanta

¹⁷ Pablom Mileto llaqtapi kachkaspan, Efesopi iñiqkunapa ancianonkunata qayachirqa.

¹⁸ Paykuna hamuruptinmi Pablo nirqa: Qamkunam yachankichik kay Asia lawman hamusqaymantapuni imaynam qamkunawan kawsasqayta.

¹⁹ Llapa judiokuna imataña ruwawayta munaptinkupas humillakuspaymi waqastinpas hinaspa ñakaristinpas Señorninchikta servirqani.

²⁰ Chaywanpas allinnikichikpaq Diospa palabran willaytaqa manam amirqanichu, ñoqaqa yachachirqaykichikmi llapa runakunapa qayllanpipas chaynataq wasikichikpipas.

²¹ Judiokunamanpas chaynataq mana judiokunamanpas nirqanim: “Huchaykichikmanta wanakuspa Diosman kutirikuychik, hinaspa Señor-ninchik Jesusman iñikuychik”, nispa.

²² Kunanmi Jerusalén llaqtaman richkani Chuya Espiritupa kamachisqan, manam yachakunichu wakpi imam suyawasqantapas.

²³ Sapa llaqtaman risqaypim Chuya Espíritu niwan: “Presochasuptikim ñakarinki”, nispan.

²⁴ Ichaqa vidaypas ñoqapaqqa manam llumpay valorniyuqchu. Aswanpas munani Señor Jesucristopa kamachiwasqanta kallpachkaq hina kusikuywan ruwaytam hinaspa Diospa kuyakuyninmanta willakunaypaq Señor Jesucristopa kamachiwasqan cumpliytam.

²⁵ Qamkunamanmi Diospa munaychakuyninmanta yachachirqaykichik, kunanmi ichaqa yachakuni, manañam huktawanqa rikuwankichikñachu.

²⁶ Chayraykum kunan nikichik, manam huchayuqchu kani llapallan runakuna castigasqa kanaykichikmantaqa.

²⁷ Diospa munasqantaqa mana imatapas pakaspaymi willarqaykichik.

²⁸ Chaynaqa, cuidakuychikyá, cuidaychiktaqyá iñiqkunatapas, paykunata michinaykichikpaqmi Chuya Espíritu qamkunata akllasurqankichik, paykunaqa Señorninchik Jesucristopa yawarninwan rantisqanmi.

²⁹ Yachanim, ñoqa pasakuptiyqa pantachikuqkuna hamunanta, paykunam yarqasqa atoqkuna hina, iñiqkunata chinkarachiyta munanqaku.

³⁰ Qamkuna ukumantapas wakinkunam hatarinqaku, paykunam iñiqkuna qatinanta munaspanku llullakunata yachachinqaku.

³¹ Chaynaqa cuidakuychikyá, amayá qonqaychikchu weqeywan tuta punchaw kimsa watantin sapakamaman yachachisqaytaqa.

³² Wawqellaykuna, kunanqa Diospa makinmanwan kuyakuy palabranman-ñam saqekichik, payqa atiyniyuqmi iñiy-nikichikpi wiñachisunaykichikpaq, chay-nataq chuyanchasqan llaqtanman prome-tesqan herenciata qosunaykichikpaqpas.

³³ Ñoqaqa manam pipa qollqentapas, qorintapas nitaq pachantapas muna-payarqanichu.

³⁴ Aswanqa yachasqaykichikpi hinam makiywan llamkaspay imatapas rantiq kani ñoqapaq chaynataq puriqmasiykunapaqpas.

³⁵ Qamkunatapas yachachirqaykichikmi ñoqa hina llamkaspa wakchakunata yanapanaykichikpaq. Amayá qonqaychikchu Señor Jesucristopa nisqanta, paymi nirqa: “Chaskispa kusikuymantaqa, qospa kusikuymi aswan allinqa”, nispa.

³⁶ Chaykunata Pablo rimaruspanmi qonqorakuykuspan paykunawan kuska Diosta mañakurqa.

³⁷ Chaymi llapallanku anchata waqakuspanku Pablota abrazaykuspa muchaykurqaku,

³⁸ hinaspam “manañam huktawanqa rikuwankichikñachu” nisqanwan llumpay llakisqallaña karqaku. Chaymantam barcopa kasqankama compañarqaku.