Hechos 2 - CHUYA QELLQA La Biblia en Quechua de Ayacucho 2012

Chuya Espiritupa hamusqanmanta

¹ Pentecostés fiesta chayaramuptinmi lliw iñiqkuna huñunasqa kachkarqaku.

² Hinaptinmi qonqayllamanta cielomanta qapariyllawanña wayra hina hamuqta uyarirurqaku, chaymi tiyasqanku wasitapas qapariyninwan huntariykurqa.

³ Hinaptinmi sapakamapa umankupa hawanman nina hina lenwachkaq tiyaykurqa.

⁴ Llapallankuman Chuya Espíritu huntaykuptinmi mana yachasqanku rimaykunapi rimayta qallaykurqaku Chuya Espiritupa rimachisqanman hina.

⁵ Jerusalén llaqtapim kachkarqaku karumanta hamuq judiokuna, paykunam lliw nacionkunamanta hamurqaku Diosta yupaychanankupaq.

⁶ Chay wayra hina qapariyta uyariruspankum lliw runakuna chay apostolkunapa kasqanman huñunakaramurqaku, hinaspankum sapakamapa rimayninkupi rimaqta uyariruspanku mana ima niytapas atirqakuchu.

⁷ Chaymi admirakuspanku nirqaku: ¿Kay rimaqkunaqa manachum lliwchanku Galilea law runakuna?

⁸ Hinaptinqa, ¿imaynanpimá sapakamapa rimayninchikpiqa rimaqta uyarinchik?

⁹ Kaypiqa kachkanchik achka nacionkunamantam: Partiamanta, Mediamanta, Elanmanta, Mesopotamiamanta, Judeamanta, Capado-ciamanta, Pontomanta, Asiamanta,

¹⁰ Frigiamanta, Panfiliamanta, Egipto-manta, Cirenepa waklawnin Africamanta. Kachkantaqmi kaypi yachaq Roma llaqtayuq runakunapas. Wakinmi nacesqankumanta judío kanku, wakinñataqmi judiokunapa religionninman tikrakuqkuna.

¹¹ Kachkankutaqmi Cretamanta hinaspa Arabia lawmanta kaqkunapas. Kaynaña kachkaptinchikpas sapakamapa rimayninchikpim Diospa admirakuypaq ruwasqankunamanta uyarichkanchik, nispanku.

¹² Llumpayta admirakuspankum ninakurqaku: ¿Ima ninantaq kayqa? nispanku.

¹³ Wakinñataqmi asikuspanku nirqaku: Sinkam kachkanku, nispanku.

Pedropa punta kaq willakusqanmanta

¹⁴ Chaymi Pedro chunka hukniyuq apostolkunawan sayariykuspan hatunmanta qaparispan kaynata nirqa: Jerusalenpi yachaqkuna chaynataq llapallan judío masillaykuna, yachanaykichikpaqyá kay nisqayta sumaqta uyariwaychik.

¹⁵ Ñoqaykuqa manam qamkunapa nisqaykichikman hina sinkachu kachkaniku. Manaraqpas isqon horataqa manam pipas sinkaqa kanmanchu.

¹⁶ Aswanqa kay uyarisqaykichikmantaqa ñam profeta Joel rimarirqaña:

¹⁷ Diosmi nin: Tukupay punchawkunapim chaqchurimuq hina lliw runakunaman Espirituyta kachamusaq. Chaymi qari churikichikpas, warmi churikichikpas profetizanqaku. Jovenkunapas visionkunatam rikunqaku, yuyaqkunapas mosqoykunatam mosqokunqaku.

¹⁸ Chay punchawkunapim Espirituyta kachamusaq, qarimanpas warmimanpas lliw serviwaqniykunaman, hinaptinmi profetizanqaku.

¹⁹ Cielopim admirakuypaq kaqkunata ruwasaq, kay pachapim yawartawan ninata qawachisqaykichik, qawachisqaykichiktaqmi suyullaña hoqarikuq qosnitapas.

²⁰ Manaraq Señorpa suma-sumaq punchawnin chayamuchkaptinqa intipas tutayanqam, killapas yawaryanqam.

²¹ Ichaqa haykam Señorpa sutinta qayakuqmi salvasqa kanqa, nispa.

²² Israelpa mirayninkuna, uyariwaychik: Yachasqaykichikpi hinapas, Diosmi qamkuna ukupi Nazaretmanta kaq Jesuspa atiyninta qawachirqa, paynintakama admirakuypaq milagrokunata hinaspa señalkunata ruwaspan.

²³ Diosqa ñawpaqmantaraq yachasqanman hinam hinaspa munasqanman hinam Jesusta qamkunapa makikichikman churaykurqa. Qamkunam payta presocharurqankichik, hinaspam mana allin runakunawan chakatachispa wañurachirqankichik.

²⁴ Ichaqa Diosmi wañuymanta libraruspan kawsarichimurqa, paypiqa wañuypas mana munaychakuyta atisqanrayku.

²⁵ Ñawpaqtam Jesusmanta rimaspan David nirqa: “Tukuy tiempom Señorniyqa ñoqawan kachkan, pay alleqniypi kaptinqa, manam imapas urmachiwanqachu.

²⁶ Chayraykum sonqoypas kusikun, simiywanpas kusikuymantam takisaq, cuerpoypas hawkallam samaykunqa.

²⁷ Cuerpoytapas amam sepulturapiqa saqerunkichu, kuyasqaykitaqa amam sepulturapi asnarinantaqa saqerunkichu.

²⁸ Kawsay ñantam reqsiykachiwanki, ñoqawan kasqaykim kusikuyta huntaykuwan”, nispa.

²⁹ Wawqellaykuna, cheqaptam niki-chik: Ñawpaq taytanchik Davidqa wa-ñukuspanmi pampasqa karqa, kunan-kamapas sepulturanqa hinallam kaypi kachkan.

³⁰ Davidqa profetam karqa, chaymi payman juraspan Dios prometekusqanrayku yacharqa paypa mirayninmanta Cristo hamunanta hinaspa David hina Israel nacionpi munaychakunanta.

³¹ Chaynapim Davidqa qawachkanmanpas hina ñawpaqmantaraq Jesucristopa kawsarimunanmanta rimarqaña “Sepul-turapiqa manam saqesqachu kanqa, nitaqmi cuerponpas ismunqachu”, nispa.

³² Kay Jesustam Dios kawsarichimurqa, cheqaptapunim chaytaqa llapallayku rikurqaniku.

³³ Chaynapim Diosqa Jesusta hatunchaykuspan alleq lawninpi chaskiykurqa, Tayta Diospa prometekusqanman hinam Chuya Espirituta Jesús chaskirqa, chay Chuya Espirituntam chaqchurimuwarqanchik, chaytam qawachkankichik hinaspa uyarichkankichik.

^34-35 Manam Davidchu hanaq pachamanqa hoqarisqa karqa, chaywanpas paymi nirqa: “Señor Diosmi Señorniyta nirqa: Enemigoykikunata chakikipa sarupakunanta ruwanaykama alleqniypi tiyaykuy”, nispa.

³⁶ Israelpa llapallan mirayninkuna, yachaychikyá, qamkunapa chakatarusqaykichik Jesustam Cristo hinaspa Señor kananpaq Dios churaykun, nispa.

³⁷ Kaykunata uyariruspankum sonqonkupi llumpayta llakikuruspanku Pedrotawan wakin apostolkunata tapurqaku: Wawqekuna, ¿imatataq ruwallasaqku? nispanku.

³⁸ Chaymi Pedroñataq nirqa: Huchaykichikmanta wanakuspayá sapakama Jesucristopa sutinpi bautizakuychik, chaynapi huchaykichikmanta pampachasqa kanaykichikpaq, hinaspam Chuya Espiritupa atiyninta chaskinkichik.

³⁹ Kay promesaqa qamkunapaqwan, miraynikichikkunapaq, llapallan karu llaqtapi kaqkunapaq hinaspa Señorninchik Diospa munasqanman hina lliw qayas-qakunapaqwanmi.

⁴⁰ Pedrom runakunata qaqchaspan kaynata nirqa: ¡Kay huchasapa miraykunamanta rakikuychik! nispa.

⁴¹ Hinaptinmi Pedropa nisqanta kasu-kuqkunaqa bautizachikurqaku, chaynapim iñiqkunaman chay punchawpi yaqa kimsa waranqa runakuna yapakurqaku.

⁴² Paykunam apostolkunapa yachachikuyninpi takyarqaku, kapuqninkuwanmi yanapanakuqku, huk sonqollam tantatapas partenakuqku, Dios mañakuypipas hukllam karqaku.

Punta kaq iñiqkunapa imaynam kawsasqankumanta

⁴³ Apostolkunapa hatun milagrokuna hinaspa señalkuna ruwasqankuwanmi, llapa runakuna admirakuspa mancharisqallaña karqaku.

⁴⁴ Lliw iñikuqkunam huk sonqolla karqaku, ima kapuqninkutapas llapallankum qonakurqaku.

⁴⁵ Chakrankutawan imapas kapuqninkutam rantikuqku hinaspam sapakamapa necesitasqankuman hina rakinakuqku.

⁴⁶ Sapa punchawmi templopi huk sonqolla huñunakuqku, wasin-wasin huñunakuspam hatun kusikuywan mikuyta mikuqku, tantatapas partinakuspankum mikuqku.

⁴⁷ Diosta yupaychaspam lliw runakunapa allin qawasqam karqaku. Señorñataqmi sapa punchaw paykunaman salvasqa kaqkunata yaparqa.