Hechos 18 - CHUYA QELLQA La Biblia en Quechua de Ayacucho 2012

Corinto llaqtaman Pablo chayasqanmanta

¹ Chaykunapa qepantam, Atenas llaqtamanta Pablo lloqsispan Corinto llaqtaman pasarqa.

² Chaypim Aquila sutiyuq judiowan tuparurqa, payqa Ponto law llaqtayuqmi karqa. Paymi warmin Priscilawan chayraq Italia lawmanta chayaramurqaku, Roma nacionmanta llapa judiokuna lloqsinankupaq emperador Claudio kamachikusqanrayku. Pablom paykuna watukuq rirqa.

³ Hinaspam Aquila hina carpakuna ruwaq kasqanrayku paykunawan kuska llamkananpaq qeparqa.

⁴ Sapa samana punchawmi Pabloqa judiokunapa sinagoganman rispan judiokunata chaynataq mana judiokunatapas Jesucristoman iñichiyta munaspan rimapayaq.

⁵ Silaswan Timoteo Macedoniamanta chayaramuptinkum, Pabloqa mana samaykuspa Diospa palabranta willakurqa, hinaspam judiokunaman yachachirqa Jesusqa suyasqanku Cristopuni kasqanta.

⁶ Chay judiokunam ichaqa Pablopa contranpi hatarispanku imaymanata rimarqaku, hinaptinmi Pabloñataq pachantapas taspispanraq nirqa: Wiñaypaq wañuyman wichispaqa kikikichikmi huchayuq kankichik, manam ñoqachu. Kunanmantaqa mana judío kaqkunamanñam willakuq risaq, nispa.

⁷ Hinaspanmi judiokunapa sinagoganmanta lloqsikuruspan, Ticio Justo sutiyuq runapa wasinman pasakurqa. Payqa karqa Diosta kasukuqmi, wasinpas karqa sinagogapa waqtallanpim.

⁸ Crispo sutiyuq runam judiokunapa sinagoganpi kamachikuq karqa, paymi wasinpi llapallan kaqkunapiwan Jesucristoman iñikururqaku. Corintopi kaqkunamantapas achkaqmi Pablota uyarispanku iñikururqaku, hinaspam bautizakurqaku.

⁹ Huk tutam Pablo puñuchkaptin, visionninpi Señor rikuriykuspan nirqa: Ama manchakuychu, ama upallaspa hinalla willakuy.

¹⁰ Ñoqam qanwan kachkani, manam pipas imanasunkichu. Kay llaqtapiqa achkallañam kachkan akllasqaykuna, nispa.

¹¹ Chaymi Pabloqa Corinto llaqtapi wata parten yacharqa, Diospa palabranta paykunaman yachachispan.

¹² Ichaqa Acaya lawpi Galión gobernador kachkaptinmi, Pablopa contranpi llapa judiokuna huñunakururqaku, hinaspankum juzgadoman aparuspanku

¹³ nirqaku: Kay runam llapa runakunata creechichkan leyninchikpa contranpiña Diosta yupaychanankupaq, nispanku.

¹⁴ Pablo rimarinanpaq kachkaptinmi, llapa judiokunata Galión nirqa: Judiokuna, sichum kay queja kanman imapas mana allin ruwaymanta otaq pipa contranpipas sayariymanta, hinaptinqa mana imanispaychá uyarikichikman.

¹⁵ Sichum rimasqaykichikmanta, sutikunamanta hinaspa leynikichikmanta quejaykichik kaptinqa, kikikichikyá imaynatapas allichakuychik, chaykunamanqa manam chapukuymanchu, nispan.

¹⁶ Hinaspanmi llapa judiokunata juzgadonmanta hawaman qarqoramurqa.

¹⁷ Hinaptinmi llapa runakuna, sinagogapi kamachikuq Sostenesta hapiruspanku, gobernadorpa ñawpaqninpi maqaparqaku. Gobernador Galiontam ichaqa mana imapas qokurqachu.

Antioquiaman Pablopa kutisqanmanta

¹⁸ Pablom unay punchawkuna Corinto llaqtapi qeparqa, hinaspam llapa iñiqkunamanta despedikuykuspan, Aquilawan hinaspa Priscilawan kuska Siria lawman pasarqaku. Cencrea llaqtaman chayaruptinkum, Diosman promesa ruwasqanta cumplinanpaq lliw chukchanta rutukururqa.

¹⁹ Éfeso llaqtaman chayaruptinkum, Aquilatawan Priscilata chaypi saqeykuspa sapallanña judiokunapa sinagoganman pasarqa, hinaspam chaypi judiokunawan atipanakurqa.

²⁰ Paykunam Pablota ruegarqaku chaypi unay qepananpaq, ichaqa paymi mana munaspan

²¹ payku-namanta despedikurqa: Dios munaptinqa huktawanmi kutimusaq watukuqnikichik, nispan. Chaymantam barcopi Éfeso llaqtamanta pasakurqa.

²² Cesarea llaqtaman chayaruspanmi, iñiqkunata saludaykunanpaq Jerusalenman rirqa, chaymantam Antioquía llaqtaman pasarqa.

²³ Chaypi tardarispanmi, huktawan pasaspan Galacia lawkunapi hinaspa Frigia lawkunapi purirqa llapa iñiqkunata kallpanchastin.

Éfeso llaqtapi Apolospa willakusqanmanta

²⁴ Chay punchawkunapim Éfeso llaqtaman chayarurqa judiokunamanta kaq Alejandría llaqtayuq Apolos. Payqa karqa Diospa palabranta allin yachaqmi hinaspa allin willakuqmi.

²⁵ Señormanta yachachisqa kachkaspapas bautizaq Juanpa yachachisqan bautismollatam reqsirqa, hinaspam kusikuyllawanña Jesusmanta haykam yachasqanta willakuq.

²⁶ Paymi judiokunapa sinagoganpi mana manchakuspa willakuyta qallaykurqa. Chayta Priscilawan Aquila uyariruspankum wasinkuman pusarqaku, hinaspam aswan allintaraq Diospa ñanninmanta yachachirqaku.

²⁷ Acaya lawman Apolos rinanpaq kaptinmi, Éfeso llaqtapi wawqe-panikuna kallpanchaspanku, chay llaqtapi kaq iñiqkunaman cartata qellqarqaku, chaynapi Apolos chayaptin allinllata chaskiykunankupaq. Chay llaqtaman Apolos chayaruspanmi, Diospa kuyakuyninman hina iñiqkunata llumpayta yanaparqa.

²⁸ Atiywan llapa runakunapa qayllanpi rimaspanmi judiokunata pantaypi kasqankuta qawachirqa. Qellqaman hina qawachispantaqmi Jesusqa suyasqanku Cristo kasqanta reqsichirqa.