Hechos 16 - CHUYA QELLQA La Biblia en Quechua de Ayacucho 2012

Pablotawan Silasta Timoteo reysisqanmanta

¹ Pablopiwan Silasmi Derbe llaqtaman hinaspa Listra llaqtaman chayarurqaku. Chaypim Jesusman iñikuq Timoteo yacharqa. Paypa mamanmi karqa Jesucristoman iñikuq judía warmi, taytanñataqmi karqa Grecia lawmanta kaq.

² Iconio llaqtapi hinaspa Listra llaqtapi iñiqkunam Timoteomanta allinta rimaqku.

³ Pablom riysinanta munaspan Timoteota qari kayninpa qarachanta kuchururqa chay lawkunapi yachaq judiokunarayku, llapa judiokunaqa yacharqakum Timoteopa taytanqa Grecia lawmanta kasqanta.

⁴ Jerusalén llaqtapi kaq ancianokunamantawan apostolkunamanta chaskimusqanku cartakunatam chayasqanku llaqtakunapi llapa iñiqkunaman qorqaku.

⁵ Chaynapim iñiqkuna aswan-aswan kallpanchakurqaku, sapa punchaw iñikuptinkum llapa iñiqkuna achkanpi mirarqaku.

Macedonia lawman Pablopa risqanmanta

⁶ Frigia lawninta hinaspa Galacia lawninta pasaruptinkum, Chuya Espíritu harkakururqa Asia lawpiqa ama willakunankupaq.

⁷ Misia lawpa ichpanman chayaruspanku Bitinia lawman riyta munaptinkuñataqmi Jesuspa Espiritun harkarurqa.

⁸ Chaymi Misia lawllanta pasaspanku Troasman uraykurqaku.

⁹ Chaypim Pabloman tuta puñuchkaptin, visionpi Dios qawachirqa Macedonia law runata. Paymi sayaykuspan Pablota ruegarqa: Macedonia lawman hamuspa yana-paykuwayku, nispa.

¹⁰ Chay visionta Pablo rikuruptinmi, chaypunilla allichakuyta qallaykurqaniku Macedonia lawman rinaykupaq, Diospa qayawasqankuta cheqappaq hapiykuspayku, chaypi runakunaman allin noticiata willakamunaykupaq.

Pablotawan Silasta Filipos llaqtapi carcelarusqankumanta

¹¹ Troas llaqtamantam barcopi pasarqaniku Samotracia islakama, paqarinnintin punchawñataqmi Neápolis llaqtaman chayarurqaniku.

¹² Chaymantam romanokunapa munaychakunan Filipos llaqtanman rirqaniku. Filipos llaqtaqa Macedonia lawpi wakin llaqtakunamantapas aswan reqsis-qam karqa. Chaypim achka punchawkuna karqaniku.

¹³ Samana punchawpim llaqtamanta lloqsirqaniku, hinaspam Diosta mañakunanku mayupa patanman rirqa-niku. Chaypi tiyaykuspaykum huñunaka-muq warmikunaman Jesusmanta willarqa-niku.

¹⁴ Chaypim kachkarqa Tiatira llaqta-yuq Lidia, paymi achka preciopa chanin morado telakunata rantikuq. Payqa Diosta yupaychaq kasqanraykum allinta uyarichkarqa, hinaptinmi sonqonta Señor kichaykurqa Pablopa nisqanta kasukunan-paq.

¹⁵ Chaymi wasinpi kaqkunapiwan kuska bautizakuruspanku, kaynata ruegawarqaku: Cheqaptapuni Señorman iñikusqayta yachaspaykichikqa wasiypiyá samakamuychik, nispa. Llumpayta ruegawaptinkum wasinpi samapakurqaniku.

¹⁶ Huk punchawmi Diosta mañakuna sitioman richkaspayku, adivinaq espirituyuq sipaswan tuparurqaniku. Payqa adivinaspanmi patronninkunata achka qollqeta ganachiq.

¹⁷ Chay sipasmi Pablotawan ñoqaykuta qatikachawaspanku qayaykachakurqa: ¡Kay runakunaqa hanaq pachapi Diostam servinku, paykunaqa willasuchkankichik imaynam salvakunaykichikmantam! nispa.

¹⁸ Chaynatam achka punchawña rimarqa, hinaptinmi Pablo piñasqa muyuriykuspan sipaspi kaq espirituta qaqcharqa: ¡Jesucristopa sutinpim kamachiki paymanta lloqsiy! nispa. Hinaptinmi chay espirituqa sipasmanta chaypunilla lloqsirurqa.

¹⁹ Sipaspa patronninkunañataqmi, chay adivinaq espíritu paymanta chinkaruptin, manaña paywan qollqe gananankupaq kaptin, Pablotawan Silasta hapiruspanku autoridadkunapa kanan plazaman aparqaku.

²⁰ Juezkunapa makinman churaykuspankum nirqaku: Kay judío runakunam llaqtanchikpi chaqwakunata hatarichichkanku.

²¹ Pay-kunaqa costumbrenkutam yachachichkan. Ñoqanchikqa Roma nacionniyuqmi kanchik, manam kaykunataqa chaskichwanchu, nispanku.

²² Chaymi llapa runakuna paykunapa contranpi hatarirurqaku, juezkunañataqmi Pablopa hinaspa Silaspa pachankunata llikichispa kaspikunawan waqtachirqaku.

²³ Llumpayta waqtaparuspankum carcelarurqaku, hinaspam carcelerota kama-chirqaku allinta cuidananpaq.

²⁴ Chay carcelerom kasukuspan Pablotawan Silasta carcelpa kuchunmanraq pusaruspa cepowan paykunapa chakinkunata hapirachirqa.

²⁵ Pablowan Silasmi yaqa chawpi tutata, Diosta mañakuspanku himnokunata takikurqaku, hinaptinmi wakin presokunapas uyarirqaku.

²⁶ Hinachkaptinmi qonqayllamanta hatun terremoto pasaruptin carcel wasipa cimientonkuna chaspikururqa, chaymi llapa punkukuna kichakuruptin lliw presokunapa cadenankunapas paskakururqa.

²⁷ Chay carceleroñataqmi rikchariruspan llapa punkukunata kicharayachkaqta rikuruspan presokunapa lluptirusqanta piensarqa, chaymi espadanta hurqoykuspan wañuchikunanpaqña kachkarqa.

²⁸ Chaymi Pablo qaparispan nirqa: ¡Ama imanakuychu, kaypim lliwchayku kachkaniku! nispa.

²⁹ Hinaptinmi chay carceleroqa achkita mañakuspan kallpaylla yaykuruspa katkatatastin Pablopa hinaspa Silaspa ñawpaqninkupi qonqorakuykurqa.

³⁰ Chay-mantam paykunata hawaman pusaruspan tapurqa: Qarikuna, ¿imatataq ruwasaq salvasqa kanaypaq? nispa.

³¹ Hinaptinmi nirqaku: Señor Jesucristoman iñiy, hinaspaqa qampas chaynataq wasikipi kaqkunapas salvasqam kankichik, nispanku.

³² Chaymi paymanwan wasinpi llapallan kaqkunaman Jesucristomanta willarqaku.

³³ Payñataqmi tutallaraq kachkaptin, chay horallapi Pablopa hinaspa Silaspa heridankunata mayllarqa, chaymantam wasinpi kaqkunapiwan bautizakurqaku.

³⁴ Chaymantam wasinman pusaspan mikuy-ta convidarqa, hinaspam Diosman iñikus-qankumanta wasinpi llapallan ayllunkunapiwan llumpayta kusikurqaku.

³⁵ Paqarinnintin punchawtam juezkuna kacharqa guardiakunata carceleroman Pablotawan Silasta kacharinanpaq.

³⁶ Hinaptinmi Pablota chay carcelero nirqa: Qamkunata kacharinaypaqmi Juezku-namanta huk kamachikuyta chaskiruni. Chaynaqa hawkallayá pasakuychik, nispa.

³⁷ Hinaptinmi Pabloñataq chay guardiakunata nirqa: Roma nacionniyuq kachkaptiykupas mana sentenciachkaspa llapa runakuna qaylla carcelawachkaspankuchu, ¿kunanñataq pakasqallapi hurqowaykuta munachkanku? ¡Manam kaynallaqa kanmanchu! Kikinku hamuspa hurqowachunkuqa, nispa.

³⁸ Chaymi guardiakuna kutispanku juezkunaman willarqaku Pablopa nisqanta, hinaptinmi mancharikururqaku Roma nacionniyuq kasqankuta yacharuspanku.

³⁹ Chaymi juezkuna carcelman rispan-ku Pablomantawan Silasmanta pampachakuyta mañakurqaku, hinaspankum llaqtankumanta lloqsinankupaq nirqaku.

⁴⁰ Pablowan Silasñataqmi carcelmanta lloqsiruspanku Lidiapa wasinman rirqaku, hinaspankum chaypi iñiqkunata kallpanchaykuspanku pasakurqaku.