Hebreos 7 - CHUYA QELLQA La Biblia en Quechua de Ayacucho 2012

Melquisedecman rikchakuq sacerdotemanta

¹ Melquisedecqa Salem llaqtapi rey kaspanmi tukuy imapa hawanpi munaychakuq Diospa sacerdoten karqa. Reykunawan peleamusqanmanta Abraham kutimuptinmi taripaspan Diospa bendicionninta mañapurqa.

² Abrahampas peleamuspan llapa qechumusqankunamantam diezmota Melquisedecman qorqa. Melquisedec ninanqa “allin arregloman hina munaychakuq”, ninanmi. Salempi rey ninanñataqmi “hawkayachiq rey” ninan.

³ Manam yachanchikchu pikunam Melquisedecpa tayta-maman kasqantaqa nitaqmi pikunam ñawpaq taytankuna kasqantapas, haykapim nacesqantapas hinaspa haykapim wañukusqantapas. Chayraykum payqa Diospa Churin Jesusman rikchakuq wiñaypaq sacerdote.

⁴ Qawariychikyá Melquisedecqa mayna reqsisqa kasqanmanta, ñawpaq taytanchik Abrahampas guerrapi qechumusqanmantam diezmonta payman qorqa.

⁵ Leyman hinaqa Leviypa mirayninmanta sacerdote kanankupaq akllasqakunam, kamachisqa kachkanku castamasin runakunamanta diezmota chaskinankupaq. Paykunaqa, paykuna hina Abrahammanta miramuqkunam.

⁶ Melquisedecqa manam Leviypa mirayninmanta kaq sacerdotechu karqa, chaywanpas Diospa promesan chaskiq Abrahammantam diezmota chaskirqa hinaspanmi bendeciykurqa.

⁷ Chaynaqa, mana ancha rimayllawanmi yachanchik, sullka kaqmi mayorninpa bendecisqan kanqa.

⁸ Kunanqa wañuq runakunallam diezmotaqa chaskinku. Chuya Qellqam ichaqa nin: Melquisedecpa hinalla kawsasqanmanta, nispa.

⁹ Nichwantaqmi, Leviypa mirayninkunam diezmo chaskiqkuna kachkaspankupas Abrahamnintakama Melquisedecman diezmota qorqaku.

¹⁰ Melquisedecwan tupanankupaq Abraham lloqsiptinqa Leviyqa manaraqmi nacerqaraqchu, payqa ñawpaq taytan Abrahampa ukullanpiraqmi kachkarqa.

¹¹ Leviypa castanmantawan Aaronpa castanmanta sacerdotekunata Dios churaspanmi Israel runakunaman leyninta qorqa. Chaywanpas chay casta sacerdotekunaqa manam runakunataqa chuyanchayta atirqakuchu. Chayraykum Diosqa Melquisedecman rikchakuq sacerdotetaña churarqa, manam Aaronpa castanmantachu, aswanqa Melquisedecmantañam.

¹² Chaynaqa, sacerdoteta cambiachkaspaqa leyta-pas cambianantaqmi kanqa.

¹³ Melquise-decmanta hamuq sacerdoteqa sapaq ayllupa mirayninmanta kaqmi, manam sacerdote kananpaq akllasqa ayllumantachu.

¹⁴ Yachasqanchikpi hinapas Señorninchikqa Judá ayllumantam karqa. Moisesqa manam imatapas rimarqachu Judá ayllumanta sacerdotekuna kananpaqqa.

¹⁵ Melquisedecman rikchakuq sacerdotepa rikurimusqanwanmi leypa cambiasqa kayninqa astawan sutillata qawachikun.

¹⁶ Cristoqa manam runapa hapipakusqan tukuruqlla leyman hinachu akllasqaqa karqa, aswanqa mana haykapipas wañuq kasqanraykum.

¹⁷ Chaymi paymanta Qellqapi kaynata nin: “Qamqa wiñaypaq sacerdotem kanki, imaynam Melquisedec karqa, chaynam qampas kanki”, nispa.

¹⁸ Chaynaqa, Moisespa qosqan leyqa yanqachasqañam rikurirun, mana atiyniyuq hinaspa mana serviq kasqanrayku.

¹⁹ Moisespa leyninqa manam imapaqpas servirqachu, kunanmi ichaqa chaypa rantinpi kapuwachkanchik allin confianzawan Diosman asuyku-nanchikpaq.

²⁰ Chaynaqa, karqa Dios jurasqanraykum. Wakin sacerdotekunaqa manam juramentowanchu churasqa karqaku,

²¹ Cristom ichaqa juramentoman hina churasqa karqa, paymantam Qellqapas kaynata nin: Señormi kaynata juramentarqa, “Qamqa wiñaypaq sacerdotem kanki”, nispa. Chay jurasqanmantaqa manam qepamanqa kutinqachu.

²² Chayraykum Jesusqa musoq pactota cheqapchan punta pactomantapas aswan allinta.

²³ Chay wakin sacerdotekunaqa wañuruqlla kasqankuraykum mana unaytachu servikurqaku, chaymi achka karqanku.

²⁴ Jesusmi ichaqa wiñay kawsaq kasqanrayku mana pimanpas sacerdote kaynintaqa saqen-manchu.

²⁵ Chayraykum pipas paynin-takama Diosman asuykuqkunataqa wiñaypaq salvanman. Jesusqa wiñay-paqmi kawsachkan, paykunapaq Diosta mañakunanpaq.

²⁶ Payqa ñoqanchikpa allinninchikpaq Sumo sacerdotem, payqa chuyam, mana chikan huchayuqmi, mana qachayuqmi, huchasapakunamanta sapaqchasqam hinaspa cielokunapa hawanman churasqam kachkan.

²⁷ Wakin Sumo sacerdotekunaqa puntatam kikinkupa huchankumantaraq sapa punchaw kañanankupaq animalta wañuchiqku, chaymantañam llaqtapa huchanmantaqa. Jesusmi ichaqa huk kutillata wiñaypaq ofrecekurqa.

²⁸ Moisespa leyninman hinaqa Sumo sacerdotekunaqa churasqa karqaku chaylla pantaruq runallamantam. Leypa qepantañataq-mi Sumo sacerdote kananpaqqa wiñay-paq mana huchayuq Churintaña juramentowan Dios churarun.