Hebreos 12 - CHUYA QELLQA La Biblia en Quechua de Ayacucho 2012

Kallpanchaqninchikqa Jesuslla kasqanmanta

¹ Chaynaqa, ñoqanchikpas, muyu-riqninchikpi puyu hinaña testigokuna kachkaptinqa, llasawaq-ninchik qepita saqechkaq hinayá llapa huchanchikkunata saqesunchik, hinas-payá pacienciawan puntaman kallpasunchik maymi kallpananchikta.

² Jesusta qawaspayá kallpasunchik, paymantam iñiyninchikqa hamurqa paytaqmi qespichiwaqninchikpas. Jesusmi penqakuytapas qepaman churaykuspan cruzpi ñakarirqa, chaypa qepanta kusikuy kananta yachaspanmi, Diospa alleq lawninpi tiyaykurqa.

³ Chaynaqa, Señor Jesuspa ejemplonpiyá yuyaymanaychik, paymi ñakarirqa huchasapa runakunapa kamikuyninta, chaynapi mana pisiparunaykichikpaq nitaq huk-manyarunaykichikpaq.

⁴ Huchapa contranpi peleaspaykichikqa, manaraqmi yawarnikichiktaqa chaqchurqanchikraqchu.

⁵ Qamkunaqa churinkunaman hina Diospa kayna rimapayasusqaykichiktapas qonqarunkichikñam. Qellqam kaynata nin: “Churilláy, Señorpa castigontaqa amayá despreciaychu.

⁶ Churilláy, Señorpa anyasusqaykiwanqa amayá hukmanyaychu”, nispa.

⁷ Sichum azotenta chaskiptikichikqa, Diosqa churinta hinam nanachikusunkichik, chaynaqa, ¿ima taytataq churintaqa mana correginmanchu?

⁸ Sichum Diosqa llapallan churinkunata corregichkaspan, qamkunatañataq mana corregisuptikichikqa hawa churinkuna hinachiki kawaqchik, manachiki cheqap churinchu kawaqchik.

⁹ Ñoqanchikpas kay pachapi corregiwaqninchik tayta-mamanchiktaqa kasukurqanchikmi. Chaynaqa, ¿imanasqataq kawsachiqninchik hanaq pachapi Taytanchiktaqa manaqa kasukuchwanchu?

¹⁰ Tayta-mamanchikqa pisi punchawlla kawsayninchikpim tanteasqankuman hina corregiwarqanchik, hanaq pachapi Taytanchikmi ichaqa aswan allinninchikpaq corregiwanchik pay hina mana huchayuq kananchikpaq.

¹¹ Cheqaptapunipas azotewasqanchik horaqa manam gustonchikpaqchu, aswanqa nanawanchikmi; chaywan yuyayta hapiptinchikmi ichaqa allin kaqkuna ruwayta hinaspa hawka kawsakuyta yachachiwanchik.

Mana kasukuqkunapa pagonmanta

¹² Chaynaqa, utisqa makikichiktapas hoqariychik, mana kallpayuq moqoykichiktapas kallpanchaychik.

¹³ Qewi-qewi ñannikichikta derechaychik, chaynapi wistukunapas ama huklawman pantarunankupaq, aswanqa sanoyanankupaq.

¹⁴ Llapallanwanyá hawkalla kawsaychik, chuyanchakuypi kawsaychik, mana chuya kaspaqa manam pipas Señortaqa rikunqachu.

¹⁵ Cuidakuychikyá, yanqañataq Diospa kuyapayakuyninta mana haypawaqchikchu, chaynapi qatqe sachapa sapin hina wiñaspa achkaqta chaqwaspan lliwta qatqeyarachisunkichikman.

¹⁶ Amayá pipas huchapakuchunchu nitaq Diospa kaqninkunatapas despreciachunchu, imaynam Esaú huk plato mikuyllapaq piwi kayninta rantikusqanta hinaqa.

¹⁷ Yachasqaykichikpi hinapas Esauqa Diospa bendicionninta kutichikuyta munaspapas qarqosqañam karqa, maynataña waqaspapas tupaqnintaqa manañam kutichikuyta atirqañachu.

¹⁸ Qamkunaqa manam Israel runakuna hinachu asuykuchkankichik ninapa rupasqan hapiy atina orqomanchu, yana puyumanchu, tutayaymanchu, sinchi wayrapa kasqanmanchu,

¹⁹ trompetapa waqayninmanchu nitaq Diospa rimayninmanchu. Chayta uyariqkunam mañakurqaku amaña masta paykunaman rimapayananpaq.

²⁰ Chaytaqa mañakurqaku kay kamachikuyta mana kasukuy atisqankuraykum: “Kay orqoman asuykamuqqa cuchillowan otaq lanzawan wañuchisqam kanqa, runa kaspa otaq animal kaspapas” niqta.

²¹ Mancharikuypaqmi kay qawasqankuqa karqa, chaymi Moisespas kaynata nirqa: “Mancharikuymantam katkatatachkani”, nispa.

²² Qamkunam ichaqa asuykurunkichik Sión moqoman, hanaq pachapi kawsaq Diospa Jerusalén llaqtanman, Diosta yupaychanankupaq wara-waranqa angel-kunapa huñunasqa kasqankuman.

²³ Chaypitaqmi kachkan ñawpaqmanta Diosman iñikuqkunapa huñunakuyninpas paykunapa sutinkuqa hanaq pachapim qellqasqa kachkan. Asuykurunkichiktaqmi llapallan runakuna juzgaq Diosmanpas hinaspa chuyanchasqa runakunapa espiritunmanpas,

²⁴ musoq pactoman pusawaqninchik Jesusmanpas chaynataq chaqchusqan yawarninmanpas. Paypa yawarninqa Abelpa yawarninmantapas aswanraqmi yachachiwanchik.

²⁵ Chaynaqa, rimapayasuqnikichiktaqa amayá qepanchakuychikchu. Kay pachapi willakuqkunata mana kasukuqkunapas castigomantaqa manam lluptirqakuchu. Hanaq pachamanta rimamuqta mana kasukuspaqa aswanraqchiki mana lluptichwanchu.

²⁶ Chay tiempopim Diospa vozninqa kay allpatapas kuyurichirqaraq. Kunanmi ichaqa kaynata nin: “Huktawanraqmi katkatatachisaq, ichaqa manam kay pachallatañachu, aswanqa cielokunatawanmi”, nispa.

²⁷ “Huktawanraqmi” nispaqa nichkan tukuruqlla kaqkunata chinkachispan manaña haykapipas tukuqta wiñaypaq takyachinanmantam.

²⁸ Diospa manaña tukuq munaychakuyninta chaskichkaspanchikqa Diosman graciasta qospayá, munasqanta ruwaspa respetowan yupaychaspa servisunchik.

²⁹ Diosninchikqa rupaq nina hina rupaspa tukukuqmi.