Habacuc 2 - CHUYA QELLQA La Biblia en Quechua de Ayacucho 2012

¹ Llaqta waqaychaq hinam uyan-uyanlla maymi kasqaypi suyallasaq, mañakuyniyta uyariykuwaspa Tayta Diospa imam niwasqanta uyarinaypaq.

Habacucpa mañakuyninta Dios contestasqanmanta

² Chaymi Tayta Dios niwarqa: Visionpi rikusqaykita tablapi qellqay, chaynapi pipas chayta leeykuspanqa chaypunilla kallpananpaq.

³ Kay visionqa mana chaylla cumplikuspanpas tiemponpim cumplikunqa, manam yanqaqa kanmanchu; unamuptinpas qamqa suyaykuy, chay visionqa cheqaptapunim cumplikunqa.

⁴ Mana allin runaqa hatun tukuqmi, allin ruwaq runam ichaqa iñisqanrayku kawsanqa.

Mana allin runakuna imaynam tukunanmanta

⁵ Hatun tukuqkunaqa apuyayllatam mana samaykuspa maskanku, tuñirachiqnin kachkaptinpas mastaraqmi munanku. Sepultura hinaraqmi siminkutapas kicharinku, wañuy hinaraqmi manaña saksariq rikurirunku, chayraykum nacionkunatapas tuñichinku.

⁶ Ichaqa huk punchawmi ñakarichisqan llaqtakuna asikuspanku watuchita hinaraq kaynata ninqaku: “¡Imallapiraq rikukunqaku! mana kikinkupa kaqta huñuspa apuyaqkuna, ¿haykapikamataq mana qamkunapa kaqta huñuypaq-huñukunkichik?” nispanku.

⁷ Manukusuqnikikunam qonqaymanta hatarimuspa qanmanta vengakunqaku, llapa ñakarichisuqnikim hatariruspanku tukuy imaykikunata qechuspa qalatosunki.

⁸ Llapa nacionkunata wakchayachisqaykimantam llapa nacionkunapas wakchayachisunki. Runakunata wañuchisqaykimantam, llaqtakunata nacionkunata ñakarichisqaykimantam, qampas ñakarichisqa kanki.

⁹ Suwakuspalla wasinta huntachikuq runa, mana allinmanta ayqenanpaq alto-altopi qesanta ruwakuruq runa, ¡imallapiraq rikukunki!

¹⁰ Chaynata ruwaspaykim wasikitapas penqayman churarunki, achka nacionkunata tuñichispaykim kikikipunipas tuñirachikunki.

¹¹ Perqapi rumikunapas wasikunapi qerukunapas contraykipim rimanqaku.

¹² ¡Imallapiraq rikukuykunki! Yawarta chaqchuspa llaqtata hatarichiq runa, mana allin ruwaypa hawanpi llaqtata hatarichiq runa,

¹³ Tukuy Atiyniyuq Tayta Diosmi pisipaywan llamkasqaykita yanqachanqa, tukuy ima ruwasqaykitapas ninam ruparunqa.

¹⁴ Imaynam lamar qochata yaku pampaykuy, chaynam Tayta Diospa atiyninta reqsiq runakunapas kay pachata huntaykunqa.

¹⁵ ¡Ay, imaynaraq kanqa! Penqayninta qawananpaq tragota upyachispa runamasinta machachiq runa.

¹⁶ Alabasqa kanaykimantam penqaypi kanki, Diospunim sinkachisuspayki qampatapas penqaynikita qawachinqa, hinaspam reqsisqa kaynikitapas pasaypaq penqayman tikranqa.

¹⁷ Líbano orqopi tukuy mana allin ruwasqaykipas kikillaykimanmi chayamusunki, purun animalninkuna wañuchisqaykimantapas sinchi mancharisqam kanki. Kaykunam hamusunki runakunata wañuchispayki kay allpata chaynataq runankunatapas ñakarichisqaykimanta.

¹⁸ ¿Imapaqtaq valenman runapa ruwasqan idoloqa? ¿Imapaqtaq valenman pantayman pusakuq idoloqa? Idolokunaqa manam rimanchu, ¿ruwaqnin runapas imaynataq chaykunapi hapipakunman?

¹⁹ ¡Imallapiraq rikukunqa! Kullumanta idolota “rikchariy” niq runa, rumimanta mana rimaq idolota “hatariy” niq runa. ¿Yaqachu chay idolokuna imallatapas willakunman? Manam; qori-qollqewan llusisqaña kaspapas paykunaqa manam kawsankuchu.

²⁰ Tukuy Atiyniyuq Tayta Diosmi ichaqa sapaqchakusqan templonpi kachkan. Paypa qayllanpiyá kay pacha upallachun.