Génesis 8 - CHUYA QELLQA La Biblia en Quechua de Ayacucho 2012

Parapa usyamusqanmanta

¹ Diosmi qawarirqa Noeyta chaynallataq paywan kuska arcapi kaq llapallan animalkunatapas, hinaspam kay pachata sinchi wayrawan pukuchimurqa, chaymi yakukuna asllayayta qallaykurqa.

² Lamar qochamanta lloqsimuq yakukunapas takyaramurqam, allpa ukumanta toqyamuq yakukunapas wichqakururqam, cielomanta paqchamuq yakukunapas taniramurqam.

³ Chaymi kay pachapi yakukuna allimanta asllayarqa, pachak pichqa chunka punchawpi chakinankama,

⁴ hinaptinmi arca tiyaykurqa Ararat orqopi, qanchis kaq killapa chunka qanchisniyuq punchawninpi.

⁵ Yakukunapa chakisqanman hinam, chunka kaq killapa qallariyninpi orqokunapa puntankunapas rikukuyta qallaykurqa.

⁶ Tawa chunka punchawmantam arcapa ventananta Noé kicharurqa.

⁷ Hinaspanmi ullachkuta kacharirqa, chay ullachkum kayman chayman pawaykacharqa kay pachapi yaku chakinankama.

⁸ Chaymantam palomatañataq kacharirqa kay pachapi yakukuna asllayasqanta yachananpaq.

⁹ Chay palomam tiyaykunanpaq mana maypi chaki allpata tarispa arcaman kutiramurqa, hinaptinmi Noeyqa makinta haywariykuspa arcaman kutiykachirqa.

¹⁰ Qanchis punchawtawanraq suyaykuspanmi kaqllamanta chay palomata kacharirqa.

¹¹ Hinaptinmi chay paloma yaqa tardeykuqtaña kutiramurqa aceitunas sachapa rapinta piconpi apakusqa. Chaywanmi Noé yacharurqa kay pachapi yakukuna chakirusqantaña.

¹² Qanchis punchawtawanraq suyaykuspanmi kaqllamanta chay palomata kacharirqa, hinaptinmi chay palomaqa manaña kutimurqañachu.

¹³ Soqta pachak hukniyuq watanpi Noé kachkaptinmi, punta kaq killapa qallariynin punchawpi yakukuna chakirurqa. Chay punchawmi arcapa qatanta Noé kichaykuspa qawaykacharikurqa hinaptinmi allpaqa chakiña kachkasqa.

¹⁴ Iskay kaq killapa iskay chunka qanchisniyuq punchawninpim kay pachaqa pasaypaqtaña chakirurqa.

¹⁵ Chaymi Noeyta Dios nirqa:

¹⁶ Arcamanta lloqsiy, lloqsichuntaq warmikipas, churikikunapas chaynataq llumchuynikikunapas.

¹⁷ Hurqoytaq qanwan kuska kaq alton pawaq animalkunatapas, uywa animalkunatapas, purun animalkunatapas chaynataq qasqonpa puriq animalkunatapas; chaynapi sinchita miraspa kay pachaman huntachunku, nispa.

¹⁸ Chaymi Noé lloqsirqa warmintin chaynataq churinkunapas warmintinkama.

¹⁹ Llapallan animalkuna, qasqonpa puriq animalkuna, alton pawaq animalkuna, uywa animalkuna hinaspa purun animalkunapas castanman hinam lloqsirqaku.

²⁰ Chaymantam huk altarta Tayta Diospaq Noé ruwapurqa, hinaspam sacrificanapaq kaq llapallan animalmanta, pawaq animalkunamanta chaynataq pampan puriqkunamantapas wañuchispa lliw kañana ofrendata Diosman chay altarpi ofrecerqa.

²¹ Chaymi Tayta Dios sacrificiopa miskillaña asnariyninta chaskiykuspan sonqonpi nirqa: Kunanmantaqa manañam runakunapa huchanmanta kay pachata ñakasaqñachu. Runaqa warma kasqanmantapas mana allinkunalla ruway munaqmi. Kayna puchukachisqayta hinaqa manañam huktawanqa lliw unanchasqaykunataqa puchukachisaqñachu.

²² Kay pacha kanankamaqa kanqam tarpuypas cosechapas, chiripas rupaypas, poqoypas chirawpas, punchawpas tutapas, nispa.