Génesis 7 - CHUYA QELLQA La Biblia en Quechua de Ayacucho 2012

Arcaman Noé yaykusqanmanta

¹ Chaymantam Noeyta Tayta Dios nirqa: Aylluykikunapiwan kuska arcaman yaykuy, llapallan runakunamantam qamta allin ruwaqta qawayki.

² Mikunapaq kaq animalkunamantam qanchis paresta orqontin chinantinta yaykuchinki. Mana mikunapaq kaq animalkunatam ichaqa huk paresllata orqontin chinantinta yaykuchinki.

³ Alton pawaqkunamantapas qanchis parestam orqontin chinantinta castanman hina yaykuchinki, chaynapi miranankupaq.

⁴ Qanchis punchawmantam kay pachaman parachimusaq tawa chunka punchaw tawa chunka tuta; llapallan kawsaqkuna unanchasqaytam kay pachamanta chinkachisaq, nispa.

⁵ Chaymi Tayta Diospa kamachisqanman hina Noé ruwarqa.

⁶ Kay pachaman sinchi para chayamuyta qallaykuptinmi soqta pachak watanpi Noé kachkarqa.

⁷ Chay sinchi para chayayta qallaykamuptinmi arcaman Noé yaykurqa, warmintin chaynataq churinkunapas warmintinkama.

⁸ Mikunapaq animalkunatapas, mana mikunapaq animalkunatapas, alton pawaq animalkunatapas chaynallataq qasqonpa puriq animalkunatapas,

⁹ Diospa kamachisqanman hinam paresnintintakama orqontin chinantinta arcaman yaykuchirqa.

¹⁰ Chaymi qanchis punchawmanta kay pachata yakukuna pampayta qallaykamurqa.

¹¹ Soqta pachak watayuq Noé kachkaptinmi, iskay kaq killapa chunka qanchisniyuq punchawninpi, lamar qochapi yakukuna lloqsimurqa, allpa ukumanta yakukuna toqyamurqa, cielopi yakukunapas taqtakaykamurqa.

¹² Tawa chunka punchaw tawa chunka tutam kay pachaman paramurqa.

¹³ Chay punchawpim arcaman Noeyqa warmintin yaykurqa, yaykurqataqmi churinkunapas, Sem, Cam hinaspa Jafetpas, warmintinkama.

¹⁴ Paykunawan kuskam yaykurqa castanman hina purun animalkunapas, uywa animalkunapas, qasqonpa puriq animalkunapas, raprayuq tukuy rikchaq animalkunapas.

¹⁵ Llapallan kawsaq animalkunam paresnintinkama arcaman Noeywan kuska yaykurqaku.

¹⁶ Tukuy rikchaq animalkunam chinantin orqontin arcaman yaykurqaku Diospa kamachisqanman hina, chaymantam arcapa punkunta Tayta Dios wichqarurqa.

¹⁷ Tawa chunka punchaw sinchi para kay pachaman chayamuptinmi arcata maymi kasqanmanta yaku wampuchiyta qallaykurqa.

¹⁸ Yakukuna kay pachaman aswan-aswan huntasqaman hinam arcapas yaku hawanpi wampurqa.

¹⁹ Yakukunam kay pachaman llumpayta huntarurqa alto orqokunatapas lliwta pampaykunankama.

²⁰ Yakuqa llapa orqokunata pamparuspapas yaqa qanchis metro mastaraqmi hoqarikururqa.

²¹ Chaynapim wañururqaku kay pachapi llapallan kawsaqkuna: Qasqonpa puriq animalkuna, alton pawaq animalkuna, uywa animalkuna, purun animalkuna, tukuy rikchaq animalkuna chaynallataq llapa runakunapas.

²² Kay pachapi samaywan kawsaqkunam lliw wañururqaku.

²³ Chaynatam kay pachapi llapallan kawsaqkuna wañururqaku, runakunamanta qallaykuspa uywa animalkuna, qasqonpa puriq animalkuna chaynallataq alton pawaq animalkunapas; aswanqa Noeywan kuska arcapi kaqkunallañam qeparurqaku.

²⁴ Pachak pichqa chunka punchawmi yaku kay pachapi qocharayarqa.