Génesis 50 - CHUYA QELLQA La Biblia en Quechua de Ayacucho 2012

¹ Joseymi taytanta abrazaykuspa waqastin muchaykurqa.

² Chay-mantam José kamachirqa atiendeqnin medicokunata hampikunawan taytanpa cuerponta chakichinankupaq, chaymi Israelpa cuerponta medicokuna chakichirqaku.

³ Tawa chunka punchawpim chakichirqaku, chayna punchawpi chakichina kasqanrayku. Egipto runakunañataqmi qanchis chunka punchaw Jacobmanta waqarqaku.

⁴ Chay llaki punchawkuna pasaruptinmi rey Faraonpa wasinpi kaqkunata José rimapayarqa: Ama hina kaspaykichikyá Faraonta rimapayaykapuwaychik.

⁵ Taytaymi jurachiwarqa kaynata: “Wañukuptiyqa Canaán lawpi sepultura toqosqaypim pampawanki” nispa. Chaynaqa, ama hina kaspayá taytayta pamparamunaypaq kachaykuwachun, chayllam kutiramusaq, nispa.

⁶ Hinaptinmi Faraón nirqa: Rispaykiyá juramento ruwasqaykiman hina taytaykita pamparamuy, nispa.

⁷ Chaymi taytanta pampananpaq José rirqa, paywantaqmi rirqa Faraonpa kamachikuyninpi llapallan yanapaqninkunapas, wasinpi ancianokunapas hinaspa Egipto nacionpi llapallan ancianokunapas.

⁸ Rirqakutaqmi Joseypa ayllunkunapas, llapallan wawqenkunapas. Gosén allpapiqa qeparurqaku warmakunawan, ovejakunawan hinaspa vacakunallañam.

⁹ Joseywanmi rirqaku achkallaña runakuna, carretakunapas hinaspa caballokunapi silladakunapas.

¹⁰ Jordán mayupa chimpan Atad eraman chayaruspankum llumpa-llumpayta waqarqaku. Chaypim José qanchis punchawpuni taytanmanta duelopi karqa.

¹¹ Chay llaqtapi yachaq cananeokunañataqmi Atad erapi waqasqankuta qawaspanku nirqaku: “Egipto runakunapa hatun llakinmi kayqa” nispanku. Chayraykum “Abel-mizraim” nispa chay erata suticharqaku, chay eraqa Jordán mayupa chimpanpim kachkan.

¹² Israelpa churinkunam taytankupa kamachisqanman hina ruwaspanku,

¹³ Canaán lawman aparqaku, hinaspam Macpela chakrapi kaq machaypi pamparqaku. Chay chakratam rantirqa Abraham Het casta Efronmanta, mirayninkuna chaypi pampakunanpaq; chay chakraqa Mamre llaqtapa chimpanpim kachkan.

¹⁴ Chaymantam Joseyqa wawqen-kunawan hinaspa kuyaqninkunawan, Jacobta pamparuspanku Egipto nacionman kutirqaku.

Wawqenkunata José kallpanchasqanmanta

¹⁵ Taytanku wañukuptinmi Joseypa wawqenkuna ninakurqaku: Joseyqa ichapas cheqniwachkanchik, hinaspaqa vengakuruwasunmi tukuy mana allin ruwasqanchikmanta, nispanku.

¹⁶ Chaymi Joseyta nichimurqaku: “Taytanchikmi manaraq wañukuchkaspa kamachikurqa,

¹⁷ qanman kaynata ninaykupaq: Ruegakuykim wawqekikunapa mana allin ruwasusqaykita hinaspa huchallikususqaykita pampachaykunaykipaq, nispa. Chaynaqa, wawqellayku José, kunanmi ruegakuykiku: Mana allin ruwasqaykumanta pampachaykuwayku, ñoqaykupas taytanchikpa Diosnin yupaychaqmi kaniku”, nispanku. Chaynata willaptinkum Joseyqa waqakurqa.

¹⁸ Hinaptinmi wawqenkuna hamuspa paypa qayllanpi kumukuykuspa nirqaku: Kunanqa makikipim kaniku, criadoykikunañam kaniku, nispanku.

¹⁹ Joseyñataqmi nirqa: Ama manchakuychikchu, ñoqaqa manam Dioschu kani.

²⁰ Qamkunam ñoqapa contraypi mana allinta tantearqankichik, ichaqa Diosmi allinpaq tikrarurqa, kay qawasqaykichikpi hina ruwananpaq, chaynapi achka runakunata kawsachinanpaq.

²¹ Chaynaqa, ama manchakuychikchu. Ñoqam qamkunatapas churikichikkunatapas uywasqaykichik, nispa. Chaynatam Joseyqa paykunata consuelarqa, hinaspam kuyakuywan rimapayarqa.

Joseypa wañukusqanmanta

²² Joseymi taytanpa ayllunkunapiwan Egipto nacionpi yacharqa. Joseyqa pachak chunka watatam kawsarqa.

²³ Rikurqam Efrainpa churinkunata, willkankunapa willkantapas. Manasespa churin Maquirpa churinkunatapas uywarqam.

²⁴ Huk punchawmi wawqenkunata José nirqa: Wañukusaqñam ñoqaqa, ichaqa Diosmi cheqaptapuni watukamusunkichik, hinaspam kay nacionmanta kutichisunkichik Abrahamman, Isaacman hinaspa Jacobman prometesqan allpaman, nispa.

²⁵ Chaymantam Israelpa mirayninkunata jurachispan José nirqa: Diosmi cheqaptapuni watukamusunkichik, chayna kaptinmi tulluykunata kaymanta apankichik, nispan.

²⁶ Joseymi pachak chunka watanpi wañukurqa, chaymi hampikunawan chakichispanku huk cajonpi Egipto nacionpi waqaycharqaku.