Génesis 46 - CHUYA QELLQA La Biblia en Quechua de Ayacucho 2012

Egiptoman Jacob risqanmanta

¹ Israelmi tukuy kapuqnintin ripukurqa. Beersebaman chayaruspanmi animalkunata wañuchispa taytan Isaacpa Diosninman ofrecerqa.

² Chay tutam Israelta mosqoyninpi rimapayaspan Dios nirqa: Jacob, Jacob, nispan. Payñataqmi nirqa: Kaypim kachkani, nispa.

³ Chaymi Dios nirqa: Ñoqam kani Dios, taytaykipa Diosnin. Ama manchakuychu Egipto nacionman riytaqa, chaypim hatun nacionta qanmanta hatarichisaq.

⁴ Ñoqam qanwan kuska Egipto nacionman risaq. Ñoqataqmi kutichimusqaykipas, Joseypa qayllanpim wañukunkipas, nispa.

⁵ Chaymi Beerseba llaqtamanta Jacob rirqa. Churinkunam taytanku Jacobta chaynataq wawakunatapas mamantinta Faraonpa apachimusqan carretakunapi aparqaku.

⁶ Jacobwan lliw mirayninkunam Canaán lawpi armasqanku animalkunata qatirikuspa Egipto nacionman ripukurqaku.

⁷ Jacobmi Egipto nacionman rirqa, qaritapas warmitapas churinkunata, willkankunata hinaspa llapallan mirayninkunata pusarikuspan.

⁸ Kaykunam Egipto nacionman riq Israel casta runakuna, otaq Jacobpa mirayninkuna: Jacobpa piwi churinmi karqa Rubén.

⁹ Rubenpa churinkunam karqa Hanoc, Falú, Hezrón hinaspa Carmi.

¹⁰ Simeonpa churinkunam karqa: Jemuel, Jamín, Ohad, Jaquín, Zohar hinaspa Saúl. Saulqa karqa Canaán warmipa wawanmi.

¹¹ Leviypa churinkunam karqa: Gersón, Coat hinaspa Merari.

¹² Judapa churinkunam karqa: Er, Onán, Sela, Fares hinaspa Zara. Erwan Onanqa Canaán lawpim wañukurqaku. Farespañataqmi karqa Hezrón hinaspa Hamul.

¹³ Isacarpa churinkunam karqa: Tola, Fúa, Job hinaspa Simrón.

¹⁴ Zabulonpa churinkunam karqa: Sered, Elón hinaspa Jahleel.

¹⁵ Paykunam Jacobpa warmin Leapa wachakusqan mirayninkuna, Padan-aram lawpi naceqkuna karqaku. Warmi churin Dinatawan yupaptinkum qaripas warmipas kimsa chunka kimsayuq karqaku.

¹⁶ Gadpa churinkunam karqa: Zifión, Hagui, Ezbón, Suni, Eri, Arodi hinaspa Areli.

¹⁷ Aserpa churinkunam karqa: Imna, Isúa, Isúi hinaspa Bería. Paninkuñataqmi karqa Sera. Beriapa churinkunam karqa Heber hinaspa Malquiel.

¹⁸ Paykunam karqa Zilpapi Jacobpa mirayninkuna, Zilpatam Labán qorqa churin Leaman criadanpaq, paypa mirayninkunam chunka soqtayuq karqaku.

¹⁹ Jacobpa warmin Raquelpa wawan-kunañataqmi karqa Joseywan Benjamín.

²⁰ Joseypa churinkunam karqa: Mana-seswan Efraín, On llaqtapi sacerdote Potifarpa churin Asenatpa wawankuna, Egipto nacionpi naceqkuna.

²¹ Benjaminpa churinkunam karqa: Bela, Bequer, Asbel, Gera, Naamán, Ehi, Ros, Mupim, Hupim hinaspa Ard.

²² Warmin Raquelpi Jacobpa mirayninkunam chunka tawayuq karqaku.

²³ Danpa churinmi karqa Husim.

²⁴ Neftaliypa churinkunam karqa: Jahzeel, Guni, Jezer hinaspa Silem.

²⁵ Paykunam Bilhapi Jacobpa mirayninkuna karqaku. Bilhatam Labán churin Raquelman criadanpaq qorqa, Bilhapa mirayninkunam karqa qanchis.

²⁶ Egipto nacionman Jacobwan riqkunam soqta chunka soqtayuq runakuna karqaku. Jacobpa churinkunapa warminkunam ichaqa mana yupasqachu karqa.

²⁷ Joseypa churinkunam iskay karqa, paykunam Egiptopi nacerqaku. Jacobpa llapallan mirayninkunam, Egipto nacionman yaykuqkuna qanchis chunka runakuna karqaku.

²⁸ Jacobmi churin Judata Joseyman ñawpachirqa, chaynapi Gosén lawman hamuspa chaskinanpaq. Gosén lawman chayaruptinkum,

²⁹ carretanta hapispa José kallparqa taytan Israelta chaskinanpaq. Joseymi taytanwan tupaykuspan abrazakuykurqa, hinaspam unaysu waqakurqa.

³⁰ Chaymi Joseyta Israel nirqa: Kayqaya kawsachkaqtaraq rikuykuyki, kunanqa wañukusaqñayá, nispa.

³¹ Chaymantam wawqenkunatawan taytanpa ayllunkunata José nirqa: Rispa rey Faraonman willamusaq: “Canaán lawpi kaq wawqeykunawan taytaypa ayllunkunam chayaramuwan.

³² Paykunaqa oveja michiqkunam, chaymi ovejankuta, vacankuta hinaspa tukuy ima kapuqninkuta aparamunku” nispay.

³³ Rey Faraón qayasuspaykichik “¿ima oficioyuqtaq kankichik?” nispa tapusuptikichikqa,

³⁴ Kaynatam ninkichik: “Serviqnikikunaqa warma kasqaykumanta chaynataq ñawpaq taytaykumantapacham animalkuna michiqkunalla kaniku”, nispaykichik. Chaynapim Gosén lawpi yachankichik, Egipto runakunapaqqa millakuypaqmi kasqa oveja michiqkunawan kuskanchakuyqa.