Génesis 37 - CHUYA QELLQA La Biblia en Quechua de Ayacucho 2012

¹ Jacobmi taytanpa yachasqan Canaán allpapi mana llaqtayuq hina yacharqa.

Joseymantawan wawqenkunamanta

² Kaymi Jacobpa mirayninkunamanta willakuy. Joseymi chunka qanchisniyuq watanpi kachkaspan wawqenkunawan kuska ovejakunata michiq. Chay wawqenkunaqa taytanpa churiwachan Bilhapa hinaspa Zilpapa wawankunam karqaku. Joseymi taytanman willaq paykunapa mana allinkuna ruwasqankuta.

³ Israelmi llapan churinkunamantapas mastaqa Joseyta kuyarqa, machuyayninpiña churyakusqanrayku, chaymi sumaq pachata ruwarapurqa.

⁴ Taytankupa llumpay kuyasqanta qawaspankum wawqenkunaqa Joseyta cheqnikurqaku, hinaspam allillaqa rimapayaqkupaschu.

⁵ Huk kutipim José mosqokururqa hinaspam wawqenkunaman willarqa, chaynapim paykunaqa aswanraq cheqnirurqaku.

⁶ Joseymi paykunata nirqa: Kay mosqoyniyta uyariychik:

⁷ Cha-krapim gavillakunata watachkas-qanchik, hinaptinmi ñoqapa gavillay sayariruspa derecholla karqa, qamkunapa gavillaykichikñataqmi muyuriqninpi kaspa ñoqapa gavillayman kumuykurqaku, nispa.

⁸ Chaymi wawqenkuna nirqaku: ¿Qamqa reyniyku kaspachu ñoqaykupi munaychakunki? nispanku. Hinaspam mosqoyninrayku aswanraq cheqnikurqaku.

⁹ Joseymi huktawan mosqokuruspan wawqenkunaman willarqa: Kunanmi huktawan mosqokuruni, intiwan, killawan, hinaspa chunka hukniyuq chaskakunam ñoqaman kumuykamurqaku, nispa.

¹⁰ Taytanmanpas willakurqam waw-qen-kunaman hina, hinaptinmi taytanpas qaqchaspan nirqa: ¿Ima mosqoytaq chay mosqoynikiqa? ¿Ñoqachu mamaykipiwan hinaspa wawqekikunapiwan hamusaq ñawpaqnikipi pampakama kumuykunaykupaq? nispa.

¹¹ Chaymi Joseymanta wawqenkuna envidiakurqaku, taytanñataqmi chay willasqan mosqoymanta yuyaymanarqa.

Joseyta wawqenkuna rantikurusqanmanta

¹² Joseypa wawqenkunam taytanpa ovejankunata michiq Siquem lawman rirqaku.

¹³ Chaymi Joseyta Israel nirqa: Wawqekikunam Siquem lawpi ovejata michichkanku, paykunata watukaramuy, nispa. Joseyñataqmi nirqa: Rirusaqyá, nispa.

¹⁴ Hinaptinmi Israel nirqa: Rispaykiyá qawaramuy wawqekikunapa chaynallataq ovejakunapa imaynam kasqankuta, kutimuspa willawanaykipaq, nispa. Hebrón qechwamanta kachaptinmi Siquem lawkama José chayarurqa.

¹⁵ Chaymi purunpi purichkaqta huk runa tariruspan tapurqa: ¿Imatataq maskachkanki? nispa.

¹⁶ Joseyñataqmi nirqa: Wawqeykunatam maskachkani, ¿manachu maypim michisqankutapas rikukullawaq karqa? nispa.

¹⁷ Hinaptinmi chay runa nirqa: Kaymantaqa pasakunkuñam, ichaqa uyarirqanim: “Dotán lawman hakuchik” niqta. Chaymi Joseyqa wawqenkunata qatispa Dotán lawpi tarirurqa.

¹⁸ Ichaqa manaraq chayachkaptinmi wawqenkuna rikuruspanku wañurachinankupaq tanteanakururqaku.

¹⁹ Paykunam kaynata ninakurqaku: Waqaya mosqokuqqa hamuchkan.

²⁰ Kunanyá wañurachispa huk pozoman wischuykusunchik hinaspa nisunchik: “Ima purun animalchá mikururqa”, nispanchik. Chaynapim mosqoyninkunamanta yachasunchik, nispanku.

²¹ Rubenñataqmi wawqenkunapa rimasqankuta uyariruspa paykunamanta librayta munaspan nirqa: Ama wañuchisunchikchu, nispa.

²² Rubenqa taytanmanmi kutichiyta munarqa, hinaspam wawqenkunamanta librayta munaspa nirqa: Ama wañuchiychikchu inocente warmataqa, aswanqa kay pozollaman wischuy-kuychik, nispa.

²³ Wawqenkunapa kasqanman José chayaruptinmi, chay sumaq pachanta paykuna llatanaruspa,

²⁴ mana imayuq chaki pozoman wischuykurqaku.

²⁵ Hinaspam mikunankupaq tiyaykuspanku Ismael casta negociantekunata Galaad lawmanta hamuchkaqta rikururqaku. Paykunam camellonkupi Egiptoman apachkarqaku miski asnaq perfumekunata, balsamota hinaspa mirrata.

²⁶ Chaymi wawqenkunata Judá nirqa: ¿Imatataq hurqokusunchik wawqen-chikta wañurachispa chaynataq wañus-qanta pakaspanchikpas?

²⁷ Ama wañu-chisunchikchu, aswanqa Ismael runa-kunaman rantikurusunchik, wawqenchikqa aychanchikmi, nispa. Chaymi wawqenkunapas allinmi nirqaku.

²⁸ Madián law negociante runakuna pasachkaptinkum, wawqenkuna Joseyta pozomanta hurqoruspanku Ismael casta runakunaman iskay chunka qollqepaq rantikururqaku. Chaymi Joseyta Egipto nacionman aparqaku.

²⁹ Rubenñataqmi chay pozoman kutispa Joseyta manaña tarispan, llakimanta pachankunata llikipakurqa.

³⁰ Chaymi wawqenkunaman kutirispan nirqa: ¡Warmaqa manam kanchu! ¿Imapitaq kunan rikukuykuni? nispa.

³¹ Chaymi paykuna Joseypa sumaq pachanta hapispanku, huk chivatochata wañurachispa yawarninwan chapuparurqaku.

³² Hinaspam taytankuman apaspa kaynata nirqaku: Kaytam tariramuniku, reqsiykuy churikipa pachanchu icha manachu, nispanku.

³³ Chaymi reqsiykuspa Jacob nirqa: Churiypa pachanmi kayqa, ima purun animalchiki paytaqa llikiparuspa mikurun, nispa.

³⁴ Hinaspanmi Jacobqa llakimanta pachanta llikipakuspa luto pachawan churakurqa, hinaspam churinmanta achka punchawta waqallarqa.

³⁵ Chaymi llapallan churinkuna consuelanankupaq asuykurqaku, ichaqa paymi consuelanankuta mana munaspan nirqa: Churiymantaqa wañukunaykamam llakikusaq, nispa. Chaynata nispanmi waqallarqa.

³⁶ Madián law runakunañataqmi Joseyta Egipto nacionpi Potifarman rantikururqaku. Potifarqa Egipto nacionpi rey Faraón waqaychaq soldadokunapa capitanninmi karqa.