Génesis 33 - CHUYA QELLQA La Biblia en Quechua de Ayacucho 2012

Esauwan Jacob allinyanakusqanmanta

¹ Jacobmi rikururqa Esauta tawa pachak runantin hamuchkaqta, chaymi wawakunata Leaman, Raquelman hinaspa iskaynin criadankunaman rakinarqa.

² Hinaspam criadankunata wawantintakama puntaman churarqa, qatiqninmanmi Leata wawankunatawan, qepamanñataqmi Raquelta wawan Joseytawan.

³ Jacobñataqmi paykunapa ñawpaqninkuta rirqa, hinaspam wawqenman chayanankama qanchis kutikama pampaman kumuykurqa.

⁴ Chaymi wawqen Esaú kallpaykuspa Jacobta abrazaykuspan muchaykurqa, hinaspam kuskanku waqarqaku.

⁵ Chaymantam Jacobpa warminkunatawan churinkunata rikuykuspan Esaú tapurqa: ¿Pikunataq kay qanwan hamuqkunaqa? nispa. Jacobñataqmi nirqa: Paykunaqa kay serviqnikiman Diospa qowasqan churiykunam, nispa.

⁶ Chaymi Jacobpa criadankuna wawankunapiwan asuykamuspa pampaman kumuykurqaku.

⁷ Leapas wawankunapiwanmi asuykamuspa qonqoranpa kumuykurqaku, chaynallataqmi Joseywan maman Raquelpas asuykamuspanku pampaman kumuykurqaku.

⁸ Chaymi Esaú tapurqa: ¿Imata piensaspaykitaq kay atajontin animalkunata apachimuwarqanki? nispa. Hinaptinmi Jacob nirqa: Qampa llakipayakuyniki tariykuyllatam, nispa.

⁹ Chaymi Esaú nirqa: Wawqelláy, ñoqataqa manam imapas pisiwanchu, kaykunaqa qampam manam munanichu, nispa.

¹⁰ Hinaptinmi Jacob nirqa: Ama hina kaspaykiyá kuyakuyniyta chaskiykuway, Diospa uyantapas rikuykuchkaq hinam qampa uyaykita rikuykuni, qampas kusisqataqmi chaskiykuwanki.

¹¹ Kay kuyakuyniy apamusqaytayá chaskiykuway, tukuy kaykunaqa Diospa qowasqanmi, nispa. Llumpayta hikutaptinmi Esaú chaskiykurqa,

¹² hinaspam nirqa: Hakuchik kuska, ñawpaqnikitam risaq, nispan.

¹³ Chaymi Jacob nirqa: Wawqelláy, qawasqaykipi hinapas churiykunam wawakunallaraq, chaynataqmi cabraykunapas, ovejaykunapas, vacaykunapas llullu uñayuqkamallaraq, pisiparuspankuchá huk punchawllapi llapallan wañurunmanku.

¹⁴ Taytalláy, kay serviqnikipa ñawpaqnintayá puntachkay, ñoqaqa allimantam hamusaq, animalkunapa, wawakunapa risqanman hinalla, Seir orqopiña tupasunchik, nispa.

¹⁵ Esauñataqmi nirqa: Ñoqawan hamuq runaykunatayá wakinta saqeykusqayki, nispa. Hinaptinmi Jacob nirqa: Señorlláy ¿allinlla chaskiykuwachkaspaqa imapaqñataq saqewankiman? nispa.

¹⁶ Chaynapim Esaú chay punchawlla Seir lawman kutikurqa.

¹⁷ Jacobñataqmi Sucot lawman pasarqa, hinaspam wasita chaypi ruwarqa, ruwarqataqmi animalninkunapaq ramadakunatapas. Chayraykum chay sitiota suticharqa Sucotwan.

¹⁸ Jacobmi Padan-aram lawmanta hamuspa Canaán allpapi kaq Siquem llaqtaman chayaruspan chay llaqtapa chimpanpi carpankunata sayachirqa.

¹⁹ Chaypim huk chakrata rantirurqa Siquempa taytan Hamorpa churinkunamanta tawa kilo parten qollqewan, hinaspam chaypi carpanta sayachirqa.

²⁰ Chaypitaqmi huk altartapas ruwarqa, hinaspam “El-Elohe-Israel” nispa suticharqa.