Génesis 32 - CHUYA QELLQA La Biblia en Quechua de Ayacucho 2012

Wawqen Esauwan Jacob tupanakusqanmanta

¹ Jacob richkaptinmi Diospa angelninkuna chaskiqnin lloqsimurqa.

² Chaymi Jacobqa paykunata rikuruspan nirqa: Diospa campamentonmi kayqa, nispa. Hinaspam chay lugarta Mahanaimwan suticharqa.

³ Chaymantam willakuqkunata Jacobqa wawqen Esauman kacharqa, Seir law Edom nacionpi kachkaptin,

⁴ kaynata nimunankupaq: Serviqniki Jacobmi kaynata nin: “Kunankamam tionchik Labanwan yacha-murqani.

⁵ Kunanqa kapuwanñam va-caykuna, asnoykuna, ovejaykuna, cabray-kuna chaynataq criadoykunawan criadaykunapas, chaymi qam señorniyman willachimuyki llakipayariykuwaspa chaskiykuwanaykipaq”, nispa.

⁶ Chay willakuqkunam kutimuspanku Jacobman kaynata willarqaku: Wawqeki Esaumanmi rirqaniku, chaymi paypas tawa pachak runakunawan chaskisuqniki hamuchkan, nispanku.

⁷ Chaymi Jacobqa anchata mancharikuspan hukmanyarurqa, hinaspam paywan kaq runakunata, ovejakunata, vacakunata chaynallataq camellokunatapas iskayman rakirurqa,

⁸ kaynata tanteaspa: “Esaú hamuspa huknin atajotaña wañurachiptinpas hukninqa lluptinqam”, nispa.

⁹ Chaymantam Jacobqa Diosta maña-kurqa: Abueloy Abrahampa chaynataq taytay Isaacpa yupaychasqan Tayta Dios, qanmi niwarqanki: “Taytaykipa aylluykikunapa kasqanman kutikuy, hinaptinmi allinta ruwasqayki nispayki”.

¹⁰ Cheqaptapunipas manam kuyapayakuynikita chaskinaypaq hinachu kani. Tawnayuqllam kay Jordán mayutaqa chimparqani, kunanmi ichaqa iskay atajo kapuqniyuqtaña kutirachimuwanki.

¹¹ Wawqey Esaumanta libraykullaway, paytaqa manchakunim. Hamuruspachá warmi-kunata, wawakunata wañurachinqa.

¹² Qamtaqmi niwarqanki: “Ñoqam yanapasqayki allin kanaykipaq chaynataq lamar qochapi aqo hinaña mana yupay atina mirayniyuq kanaykipaq”, nispayki.

¹³ Chay tutam Jacob chaypi puñururqa, hinaspam akllarqa kapuqninkunamanta wawqen Esauman qonanpaq:

¹⁴ Iskay pachak cabrakunata, iskay chunka chivatokunata, iskay pachak ovejakunata, chunka carnerokunata,

¹⁵ kimsa chunka china camellokunata uñantintakama, tawa chunka vacakunata, chunka novillokunata, iskay chunka china asnokunata, chunka orqo asnokunata.

¹⁶ Hinaspam sapa atajota serviqninkunaman kunaykuspa kamachirqa: Ñawpachiychik huknin atajomanta karunchasqatakama, nispan.

¹⁷ Punta riqtam nirqa: Wawqey Esauwan tupaptiki: “¿Pitaq kachkanki? ¿Maytataq richkanki? ¿Pipataq kay qatisqayki animalkuna?” nispa tapusuptikiqa

¹⁸ kaynatam ninki: “Señorlláy Esaú, kaykunataqa serviqniki Jacobmi qanman apachimuwarqa, paypas qepaykutam hamuchkan”, nispa.

¹⁹ Chaynallata ninankupaqmi kamachirqa punta riqtawan qepa riqkunatapas. Esauwan tupaspaykichikqa chay nisqayman hinam ninkichik:

²⁰ “Serviqniki Jacobqa qepaykutam hamuchkan”, nispa. Chaynataqa nirqa kaynata yuyaymanaspam: Regalokunata puntarachispaymi piñakuyninmanta sonqonta tiyaykachisaq, hinaspañam tupaykusaq, icharaqpas chaskiykuwanman, nispa.

²¹ Chaynapim puntata regalokunata apachirqa, hinaspanmi chay tuta campamentopi puñurqa.

Angelwan Jacob peleasqanmanta

²² Hina chay tutallam Jacobqa iskaynin warminkunata, iskaynin criadankunata, chunka hukniyuq churinkunata hatarichispa Jaboc mayupa vadonta chimparachirqa.

²³ Chimpa-chirqataqmi llapa kapuqninkunata-pas.

²⁴ Jacobñataqmi sapallan qeparurqa, chaypim huk runawan achikyanankama pelearqa.

²⁵ Chay runam mana venceyta atispa Jacobta pierna kuchunpi waqtarurqa, chaymi Jacobpa huknin piernan moqakururqa.

²⁶ Chay qarim Jacobta nirqa: Achikyamuchkanñam, kachaykuway pasakunaypaq, nispa. Jacobñataqmi nirqa: Mana bendeciwaptikiqa manam kacharisqaykichu, nispa.

²⁷ Chaymi chay runa tapurqa: ¿Imataq sutiki? nispa. Payñataqmi nirqa: Jacobmi, nispa.

²⁸ Hinaptinmi chay runa nirqa: Manañam Jacobñachu sutikiqa kanqa, aswanqa Israelñam, Dioswanpas chaynataq runakunawanpas peleaspa vencerusqaykirayku, nispa.

²⁹ Jacobñataqmi chay runata tapurqa: Kunanyá sutikita willaykuway, nispa. Payñataqmi nirqa: ¿Imapaqtaq sutiymanta tapuwanki? nispa. Hinaspanmi chaypi bendeciykurqa.

³⁰ Chaynapim Jacobqa chay lugarta Penielwan suticharqa, kaynata nispa: Diosta rikuruchkaspaypas kawsachkaniraqmi, nispa.

³¹ Chaymantam Jacobqa wistutyastin rirqa, Penielta pasaruptinñam inti qespiramurqa.

³² Jacobta pierna kuchunpi waqtarusqanraykum Israel runakunaqa mana mikunkuchu animalpa piernanpi kaq ankuntaqa kunan punchawkamapas.