Génesis 24 - CHUYA QELLQA La Biblia en Quechua de Ayacucho 2012

Isaacpaq warmi pusachimusqanmanta

¹ Abrahammi llumpaytaña machuyarurqa. Tayta Diosmi bendeciykurqa tukuy imakunapi.

² Abrahammi tukuy imankunamanta nanachikuq mayornin kaq serviententa nirqa: Kunanyá makikita piernay ukuman churay,

³ hinaspayá cielokunapi chaynataq kay pachapi munaychakuq Tayta Diosrayku prometeway, kay yachasqay Canaán allpapi warmiwanqa churiyta ama casarachinaykipaq.

⁴ Aswanqa llaqtayta rispaykim aylluykunamanta kaq warmita churiy Isaacpaq hurqomunki, nispa.

⁵ Hinaptinmi Serviqnin nirqa: Sichum chay warmi mana hamuyta munaptinqa ¿maymi lloqsimusqayki allpamanchu churikita kutichisaq? nispa.

⁶ Chaymi Abraham nirqa: ¡Amapunim wakmanqa churiyta kutichinkichu!

⁷ Tayta Diosmi taytaypa wasinmanta, aylluykunapa llaqtanmanta hurqomuwaspan jurawarqa: Kay allpatam miraynikikunaman qosaq, nispa. Paymi angelninta ñawpaqnikita kachanqa, churiypaq warmita wakmanta pusamunaykipaq.

⁸ Sichum chay warmi qanwan mana hamuyta munaptinqa librem kanki kay jurawasqaykimanta; churiytam ichaqa ama wakman kutichinkichu, nispa.

⁹ Hinaptinmi Abrahampa piernan ukuman makinta churaykuspan chay serviqnin jurarqa Abrahampa nisqanman hina ruwananpaq.

¹⁰ Hinaspanmi patronninpa chunka camellonkunata, llapa kapuqninkunamanta allinnin regalokunata aparikuspan pasarqa. Chaymantam chayarurqa Mesopotamia lawpi Nacorpa llaqtanman.

¹¹ Hinaspam camellonkunata samachirqa llaqtapa hawa lawninpi, yakuyuq pozopa waqtanpi, sipaskunapa yakuman lloqsimunanku tardeykuy chikata.

¹² Hinaspam Diosta mañakuspan nirqa: Patronniy Abrahampa yupaychasqan Dios, mañakuykim patronniy Abraham-man prometesqaykita cumplinaykipaq. Yanapaykuwayá imamanmi hamusqay allin lloqsinanpaq.

¹³ Kay pozopa waqtanpim kachkani, kayqaya kay llaqtapi sipaskuna yakuman hamuchkanku.

¹⁴ Chaynaqa, hukkaqnin sipastam ñoqa nisaq: Ama hina kaspayki puyñuykimanta yakuta tomaykachiway, nispa; sichum payñataq niwanqa: “Tomaykuyá, camelloykikunamanpas tomaykachisaqyá” nispan, hinaptinqa chay sipasmi serviqniki Isaacpaq akllasqayki warmi kanqa. Chaynapim yachasaq patronniyman prometesqayki cumplisqaykita, nispa.

¹⁵ Mañakuyta manaraqpas tukuchkaptinmi Betuelpa churin Rebeca hombronpi puyñu aparisqa hamuchkasqa. Betuelqa karqa Nacorpa churinmi, Milcañataqmi maman. Nacorqa karqa Abrahampa wawqenmi.

¹⁶ Rebecaqa karqa buenamozam, manaraq qari reqsiq sipas. Paymi pozoman uraykuspan yakuta wisiykuspa kutikuchkarqaña.

¹⁷ Hinaptinmi Abrahampa serviqnin haypaykuspan nirqa: Ama hina kaspa puyñuykimanta yakullaykita tomaykachiway, nispa.

¹⁸ Rebecañataqmi nirqa: Tomaykuyá taytáy, nispa. Hinaspanmi utqayman puyñunta uraykachispan hapiykuspa tomaykachirqa.

¹⁹ Tomaykachispañataqmi nirqa: Camelloykikunapaqpas yakuta hurqora-musaq, saksanankukama tomaykunankupaq, nispa.

²⁰ Utqayllamanña yakuta artesamantalliykuspanmi huktawan kallpaspa camellokunapaqñataq hurqomurqa.

²¹ Chaytam Abrahampa serviqnin upallalla qawarqa, imaman risqanpi Tayta Diospa yanapasqanta yachananpaq.

²² Camello-kuna tomayta tukuruptinmi, Abrahampa serviqninqa Rebecapa senqanman areteta churaykurqa, qoykurqataqmi ancha-ancha precioyuq qorimanta iskay brazaletekunatapas,

²³ hinaspam nirqa: ¿Pipa churintaq kachkanki? Ama hina kaspayá willaykuway. ¿Yaqachu taytaykipa wasinpi campo kanman kunan tuta samakunaykupaq? nispa.

²⁴ Chaymi Rebeca nirqa: Betuelpa churinmi kani, Nacorpawan Milcapa willkan.

²⁵ Wasiykupiqa kachkanmi lugar samakunaykichikpaq, chaynallataq camelloykikunapaq mikuypas, nispa.

²⁶ Hinaptinmi Abrahampa serviqninqa qonqoranpa kumuykuspa Tayta Diosta yupaychaspan

²⁷ kaynata nirqa: Patronniy Abrahampa yupaychasqan Tayta Dios, alabaykim patronniyman prometesqaykita cumplisqaykimanta hinaspa ayllunkunapa kasqanman hawkallata pusamuwasqaykimanta, nispa.

²⁸ Rebecañataqmi wasinman kallpaspan tukuy kaykunata mamanman willarqa.

²⁹ Rebecapam turin karqa Labán sutiyuq, paymi pozopa waqtanpi kaq runaman kallparqa.

³⁰ Paninpa senqanpi areteta, brazonpiñataq brazaletekunata qawaykuspa, chay runapa imam nimusqantawan uyariykuspa, chay runapa kasqanman kallparqa; hinaspam tariykurqa camellonkunawan pozopa waqtanpi kachkaqta.

³¹ Chaymi Labán nirqa: Tayta Diospa bendecisqan, yaykukamuy. ¿Imanasqataq hawallapiqa kachkanki? Allicharamuniñam wasita samakunaykipaq, chaynallataq camelloykikunapaqpas, nispa.

³² Hinaptinmi chay sirviente rirqa wasiman samapakuq, Labanñataqmi cargata uraykachispa camellokunaman pastota qararqa. Paykunamanñataqmi chakinku mayllakunankupaq yakuta apamurqa.

³³ Abrahampa serviqninman mikuyta apamuptinkum nirqa: Manam mikusaqraqchu imam ninayta manaraq niykuchkaspayqa, nispa. Chaymi Labán nirqa: Niykuwaykuyá, nispa.

³⁴ Hinaptinmi willakurqa: Ñoqaqa Abrahampa sirvientenmi kani.

³⁵ Patronniytam Tayta Dios sinchita bendecispan ovejakunawan, vacakunawan, camellokunawan, asnokunawan, qoriwan, qollqewan, criadokunawan criadakunawanpas apuyaykachin.

³⁶ Patronniypa warmin Saram yuyaq kayninpiña huk qari wawata wachakurqa, chaymi payqa tukuy imantapas chay churinmanña qoykun.

³⁷ Patronniymi jurachiwaspan niwarqa: Kay yachasqay Canaán allpapi kaq warmiwanqa amam churiyta casarachinkichu.

³⁸ Aswanqa taytaypa ayllunkunapa kasqanman rispam warmita churiypaq hurqomunki, nispan.

³⁹ Chaymi patronniyta nirqani: ¿Chay warmi ñoqawan mana hamuyta munaptinqa? nispay.

⁴⁰ Hinaptinmi payñataq niwarqa: Ñoqaqa kawsani Diospa qayllanpim, paymi angelninta kachanqa, qanwan rispa yanapasunaykipaq, chaynaqa taytaypa ayllunkunamantam churiypaq warmitaqa hurqomunki.

⁴¹ Aylluykuna warmi churinta qoyta mana munasuptikiqa kay juramentomantaqa mana huchayuqñam kanki, nispan.

⁴² Kunanmi pozoman chayaramuspay Tayta Diosta kaynata mañakurqani: Patronniy Abrahampa yupaychasqan Dios, ruegakuykim imamanmi hamusqay allin lloqsinanpaq.

⁴³ Pozopa waqtanpim kachkani. Chaynaqa, mayqenninpas yakuman hamuq sipastam nisaq: Ama hina kaspaykiyá puyñuykimanta yakuta tomaykachiway nispay.

⁴⁴ Sichum payñataq niwanqa: Tomay-kuyá, camelloykikunamanwan tomaykachisaq, nispan, hinaptinqa chayna niwaqniy sipasyá patronniypa churinpaq akllasqayki warmi kachun, nispay.

⁴⁵ Chaymi mañakuyta manaraqpas tukuchkaptiy hombronpi puyñu aparisqa Rebeca hamuchkasqa, hinaspam yakuta hurqonanpaq pozoman uraykuptin nirqani: Ama hina kaspayá yakullaykita tomaykachiway, nispa.

⁴⁶ Hinaptinmi hombronmanta puyñunta utqayman uraykachispan niwarqa: Tomaykuyá, camelloykikunamanpas tomaykachisaqyá, nispa. Tomaykuptiymi, camelloykunamanpas tomaykachirqa.

⁴⁷ Chaymi tapurqani: ¿Pipa churintaq kachkanki? nispa. Hinaptinmi payñataq niwarqa: Betuelpa churin hinaspa Nacorpa Milcapa willkanmi, nispa. Chaymi huk areteta senqanman churaykurqani, brazonkunamanpas brazaletekunatam churaykurqani.

⁴⁸ Hinaspaymi qonqoranpa kumuykuspay patronniy Abrahampa Tayta Diosninta yupaycharqani. Paymi allinllata kaykama pusamuwarqa, chaynapi patronniypa ayllunpa warmi churinta Isaacpaq pusanaypaq.

⁴⁹ Chaynaqa, kunanyá niykuwaychik patronniypaq imam ruwanaykichiktapas, qamkunaqa cumpliqmi kankichik, mana chayna kaptinqa niykuwaychik alleqmanpas ichoqmanpas pasakunaypaq, nispa.

⁵⁰ Hinaptinmi Labanwan Betuel nirqaku: Kayqa Tayta Diospam, manam “arí” niyta otaq “manam” niytapas atikikumanñachu.

⁵¹ Kayqaya Rebecaqa makikipi, pusaspayá kutikuy. Tayta Diospa nisqanpi hinayá patronnikipa churinpa warmin kachun, nispanku.

⁵² Abrahampa serviqninmi chay nisqankuta uyariykuspan Tayta Diospa qayllanpi qonqoranpa kumukuykurqa.

⁵³ Chaymantam qollqemanta qorimanta alhajakunatawan pachakunata hurqomuspan Rebecaman qoykurqa, qoykurqataqmi turinmanwan mamanmanpas kuyayllapaq regalokunata.

⁵⁴ Chaymantañam hamuqmasinkunapiwan mikuspa tomarqaku, hinaspam samarqaku. Paqarin-nintinñataqmi hatarispa nirqa: Aviawaychikñayá patronniyman kutikunaypaq, nispa.

⁵⁵ Ichaqa Rebecapa turinwan mamanmi nirqaku: Sipasqa qepaykuchunraqyá chunka punchawllapas, chaymantañayá richun, nispanku.

⁵⁶ Abrahampa sirvientenñataqmi nirqa: Amañayá harkawaychikchu kay hamusqaypi Tayta Dios allinta ruwawachkaptinqa. Aviawaychikña patronniyman kutikunaypaq, nispa.

⁵⁷ Hinaptinmi paykunañataq nirqaku: Sipastayá qayaspa tapusun, nispanku.

⁵⁸ Chaymi sipasta qayaspa tapurqaku: ¿Rinkichu kay runawan? nispanku. Hinaptinmi Rebeca nirqa: Arí, risaqmi, nispa.

⁵⁹ Chaymi Rebecata wawa kaptin uywaqnintawan aviarqaku, aviarqakutaqmi Abrahampa serviqnintapas riqmasinkunatawan.

⁶⁰ Chaymi Rebecata kaynata bendecirqaku: Panillayku, wara-waranqa runakunayá qanmanta mirachun. Miraynikikunayá enemigonkuta vencechunku, nispanku.

⁶¹ Chaymantam Rebecaqa criadankunapiwan camellokunaman sillakuykuspa Abrahampa serviqninwan pasarqaku. Chaynapim Rebecata pusarikuspan Abrahampa serviqnin ripukurqa.

⁶² Isaacmi “Rikuqniy Kawsaq Diospa Pozon” nisqanku lawmanta kutimuspan yachasqan Neguev lawman chayaramurqa.

⁶³ Hinaspam Isaacqa tardeykuqta puririkuq lloqsispam camellokuna hamuchkaqta rikururqa.

⁶⁴ Rebecapas Isaacta rikuruspanmi camellonmanta uraykuspan

⁶⁵ Abrahampa serviqninta tapurqa: ¿Pitaq wak ñoqanchik lawman hamuq runaqa? nispa. Hinaptinmi chay sirviente nirqa: Patronniy Isaacmi, nispa. Chaymi Rebeca hatun velowan tapakuykurqa.

⁶⁶ Chay sirvientem tukuy ima ruwamusqanta Isaacman willarqa.

⁶⁷ Chaymantam Isaacqa maman Sarapa carpanman Rebecata pusarqa, hinaspam casarakurqaku. Rebecata anchata kuyasqanraykum mamanpa wañukusqanmanta Isaacpa sonqon tiyarqa.