Génesis 21 - CHUYA QELLQA La Biblia en Quechua de Ayacucho 2012

Isaacpa nacesqanmanta

¹ Saraman prometekusqantam Tayta Dios cumplirqa, hinaspam nisqanman hina Sarawan ruwarqa.

² Chaymi Diospa nisqan tiempopi, Abrahampa machuyayninpiña churinta Sara wiksayakuspa qari wawata wachakurqa.

³ Hinaptinmi Abrahamqa churinta Isaacwan suticharqa.

⁴ Hinaspam Diospa kamachisqanman hina churin Isaac pusaq punchawniyuq kachkaptin, qari kayninpa qarachanta kuchuspan señalarqa.

⁵ Abrahammi pachak watayuq karqa churin Isaac naceptin.

⁶ Chaymi Sara nirqa: Diosmi asirachiwan, pipas chayta yacharuspaqa ñoqawanchá kusikunqaku.

⁷ ¿Pitaq ninman karqa Abrahampa churinta ñoqa ñuñunayta? Ichaqa pay machuña kachkaptinpas churintam wachakuruni, nispa.

Agarwan Ismael qarqosqa kasqankumanta

⁸ Isaacmi wiñaruspa anukasqa karqa. Chay punchawmi hatun convidota Abraham ruwarqa.

⁹ Huk punchawmi Sara rikururqa Isaacmanta Agarpa wawan Ismael burlakuchkaqta. Ismaelqa karqa Egipto nacionniyuq Agarpi Abrahampa churinmi.

¹⁰ Chaymi Abrahamta Sara nirqa: Agarta wawantinta qarqoy, kay esclavapa wawanqa manam waway Isaacwan kuskaqa herenciata chaskinmanchu, nispa.

¹¹ Chaynata niruptinmi, churin Ismaelmanta Abraham llumpayta llakikurqa.

¹² Chaymi Abrahamta Dios nirqa: Ama llakikuychu warmamanta nitaq Agarmantapas. Sarapa tukuy nisusqaykita ruway, miraynikiqa hamun-qa Isaacllamantam.

¹³ Esclavapa wawan-mantapas qampa churiki kasqanraykum hatun nacionta hatarichisaq, nispa.

¹⁴ Chaymi paqarinnintin tutapayta Abraham hatarispa mikuyta qoqawchaykuspa odrepi yakutawan qoykuspa Agarta warmantinta aviarurqa. Agarñataqmi ripukuspan Beerseba chunniqpi mana maymanpas yaykuykunanpaq kaptin purillarqa.

¹⁵ Odrepi yaku tukuruptinmi warmata sachapa llantunpi siriykachirqa.

¹⁶ Chaypi warmata saqeykuspanmi karuniqpi tiyaykurqa: Waway wañuqtaqa amayá qawasaqchu, nispan. Warmañataqmi qaparispa waqakurqa.

¹⁷ Diosmi warmapa qaparisqanta uyarirqa. Chaymi cielomanta Diospa angelnin Agarta nimurqa: ¿Agar imataq pasasunki? Ama manchakuychu, warmapa waqasqantam Dios uyarirun.

¹⁸ Asuykuspayki warmata makinmanta hatarichiy, paymantam hatun nacionta hatarichisaq, nispa.

¹⁹ Chaymantam Dios qawariykachirqa yakuyuq pukyuta, chaymi rispan yakuta odrenpi hurqomuspa warmaman tomaykachirqa.

²⁰ Dios yanapaptinmi warmaqa hatunyaruspan chunniqpi yacharqa, hinaspanmi flecha manejayta yacharurqa.

²¹ Parán sutiyuq chunniqpim yacharqa, mamanñataqmi Egipto llaqtayuq warmiwan Ismaelta casarachirqa.

Abrahamwan Abimelec contratota ruwasqankumanta

²² Chay tiempopim Abimelecqa tropanpa capitannin Ficolpiwan Abrahamta watukuspa nirqaku: Diosmi tukuy ima ruwasqaykipi qanwan kachkan.

²³ Kunanyá Diosrayku prometewayku ñoqatapas, churiykunatapas chaynataq willkaykunatapas ama imanawanaykikupaq. Contrato ruwasqanchikman hinayá ruway ñoqawanpas, chaynallataq kay yachasqayki allpapi runakunawanpas, nispa.

²⁴ Chaymi Abraham nirqa: Arí, prometekim, nispa.

²⁵ Ichaqa Abimelecmanmi Abraham quejakurqa, yakuyuq pozonta Abimelecpa serviqninkuna qechurusqanmanta.

²⁶ Chaymi Abimelec nirqa: Manam yachanichu pim chayta ruwasusqaykita, qampas manataqmi willaykuwarqankichu, kunankamapas manam yacharqanichu, nispa.

²⁷ Hinaptinmi Abrahamqa ovejakunata, vacakunata hapispan Abimelecman qoykurqa, chaymi iskayninku contratota ruwarqaku.

²⁸ Abrahammi kanchanmanta qanchis malta ovejakunata rakirqa,

²⁹ chaymi Abrahamta Abimelec tapurqa: ¿Ima ninantaq kay qanchis ovejakuna sapaqchasqaykiqa? nispa.

³⁰ Hinaptinmi Abraham nirqa: Kay qanchis ovejakuna chaskiwasqaykim testigo kanqa kay pozoqa ñoqapa uchkusqay kasqanmanta, nispa.

³¹ Chaymi chay lugarta suticharqa Beersebawan, chaypi iskayninku juramento ruwasqankurayku.

³² Beerseba llaqtapi contratota ruwaruspankum, Abimelecqa capitannin Ficolpiwan Filistea nacionman kutikurqaku.

³³ Hinaptinmi Beerseba llaqtapi tamarisco sachata Abraham plantarqa, hinaspam wiñaypaq kawsaq Diosta chaypi mañakurqa.

³⁴ Abrahamqa unay watam Filistea nacionpi yacharqa.