Génesis 20 - CHUYA QELLQA La Biblia en Quechua de Ayacucho 2012

Abrahammantawan Abimelecmanta

¹ Abrahammi maymi yachasqan-manta Neguev lawman ripukurqa, hinaspam Gerar llaqtapi yacharqa; chayqa tarikun Cades llaqtamanta Shur lawman rinanpim.

² Chaypi yachachkaspanmi warmin Saramanta Abraham nirqa: “Paniymi” nispan. Hinaptinmi Gerar llaqtapa reynin Abimelec casarakunanpaq Sarata pusachimurqa.

³ Chaymi Abimelecman chay tuta musqoyninpi rikuriykuspan Dios nirqa: Kunanqa wañunkim, kay pusachimusqayki warmiqa qosayuqmi, nispa.

⁴ Abimelecmi ichaqa Sarawan manaraq puñurqaraqchu, chayraykum nirqa: Señorlláy, ¿mana huchallikuq runatapas wañuchinkichu?

⁵ Kikin Abrahammi niwarqa: “Paniymi” nispa, Sarapas niwarqataqmi: “Turiymi” nispa, allin sonqoywanmi kaytaqa ruwarqani, manam llullaytachu, nispa.

⁶ Hinaptinmi musqoyninpi Dios nirqa: Yachanim allin sonqowan ruwasqaykita, chayraykum Sarata llapchayllapas llapchaykunaykimanta harkakurqayki, chaynapi contraypi mana huchallikunaykipaq.

⁷ Chaynaqa, kunanyá chay warmita qosanman kutichipuy, payqa profetaymi, mañapusunkim mana wañunaykipaq. Mana kutichipuspaykiqa llapallan runaykikunapiwanmi wañunki, nispa.

⁸ Chaymi paqarinnintin tutapayta Abimelec hatarirurqa, hinaspam llapallan serviqninkunata qayachispa willarqa Diospa tukuy ima nisqanta, chaymi runankuna sinchillataña mancharikururqaku.

⁹ Chaymantam Abimelecqa Abrahamta qayachispa nirqa: ¿Imatataq kayta ruwaruwankiku? ¿Imapitaq qamta pantarqayki ñoqatawan runaykunata llumpayta huchallichiwanaykikupaq? Mana ruwanaykitam kaytaqa ruwaruwanki.

¹⁰ ¿Imata piensaspataq kayta ruwarqanki? nispa.

¹¹ Hinaptinmi Abraham nirqa: Arí kaytam piensarqani: “Kaypiqa manam Diosta manchakunkuchu, hinaspachá warmiyrayku wañurachiwanqaku” nispay.

¹² Cheqaptapunipas payqa taytaymanta paniymi, ichaqa manam mamaypa wawanchu, chayraykum paywan casarakurqani.

¹³ Taytaypa wasinmanta mana llaqtayuq hina purinaypaq Dios hurqoramuwaptiymi, warmiyta nirqani: Ama hina kaspaykim maylaw llaqtaman chayaptinchikpas turiymi niwanki, nispay.

¹⁴ Chaymi Abrahamman Abimelec qoykurqa ovejakunata, vacakunata, criadakunata, criadokunata, warmin Saratapas kutichipurqataqmi.

¹⁵ Chay-mantam Abrahamta Abimelec nirqa: Kayqaya allpayqa makikipi, munasqaykipiyá yachakuy, nispa.

¹⁶ Saratapas nirqataqmi: Kunanmi chunka hukniyuq kilo parten qollqeta turikiman qoni, chaymi kanqa qanwan llapallan kaqkunapa qayllanpi chaynataq lliwpa qayllanpi honorniki mana penqaypi kananpaq, chaynapi respetasqa kanaykipaq, nispa.

¹⁷ Abrahammi Diosta mañakurqa, chaymi Abimelecta, warminta chaynataq criadankunatapas sanoyachirqa, hinaptinmi chayraq wawayuq kayta atirqaku.

¹⁸ Abrahampa warmin Sararaykum Abimelecpa wasinpi llapa warmipa madrenta Tayta Dios wichqarurqa.